MUFUNZI 4 - BIVHILI KHETHWA Mafhungo Madifha

¹ Nda dovha nda vhona u kandeledzwa ha vhathu fhano fhasi ha ḓuvha. Vha kandeledzwaho vha lila hu si na mufhumudzi; vhakandeledzi vhavho vha na maanḓa, a hu na mulamuleli.

² Vho faho vha na mashudu a no fhira a vhane vha kha ḓi tshila.

³ Hone a fhiraho vhoṱhe ndi a sa athu vha hone, a sa athu vhona vhuvhi vhu no itwa fhano fhasi ha ḓuvha.

U takadza ha vhukonani

⁴ Nda dovha nda vhona uri muthu a tshi ḓinetisa nga u shuma nga vhukoni zwi itwa nga vivho ḽa u vhivha vhaṅwe. Na zwenezwo ndi mahandana, ndi u pandamedza muya.

⁵ Ndi zwone: Tsilu ḽi nembeledza zwanḓa ḽa fa nga nḓala.

⁶ Naho zwo ralo ndi khwiṋe ú na zwi si gathi tshanḓani tshithihi, u fhira nungo dza zwanḓa zwivhili zwi tshi shuma u tshi sokou pandamedza muya.

⁷ Nda dovha nda vhona maṅwe mahandana a no itwa fhano fhasi ha ḓuvha:

⁸ Muthu u dzula e eṱhe; ha na ṅwana, ha na murathu, hone u sokou dzula a tshi shuma, ha fushei nga lupfumo lune a vha nalwo. A tshi ḓinetisa nga u ralo a sa vhuyi a ḓiphiṋa u shumela nnyi? Na zwenezwo ndi mahandana, zwi a netisa.

⁹ Munwe muthihi a u ṱusi mathuthu; i mivhili i kona u shuma zwi vhonalaho.

¹⁰ Muṅwe a wa, muṅwe u ḓo mu vusa, hone a re eṱhe a wa, hu na khombo, a hu na ane a mu vusa.

¹¹ Vhavhili vhá eḓela vhulaloni vhuthihi vha a dudedzana; u woṱhe u nga ḓidudedza hani?

¹² Muthihi a kovholwa tshawe ndi u shavha; vhavhili vha nga imedzana na swina; thambo yo lukwaho nga nnzi tharu a i sokou ṱhukhuwa.

Vhathu a vha lengi u shanduka

¹³ Muṱhannga wa mushai a re na vhuṱali, u fhira khosi ya mukalaha ya tsilu i sa tsha thetshelesa nyeletshedzo.

¹⁴ Onoyo muṱhannga a nga ḓi vha khosi ó bva e dzhele, kana ó bebwa e mushai shangoni ḽa khosi yeneyo.

¹⁵ Hone nda dovha nda vhona uri fhano fhasi ha ḓuvha vhathu vha ḓi anzela u tevhela muṅwe muṱhanngana we a ḓiimisela u dzhiela uḽa muṅwe vhuhosi.

¹⁶ Shango ḽoṱhe ḽa mbo ḓi tevhela onoyo, hu si kale na ene vha mu shandukela vha dovha vha ṱoḓa muṅwe. Na zwenezwo ndi mahandana fhedzi, ndi u sokou pandamedza muya.