NEHEMIA 5 - BIVHILI KHETHWA Mafhungo Madifha

U kandeledzwa ha vhashai

¹ Ngavhuya vhathu vhanzhi, vhoṱhe vhanna na vhasadzi vhavho, vha thoma u gungula nga Majuda vha havho.

² Vhaṅwe vha ri, “Ri na miṱa mihulwane, ri lila goroi uri ri ḽe ri tshile.”

³ Vhaṅwe vha ri, “Riṋe ri tou pambisa masimu ashu na a minḓirivhe na nnḓu dzashu i vhe pfarela ri wane goroi ri si ṋoke nga nḓala.”

⁴ Nga ngeno vhaṅwe vha ri, “Riṋe ro tou pamba tshelede uri ri thele muthelo wa musanda nga u tou vhetshedzela masimu ashu na masimu a minḓirivhe.

⁵ Ri lushaka luthihi na Majuda vha hashu. Kani vhana vhashu a vha ngi vhavho? Hone ro kumedza vhana vhashu vha vhatuka na vha vhasidzana vha itwa dziphuli. Vhaṅwe vhananyana vhashu vho no ḓi rengiswa vha itwa dziphuli, riṋe a ri na tshine ra nga ita; na masimu ashu na a minḓirivhe zwo no vha zwa vhaṅwe.”

⁶ Ndi tshi pfa vha tshi lila nga u ralo, nda sinyuwa zwihulu

⁷ nda elekanya ngavho mbiluni yanga nda konou pomoka vhaḓivhalea na vhakoma, nda vha vhudza nda ri, “Ni khou kandeledza vha haṋu!” Nṋe nda vhidza tshivhidzo uri tshi senge ayo mafhungo

⁸ nda ri, “Ri khou linga nga nungo dzashu dzoṱhe u rengulula Majuda vha hashu vhe vha ḓirengisa kha vhatsinda. Zwino ni vho kombetshedza vha haṋu uri vha ḓirengise kha inwi Majuda vha havho!” Vharangaphanḓa vha sokou fhumula, vha wana hu si na tshine vha nga fhindula.

⁹ Zwino nṋe nda ri, “Zwine na khou ita zwo khakha! No vha no fanela u ofha Mudzimu, na ita zwi re zwone. Zwenezwo vhahedeni maswina ashu, vho vha vha sa nga koni u ri sea.

¹⁰ Na nṋe na vha hashu na vhakoma vhanga ro adzima vhathu tshelede na mavhele. Zwino ni songo vha lifhisa.

¹¹ Ṋamusi thuthani milandu yoṱhe ya zwe vha pamba kha inwi – tshelede na mavhoḓa ayo, na mavhele na waini na mapfura a muolivi, ni vha humisele masimu avho na masimu a minḓirivhe na miri ya miolivi na dzinnḓu kathihi fhedzi!”

¹² Vharangaphanḓa vha fhindula vha ri, “Ri ḓo ita zwine vha amba. Ri ḓo humisela thundu kha vhaṋe vhayo ra si tsha vhila mulandu!” Nda vhidza vhotshifhe nda ita uri vharangaphanḓa vha ane phanḓa havho uri vha ite zwe vha fulufhedzisa.

¹³ Nda ita na u ukhutha phendelo dza khanzu yanga nda ri, “Mudzimu u ḓo ukhutha munna muṅwe na muṅwe nga u ralo, ane a si ite zwe a fulufhedzisa. Mudzimu u ḓo ni dzhiela nnḓu dzaṋu na zwoṱhe zwine na vha nazwo, a ni sia ni si na tshithu.” Tshivhidzo tshoṱhe tsha ri, “Amen!” vha renda Muṋe washu. Vhathu vha ita zwe vha fulufhedzisa.

Nehemia a sa ita tseḓa

¹⁴ Miṅwaha yoṱhe ya 12 ndi tshi khou vhusa shangoni ḽa Juda, u bva nga ṅwaha wa 20 wa Arithakhesese u swika ṅwaha wawe wa 32, nṋe na vhakoma vhanga a ro ngo vhuya ra ḽa zwiḽiwa zwe zwa vha zwi tshi pfi ndi zwanga zwa muvhusi.

¹⁵ Vhavhusi vhoṱhe vhe vha vhusa nṋe ndi sa athu vhusa vho vha vha tshi tou vha muhwalo wa vhathu, vha tshi vha bvisisa mangwende a 40 a siliva nga ḓuvha, na zwiḽiwa na waini. Na vhashumi vhavho vho vha vha tshi kandeledza vhathu. Huno nṋe a tho ngo ita unga vhone ngauri ndo vha ndi tshi ofha Mudzimu.

¹⁶ Nda shuma nga nungo dzoṱhe ndi tshi vusa mutsheṱo, nda si vhuye nda ṱoḓa thundu, na tsimu a tho ngo renga, na vhashumi vhanga vhoṱhe, ra fhaṱa roṱhe.

¹⁷ Zwiṅwe hafhu, ṱafulani yanga ho vha hu tshi ḽa Majuda vha 150 na magota avho, ndi sa ambi vhathu vhoṱhe vhe vha nndalela vha tshi bva kha tshakha dzi re tsini hashu.

¹⁸ Ḓuvha ḽiṅwe na ḽiṅwe ndo vha ndi tshi ṱhavha phulu nthihi na nngu ṱhanu na nthihi dzavhuḓivhuḓi na khuhu nnzhi, nahone hu tshi ri u fhela maḓuvha a fumi nda vha fha waini ya tuvhu. Hone nga u ḓivha mihwalo i lemelaho ine avha vhathu vha i hwala, nda si vhile zwe zwa vha zwo fanela u fhiwa muvhusi.

¹⁹ Yawee Mudzimu wanga, u songo nkhangwa, elelwa zwoṱhe zwe nda tonda vhathu havha.