MUFUNZI 1 - BIVHILI KHETHWA Mafhungo Madifha

¹ Haya ndi mafhungo a Mufunzi, ṅwana wa Dafita, we a vha e khosi a tshi dzula Jerusalema.

Vhutshilo ndi mahandana

² Ndi mahandana, ndi mahandana vhukumakuma, u ralo Mufunzi. Vhutshilo ndi mahandana, ndi mahandana fhedzi.

³ Muthu zwi mu farisani a tshi ḓinetisa nga u shuma, a tshi shuma fhano fhasi ha ḓuvha?

⁴ Murafho u a ḓa, wa fhira, ha ḓa muṅwe, hone ḽifhasi ḽi ḓi dzula ḽi hone.

⁵ Ḓuvha ḽi a bva ḽa kovhela, ḽa gidima ḽi tshi femeleka ḽa humela hune ḽa bva hone.

⁶ Muya u vhudzula u tshi ya tshipembe, wa vhudzula u tshi ya devhula, wa mona wa mona wa humela murahu.

⁷ Milambo yoṱhe i elela lwanzheni, hone lwanzhe a lu ḓali. Maḓi a humela zwisimani zwao, a ḓi dovha a ela.

⁸ Zwithu zwoṱhe a si u netisa hazwo! Zwi ro tou ṱali zwi sa ambei! Maṱo ha furi nga u vhona, na nḓevhe a dzi furi u pfa.

⁹ Zwe zwa vhuya zwa vha hone, zwi ḓo ḓi dovha zwa vha hone; zwe zwa vhuya zwa itea zwi ḓo ḓi dovha zwa itea; a hu na na tshithu tshiswa fhano fhasi ha ḓuvha.

¹⁰ Muthu a nga ḓi ri, “Vhonani, tshithu tshiswa ngetshi!” Matsina tsho vha tshi hone na kale ri sa athu vha hone.

¹¹ Vha kale vho no hangwiwa; na vha no ḓo ḓa vha ḓo ḓi hangwiwa nga vhana vhavho.

Vhuṱali ndi mahandana

¹² Nṋe Mufunzi ndo vha khosi ya Israele ndi tshi dzula Jerusalema.

¹³ Ndo ḓikumedza uri ndi ḓo ṱoḓisesa nda guda zwoṱhe zwi no itwa fhano fhasi ha ḓuvha, nda vhona uri Mudzimu o livhanya vhana vha vhathu na u sokou ḓinetisa.

¹⁴ Ndo vhona zwoṱhe zwi no itwa fhano fhasi ha ḓuvha zwi mahandana fhedzi, zwi tou nga u pandamedza muya.

¹⁵ Zwo kombamaho a zwi onyolosei; u nga si vhale zwithu zwi siho.

¹⁶ Ndo amba nga mbilu nda ri, “Ndi na vhuṱali vhuhulu vhu no fhira ha vhoṱhe vhe vha vhuya vha vhusa Jerusalema nṋe ndi sa athu vha khosi. Ho ḓi tsha gole nda vhona, nda vha na vhuṱali na nḓivho khulu.”

¹⁷ Ndo ḓiṋekedza u guda uri ndi vhe na nḓivho na vhuṱali, ndi ṱalukanye u shaya nzhele na vhutsilu, nda wana uri na zwenezwo ndi u sokou pandamedza muya.

¹⁸ Vhuṱali vhu tshi anda na u ḽa mbilu hu a anda; nḓivho i tshi anda hu anda na maṱungu.