NUMERI 1 - BIVHILI KHETHWA Mafhungo Madifha

U vhalwa ha Vhaisraele ha u ranga

¹ Nga ḓuvha ḽa u ranga ḽa ṅwedzi wa vhuvhili wa ṅwaha wa vhuvhili Vhaisraele vhó pfuluwa Egipita, Muṋe washu a amba na Mushe henefho phangani ya Sinai, denndeni ya u ṱangana na Mudzimu, a ri,

² “Iwe na Aroni ni vhale Vhaisraele nga mitupo na miṱa. Ni ṅwale mutevhe wa madzina a vhanna vhoṱhe

³ u thoma kha vha miṅwaha ya 20, vho teaho u bva pfumo. Ni vha vhale ni tshi tevhedza gomane dzavho.

⁴ Tsinde ḽiṅwe na ḽiṅwe ḽi vhe na munna muthihi ane a ni farisa. Onoyo a vhe muhulwane wa mutupo wawe.

⁵ Madzina a vhanna vhane vha ḓo ni farisa ngea: Tsinde Muhulwane wa tsinde Rubeni Elitsuru ṅwana wa Shedeuru

Tsinde Muhulwane wa tsinde

⁶ Simioni Shelumiele ṅwana wa Tsurishadai

⁷ Juda Nahashoni ṅwana wa Aminadaba

⁸ Isakhara Nathaniele ṅwana wa Tsuara

⁹ Zebuloni Eliaba ṅwana wa Heloni

¹⁰ Efraimi ṅwana wa Josefa Elishama ṅwana wa Amihudu Manase ṅwana wa Josefa Gamaliele ṅwana wa Phedatsuru

¹¹ Benyamini Abidani ṅwana wa Gidoni

¹² Dani Ahiesere ṅwana wa Amishadai

¹³ Ashere Phagiele ṅwana wa Okhorani

¹⁴ Gadi Eliasafu ṅwana wa Deuele

¹⁵ Nafuthali Ahira ṅwana wa Enani.”

¹⁶ Ndi vhone vhanna vho nangwaho kha tshivhidzo, vharangaphanḓa vha matsinde a vhomakhulukuku. Ndi vhone vhahulwane vha matsinde a Vhaisraele.

¹⁷ Mushe na Aroni vha dzhia vhanna avho vhe vha nangiwa,

¹⁸ vha vhidza vhathu vhoṱhe vha kuvhangana nga ḓuvha ḽa u ranga ḽa ṅwedzi wa vhuvhili, vhathu vhoṱhe vha ṅwaliwa zwi tshi ya nga matsinde na miṱa yavho, ha ṅwaliwa madzina a vhanna vhoṱhe u thoma kha vha miṅwaha ya 20,

¹⁹ nga he Muṋe washu a laya Mushe. Mushe o tou ralo a tshi vha vhala phangani ya Sinai.

^20-46 Vhanna vhoṱhe u thoma kha vha miṅwaha ya 20, vhe vha vha vho tea u bva pfumo, vho ṅwalisa madzina nga tsinde na muṱa, ha thomiwa nga tsinde ḽa Rubeni tanzhe ḽa Jakopo. Vhó ṱangana vhoṱhe ngevha: Tsinde Tshivhalo tsha vhanna Rubeni 46 500 Simioni 59 300 Gadi 45 650 Juda 74 600 Isakhara 54 400 Zebuloni 57 400 Vhana vha Josefa Efraimi 40 500 Manase 32 200 Benyamini 35 400 Dani 62 700 Ashere 41 500 Nafuthali 53 400 Vhoṱhe vho ṱangana: 603 550

Tsinde Tshivhalo tsha vhanna

⁴⁷ Vhalivi vhone a vho ngo ṅwaliwa na maṅwe matsinde,

⁴⁸ nge Muṋe washu a vha o vhudza Mushe a ri,

⁴⁹ “Musi u tshi vhala vhanna vho teaho u bva pfumo, u songo vha ṱanganya na tsinde ḽa Livi.

⁵⁰ Vhalivi vhone u vha vhetshele u sedza zwa dennde ya mbulungelo ya mulanga na thundu dzayo dzoṱhe. Vha ḓo i hwala na thundu dzayo, vha shuma ngomu hayo, vha ṱoka mishasha yavho u mona nayo.

⁵¹ Musi ni tshi ṱokolola mishasha yaṋu ni tshi fhirela phanḓa, Vhalivi vha ḓo akhulula dennde, vha dovha vha i akha hoṱhe-hoṱhe hune na ḓo ṱoka mishasha yaṋu. Muthu a si Mulivi ane a vhuya a sendela tsini ha iyo dennde nga a vhulawe.

⁵² Vhaṅwe Vhaisraele vha ṱoke mishasha yavho, tshigwada nga tshigwada, munna muṅwe na muṅwe e na vha tsinde ḽawe, e kha khethekanyo yawe.

⁵³ Hone Vhalivi vha ṱoke mishasha yavho u mona na dennde uri vha i linde, hu songo vhuya ha sendela muthu tsini hayo a ntsinyusa nda vhulaha vhathu vha Israele.”

⁵⁴ Ndi hone Vhaisraele vha tshi ita zwoṱhe zwe Muṋe washu a laya Mushe.