MUFUNZI 3 - BIVHILI KHETHWA Mafhungo Madifha

Tshiṅwe na tshiṅwe tshi na tshifhinga tshatsho

¹ Tshiṅwe na tshiṅwe tshine tsha itea fhano fhasi ha lutombo tshi na tshifhinga tshatsho.

² Hu na tshifhinga tsha u bebwa na tshifhinga tsha u fa; hu na tshifhinga tsha u ṱavha na tshifhinga tsha u tupula;

³ hu na tshifhinga tsha u vhulaha na tshifhinga tsha u fhodza; hu na tshifhinga tsha u thutha na tshifhinga tsha u fhaṱa;

⁴ hu na tshifhinga tsha u lila na tshifhinga tsha u sea; hu na tshifhinga tsha u ṱungufhala na tshifhinga tsha u tshina;

⁵ hu na tshifhinga tsha u balanganya matombo, na tshifhinga tsha u khokha matombo; hu na tshifhinga tsha u kuvhatedzana na tshifhinga tsha u furalelana;

⁶ hu na tshifhinga tsha u ṱoḓa na tshifhinga tsha u xedza; hu na tshifhinga tsha u vhulunga na tshifhinga tsha u laṱa;

⁷ hu na tshifhinga tsha u kherula na tshifhinga tsha u runga; hu na tshifhinga tsha u fhumula na tshifhinga tsha u amba;

⁸ hu na tshifhinga tsha u funana na tshifhinga tsha u vhengana; hu na tshifhinga tsha nndwa na tshifhinga tsha mulalo.

⁹ Mushumi u wanani nga u ḓinetisa hawe?

¹⁰ Ndo vhona muhwalo we Mudzimu a hwesa vhana vha vhathu.

¹¹ O ita uri tshiṅwe na tshiṅwe tshi nake nga tshifhinga tshatsho. Nahone o ita uri vha dzule vho lavhelela misi ya lini na lini, hone arali i mishumo ya Mudzimu u bva mathomoni u swika magumoni, muthu a nga si i ṱalukanye.

¹² Ndo zwi vhona uri vhathu vha tshi kha ḓi tshila a hu na tshi fhiraho dakalo na u ḓiphiṋa.

¹³ Roṱhe nga ri ḽe ri nwe ri ḓiphiṋe nga zwe ra shuma: ndi tshifhiwa tsha Mudzimu.

¹⁴ Ndi a ḓivha uri zwoṱhe zwine Mudzimu a ita zwi ḓo ḓi dzula zwi hone; u nga si kone u engedza tshithu kana wa fhungudza. Mudzimu o zwi ita nga u ralo uri vhathu vha mu ofhe.

¹⁵ Zwine zwa vha hone zwo no ḓi vhuya zwa vha hone; na zwine zwa ḓo vha hone zwo no ḓi vhuya zwa vha hone; Mudzimu u ita uri zwo vhuyaho zwa itea zwi dovhe zwi vhuye.

Vhuvhi shangoni

¹⁶ Nda dovha nda vhona tshiṅwe fhano fhasi ha ḓuvha: Ho fanelaho u haṱulwa hu tshi tevhedzwa mulayo, khaṱhulo i a piringanywa; ho fanelaho u itwa zwivhuya hu itwa zwo vhifhaho.

¹⁷ Nda humbula nda ri, “Mudzimu u ḓo haṱula vhoṱhe, vhavhuya na vhavhi; hufha mafhungo oṱhe na zwiito zwoṱhe o zwi vhetshela tshifhinga tshazwo.”

¹⁸ Nda fhedza nga u ri, “Mudzimu u ita nga u ralo uri a sumbedze vhathu uri vha ḓiita dziphukha.

¹⁹ Hufha zwo livhaho vhathu na zwo livhaho dziphukha zwi zwithihi. Zwoṱhe zwi fa u fana; zwoṱhe zwi fema muya muthihi; muthu ha fhiri phukha; zwoṱhe ndi mahandana fhedzi.

²⁰ Zwoṱhe zwi ya fhethu huthihi: Zwoṱhe zwi bva mavuni; zwi ḓo dovha zwa vha mavu.

²¹ Ndi nnyi a no ḓivha arali muya wa muthu u tshi ya ṱaḓulu, wa phukha wa dzhena mavuni?”

²² Ndi hone ndi tshi zwi vhona uri tsha khwiṋe tshine muthu a nga ita ndi u ḓiphiṋa nga zwe a shuma; ndi zwone zwo mu livhaho. Hufha a sa ḓivhi zwi no ḓo itea o no fa.