NEHEMIA 6 - BIVHILI KHETHWA Mafhungo Madifha

Nehemia a tshi itelwa vhukwila

¹ Sanibalati na Tobia na Gesheme wa Muarabia na vhaṅwe maswina ashu vha zwi pfa uri ro fhedza u vusa mutsheṱo na uri a hu tshee na ho piḓimuwaho, naho ro vha ri sa athu kwea dzigethe miṋangoni.

² Ndi hone Sanibalati na Gesheme vha tshi ruma muḓinḓa a ḓa ha nṋe na mafhungo a no ri ri ṱangane Khefirimu Govhani ḽa Ono. Ho vha vhu vhukwila fhedzi ha uri vha nkhuvhadze.

³ Nṋe nda ruma vhaḓinḓa uri vha vha vhudze vha ri, “Nṋe ndi khakhathini ya mushumo muhulwane, ndi nga si kone u takuwa nda tsela henengei; arali nda litsha mushumo nda ḓa u ni vhona, zwoṱhe zwi ḓo ima.”

⁴ Vhone vha nthumela malaedzwa o raloho lwa ita luṋa, nṋe ndi tshi ḓi vha fhindula-vho nga u ralo.

⁵ Ndi hone Sanibalati a tshi ruma muṅwe wa vhakoma vhawe a ḓa ha nṋe lwa vhuṱanu. Ayo o vha o tou ṅwalwa kha luṅwalo lu songo pfuṋelwaho.

⁶ Luṅwalo ulwo lwo vha lu tshi ri, “Gesheme u mmbudza uri hu khou pfala phungo kha tshakha i no ri inwi na Majuda ni khou ṱoḓa u shandukela khosi, ndi zwine na khou vusa mutsheṱo. Ha dovha ha pfi inwi no dzudzanya uri ni vhe khosi

⁷ na uri no no ḓi vhudza vhaṅwe vhaporofita uri vha ḓivhadze Jerusalema uri inwi ni khosi ya Juda. Vhukumakuma khosi i ḓo a pfa mafhungo hayo, ndi zwine nda ri nṋe na inwi ri ṱangane ri ambe ayo mafhungo.”

⁸ Nṋe nda mu rumela phindulo nda ri, “Zwine vhone vha amba ndi zwitshele fhedzi. Ndi zwitshele zwavho fhedzi.”

⁹ Vhone vho vha vha tshi tou linga u ri shushedza uri ri litshe mushumo. Nṋe nda rabela nda ri, “Mudzimu, khwaṱhisa zwanḓa zwanga!”

¹⁰ Ḽiṅwe ḓuvha nda yo dalela Shemaya, ṅwana wa Delaya ṅwana wa Mehetabele, we a vha o ḓihoṋela nḓuni. Ene a mmbudza a ri, “Nga ri ṱuwe ri yo dzumbama fhethu hukhethwa ha thembele, ri hoṋe mahothi, vha khou ḓa u vha vhulaha; vha ḓo ḓa vhusiku vha vha vhulaha.”

¹¹ Nṋe nda fhindula nda ri, “Munna a no nga nṋe a nga shavha a dzumbama naa? Ndi nga ḓitshidza nga u yo dzumbama thembeleni? Izwo ndi nga si zwi ite.”

¹² Ndo vha ndo zwi vhona uri Mudzimu o vha a songo amba na Shemaya. Ndi Tobia na Sanibalati vhe vha vha vho mu putisa uri a ḓe a mmbudze nga u ralo.

¹³ Vho mu thola uri a ntshutshedze ndi wele tshivhini, uri vha ntshinye dzina, vha nnyadzise.

¹⁴ Nṋe nda rabela nda ri, “Mudzimu, elelwa zwe Tobia na Sanibalati vha ita, u vha lifhedze. Elelwa uḽa muporofita wa musadzi Nuadia na vhaṅwe vhaporofita vhoṱhe vhe vha linga u ntshutshedza.”

Mushumo u tshi vuledzwa

¹⁵ Mutsheṱo wo fhela u fhaṱwa nga ḓuvha ḽa 25 ḽa ṅwedzi wa Elulu, hó fhela maḓuvha a 52 u tshi fhaṱwa.

¹⁶ Musi maswina ashu a tshakha dzo ri tangaho a tshi zwi pfa, vha kulea nungo, nge vha vha vha tshi zwi ḓivha uri uyo mushumo wo shumiwa nge Mudzimu a ri farisa.

¹⁷ Vhaṅwe vharangaphanḓa vha Majuda vho vha vha tshi khou ḓi ṅwalelana na Tobia.

¹⁸ Vhathu vhanzhi vha Juda vho vha vha tshi ima nae nge khotsi a musadzi wawe a vha e Mujuda, ndi Shekhania ṅwana wa Ara. Ṅwana wawe Jehohanani a dovha a vhinga ṅwananyana wa Mishulamu ṅwana wa Berekhia.

¹⁹ Vhathu vho vha vha tshi ḓi mmbudza zwivhuya zwoṱhe zwe Tobia a ita, vha ita na u mu sevha zwoṱhe zwe nṋe nda amba. Ene a ḓi dzula a tshi nṅwalela a tshi linga u ntshenusa.