MUFUNZI 9 - BIVHILI KHETHWA Mafhungo Madifha

¹ Ndo elekanya zwoṱhe hezwo ndi tshi edzisa u zwi ṱalukanya, nda vhona uri Mudzimu u langa zwiito zwa vha mu thetshelesaho na vhaṱali, hone muthu ha ḓivhi zwo mu lindelaho; ha ḓivhi arali hu tshi ḓo vha na u funana kana u vhengana.

² A hu na phambano; vhoṱhe vho livhana na zwithihi – vha thetshelesaho Mudzimu na vhavhi, vhavhuya na vha mbilu dzo ṱambaho na vha dzitshika, vha ṋekedzaho Mudzimu zwiṱhavhelo na vha sa mu ṋekedzi; zwa muvhuya zwi ḓi fana na zwa mutshinyi; zwa ane a ita muano zwi ḓi fana na zwa ane a ofha u ana nga u ḓivha uri u na mulandu –

³ vhoṱhe vho livhana na zwi no fana. Hezwo zwo khakhea u ḓi fana na zwoṱhe zwi iteaho fhano fhasi ha ḓuvha. Zwi ita uri vhathu vha tshi kha ḓi tshila mbilu dzavho dzi ḓale vhuvhi na tshipengo, vha fhedza nga u fa.

⁴ Ndi nnyi ane zwa si mu kwame? Ane a kha ḓi tshila u na tshe a tshi lavhelela; mmbwa i tshilaho i fhira ndau yo faho.

⁵ Vha tshilaho vha a zwi ḓivha uri vha ḓo fa, ngeno vho faho vha sa ḓivhi tshithu; a vha tsha ḓo vha na iṅwe pfufho, vho hangwiwa tshoṱhe.

⁶ Lufuno lwavho, vengo ḽavho, vivho ḽavho, vha fa nazwo! A vha tsha vhuya vha kovhekana na vhaṅwe zwi no itea fhano fhasi ha ḓuvha.

Tshithihi fhedzi tsho salelaho vhathu

⁷ Iyo ḽa vhuswa hau u takale, u nwe waini yau mbilu yau yo takala; ndi zwenezwo zwe Mudzimu a u tendela uri u zwi ite.

⁸ U dzule wo ambara nguvho tshena, ṱhoho yau yó ḓola mapfura.

⁹ Ḓiphiṋe nga vhutshilo na musadzi ane wa mu funa maḓuvha oṱhe a vhutshilo hau ha mahandana he wa ṋewa nga Mudzimu fhano fhasi ha ḓuvha; ndi zwone zwo u livhaho u tshi kha ḓi tshila u tshi khou ḓinetisa nga u shuma fhano fhasi ha ḓuvha.

¹⁰ Zwoṱhe zwine wa kona u ita u shume nga nungo dzoṱhe; ngei vhudzulavhafu hune wa ya hone a hu tshee na mushumo, a hu tshee na u humbula, a hu na nḓivho, a hu na vhuṱali.

A si nungo dzau dzi no ita uri zwi u nakele

¹¹ Nda dovha nda vhona uri fhano fhasi ha ḓuvha ane a wana tshiphuga tsha mbambe a si a re na luvhilo; ane a kunda nndwani a si wa maanḓa; na zwiḽiwa a zwi wanwi nga muṱali; na lupfumo a lu wanwi nga a re na ṱhalukanyo; na u takalelwa nga vhathu a zwi ḓi nge muthu a funzea; zwoṱhe zwi langwa nga tshifhinga na shudu.

¹² A hu na a no ḓivha ḽawe ḓuvha; ri sokou tshenuwa ro welwa nga zwo vhifhaho, ra nga khovhe dzi tshi fashwa nga mambule, ra nga zwiṋoni zwi tshi fashwa nga tshikwekwe.

Mihumbulo nga vhuṱali na vhutsilu

¹³ Hu na tshiṅwe hafhu tshe nda tshi vhona; ndi tsumbo ya uri vhuṱali vhu na mushumo mungafhani fhano fhasi ha ḓuvha.

¹⁴ Ho vha hu na muḓi muṱuku u na vhathu vha si gathi; wa mbo ḓi diwa nga khosi ya maanḓa; iyo khosi ya u govhela, ya fhaṱa mitsheṱo mihulu ya u tangela ngomu.

¹⁵ Henefho ho vha hu tshi dzula muṅwe munna wa mushai we a vha e na vhuṱali; a mbo ḓi tshidza uyo muḓi nga vhuṱali hawe, hone ho vha hu si na na we a vhuya a mu elelwa.

¹⁶ Ndi zwine nda ri, vhuṱali vhu fhira maanḓa, hone vhuṱali ha mushai vhu a nyadziwa, na maipfi awe ha pfiwi.

¹⁷ U thetshelesa maipfi o dzikaho a muṱali zwi fhira u thetshelesa muvhusi a no sokou zhamba a tshi vhusa matsilu.

¹⁸ Vhuṱali vhu fhira zwihali zwa nndwani, fhedzi mutshinyi muthihi u tshinya zwivhuya zwinzhi.