NUMERI 10 - BIVHILI KHETHWA Mafhungo Madifha

Phalaphala dza siliva

¹ Muṋe washu a amba na Mushe a ri,

² “Ita phalaphala mbili dza siliva yo fuliwaho dzine wa ḓo vhidza vhathu ngadzo uri vha kuvhangane, na musi hu tshi ṱokololwa mishasha.

³ Arali phalaphala dzoṱhe vhuvhili hadzo dzi tshi lidzwa ha lapfiswa mubvumo, vhathu vhoṱhe vha kuvhangane muṋangoni wa dennde ya u ṱangana na Nṋe.

⁴ Hone arali hu tshi lidzwa phalaphala nthihi, zwenezwo hu kuvhangana vharangaphanḓa vha mitupo fhedzi.

⁵ Arali hu tshi lidzwa lwa u thoma, hu ḓo bva vha matsinde a thungo ya vhubvaḓuvha,

⁶ hu tshi lidzwa lwa vhuvhili, hu ḓo bva vha matsinde a thungo ya tshipembe. Ndi uri hu tshi lidzwa phalaphala vhathu vha ṱokolole mishasha,

⁷ hone arali hu tshi vhidzwa vhathu uri vha kuvhangane, hu lidzwa ha lapfiswa mibvumo.

⁸ Idzo phalaphala dzi lidzwe nga vhotshifhe vhana vha Aroni. Wonoyo ndi mulayo une na fanela u u vhulunga lini na lini.

⁹ “Musi ni nndwani shangoni ḽa haṋu, ni tshi lwa na swina ḽe ḽa ni thoma, lidzani phalaphala dzenedzo. Nṋe Yahavee Mudzimu waṋu ndi ḓo ni elelwa nda ni lamulela kha maswina aṋu.

¹⁰ Na misi ya madakalo – nga vhuṱambo ha Ṅwedzi Muswa na vhuṅwe-vho vhuṱambo haṋu no fanela u lidza idzo phalaphala musi ni tshi ṋekedza nduvho dzaṋu dzi fhiswaho na dza u konana na Nṋe. Nṋe Mudzimu waṋu ndi ḓo ni humbula ngazwo. Ndi Nṋe Yahavee Mudzimu waṋu.”

Vhaisraele vha tshi ṱokolola mishasha

¹¹ Nga ḓuvha ḽa 20 ḽa ṅwedzi wa vhuvhili nga ṅwaha wa vhuvhili tshee vhathu vha pfuluwa Egipita, gole ḽo alamaho nṱha ha dennde ya mbulungelo ya mulanga ḽa takuwa,

¹² Vhaisraele vha thoma lwendo lwavho vha tshi bva phangani ya Sinai. Gole ḽa ḓa ḽa ima sogani ḽa Pharani.

¹³ Vha thoma u tshimbila nge Muṋe washu a vha laya nga Mushe.

¹⁴ Misi yoṱhe vha tshi tshimbila, vho vha vha tshi ḓi tevhekana nga nḓila yeneyo. Vhe vha ḓi ranga phanḓa ndi khethekanyo i rangwaho phanḓa nga Juda, vha tshi langwa nga Nahashoni ṅwana wa Aminadaba.

¹⁵ Tsinde ḽa Isakhara ḽo vha ḽi tshi langwa nga Nathaniele ṅwana wa Tsuara.

¹⁶ Tsinde ḽa Zebuloni ḽo vha ḽi tshi langwa nga Eliaba ṅwana wa Heloni.

¹⁷ Ndi hone hu tshi akhululwa dennde, ha takuwa vha mutupo wa Gerisoni na wa Mirari, vha i hwala.

¹⁸ Ha tevhela vha khethekanyo ya vho rangwaho phanḓa nga tsinde ḽa Rubeni, vha takuwa, tshigwada nga tshigwada, vha tshi langwa nga Elitsuru ṅwana wa Shedeuru.

¹⁹ Tsinde ḽa Simioni ḽo vha ḽi tshi langwa nga Shelumiele ṅwana wa Tsurishadai,

²⁰ ḽa Gadi ḽi tshi langwa nga Eliasafa ṅwana wa Deuele.

²¹ Zwino ha takuwa Vhalivi vha mutupo wa Kehathi vhó hwala zwithu zwikhethwa. Musi vha tshi swika mishashani ine vha khou ya khayo, vha wana dennde yo dovha u akhiwa.

²² Ha tevhela vha khethekanyo ya vho rangwaho phanḓa nga tsinde ḽa Efraimi, vha takuwa, tshigwada nga tshigwada, vha tshi langwa nga Elishama ṅwana wa Amihudu.

²³ Tsinde ḽa Manase ḽo vha ḽi tshi langwa nga Gamaliele ṅwana wa Phedatsuru,

²⁴ ḽa Benyamini ḽi tshi langwa nga Abidani ṅwana wa Gidoni.

²⁵ Ha fhedzisela vha khethekanyo yo rangwaho phanḓa nga tsinde ḽa Dani, vhone vho vha vhe vhalindi vha murahu vha khethekanyo dzoṱhe, vha takuwa, tshigwada nga tshigwada, vha tshi langwa nga Ahiesere ṅwana wa Amishadai.

²⁶ Tsinde ḽa Ashere ḽo vha ḽi tshi langwa nga Phagiele ṅwana wa Okhorani,

²⁷ ḽa Nafuthali ḽi tshi langwa nga Ahira ṅwana wa Enani.

²⁸ Vhathu vho vha vha tshi tshimbila vho tevhekana nga u ralo, tshigwada nga tshigwada, musi Vhaisraele vha tshi ṱokolola mishasha vha tshi fara lwendo.

Muendedzi wa Israele ndi Muṋe washu nga dzawe

²⁹ Mushe a humbela mulamu wawe Hobaba ṅwana wa Reuele wa Mumidiani a ri, “Ri ḓo ṱuwa ri tshi takuwa ra livha fhethu he Muṋe washu a ri u ḓo ri ṋea hone. O fulufhedzisa uri Vhaisraele zwi ḓo vha nakela, zwenezwo nga ri ṱuwe roṱhe, ri ḓo ni tonda-vho.”

³⁰ Hobaba a fhindula a ri, “Aiwa, nṋe ndi humela ha hashu.”

³¹ Mushe a ri, “Aiwa nandi, ni songo ri ṱutshela. Ni a ḓivha hune ra nga ṱoka hone mishasha fhano sogani, ndi inwi ane na nga ri endedza.

³² Arali na ṱuwa na riṋe, mashudu oṱhe ane Muṋe washu a ri ṋea a ḓo vha aṋu-vho.”

³³ Musi vhathu vha tshi ṱuwa Sinai, thavhani khethwa, vha fhedza maḓuvha mararu vha tshi khou tshimbila. Mbulungelo ya mulanga ya Muṋe washu yo ḓi vha ranga phanḓa uri i vha wanele hune vha nga ṱoka mishasha.

³⁴ Vha ḓi tshimbila nga u ralo vha tshi takuwa nga matsheloni, gole ḽa Muṋe washu ḽi tshi ḓi vhonala nṱha havho masiari.

³⁵ Musi mbulungelo ya mulanga i tshi takuwa, Mushe o vha a tshi ri, “Muṋe washu, takuwa, balanganya maswina au, vhane vha u vhenga nga vha tou shavha!”

³⁶ Nahone musi i tshi ima o vha a tshi ri, “Muṋe washu, vhuelela kha vha zwigidi na zwigidi zwa Vhaisraele.”