MUFUNZI 6 - BIVHILI KHETHWA Mafhungo Madifha

Lupfumo a lu tiki muthu

¹ Ndo vhona tshi ṱungufhadzaho fhano fhasi ha ḓuvha tshi no lemela vhathu:

² Mudzimu u ṋea muthu lupfumo na thundu na khuliso, a si shae na tshithihi tshine mbilu yawe ya tshi tama, hone Mudzimu a si mu tendele a tshi ḓiphiṋa ngazwo, ha tou ḓa mutsinda a ḓiphiṋa ngazwo. Hezwo ndi mahandana, zwi a ṱungufhadza.

³ Muthu a nga ḓi vha na vhana vha ḓana a lalama, hone na u lalama hawe, á sa wana mukovhe wawe wa dakalo, a tshi fa na u swiṱwa a si swiṱwe zwavhuḓi, onoyo ndi ri na mafhelelanḓuni u na mashudu a no fhira awe.

⁴ U ḓa e mahandana, a xela-xela swiswini, dzina ḽawe ḽa tibwa nga swiswi;

⁵ ha vhuyi a vhona tshedza tsha ḓuvha, kana a ḓivha uri vhutshilo ndi mini, fhedzi u awela hone o awela, u fhira uyo munna,

⁶ ane naho a tshila tshigidi tsha miṅwaha kavhili, hone a sa ḓiphiṋi nga thundu yawe; zwi mu farisani? Hufha vhuvhili havho vha tshi ya huthihi.

⁷ Muthu u shumela u ḽa, hone a ḓi dovha a pfa nḓala.

⁸ Ndi tshini tshine muṱali a fhira tsilu ngatsho? Hu ḓi nga mushai a re muthu-muthu ndi tshini tshine a vhuelwa ngatsho?

⁹ Ndi khwiṋe u tshi fushea nga zwine wa vha nazwo, u fhira u ṱwa u tshi lila zwiṅwe. Na zwenezwo ndi mahandana fhedzi, ndi u pandamedza muya.

U pikisana na Mudzimu a zwi farisi tshithu

¹⁰ Zwoṱhe zwine zwa itea zwo vha zwo no ḓi dzudzanywa kale; tshine muthu a vha tshone tsho dzula tsho ḓivhea; a nga si pikisane na ane a mu kunda nga maanḓa.

¹¹ U anza maipfi ndi u anza mahandana; muthu zwi mu farisani?

¹² Ndi nnyi a no ḓivha zwine zwa nga farisa muthu vhutshilo hawe ha maḓuvha a si gathi a mahandana? Hufha a tshi fhira unga murunzi. Ndi nnyi ane a nga mu vhudza uri ó no fa hu ḓo itea mini fhano fhasi ha ḓuvha?