MISHUMO 23 - BIVHILI KHETHWA Mafhungo Madifha

¹ Paulo a lavhelesa khoro a ri, “Vha hashu, ndi tshi sedza kutshilele kwanga maṱoni a Mudzimu u swika ṋamusi ndi pfa luvalo lwanga lwo ṱamba.”

² Ananiasi tshifhe muhulu a amba na vho imaho tsini ha Paulo uri vha mu bomodze.

³ Paulo ene a ri, “Mudzimu u ḓo rwa enewe luvhondo lwo sokou fhomiwaho nga nnḓa! U nga ri wo dzulela u ntsengisa nga Mulayo, wa dovha wa pfuka Mulayo nga u nthwisa!”

⁴ Vhathu vho imaho tsini na Paulo vha mu vhudza vha ri, “A ni zwi pfi uri ni tshi ralo ni khou sema tshifhe muhulu wa Mudzimu naa?”

⁵ Paulo a fhindula a ri, “Vhanna vha hashu, a tho ngo zwi ḓivha uri ndi ene tshifhe muhulu. Maṅwalo iṱali a tshi ri, ‘U songo sema muvhusi wa lushaka lwau.’ ”

⁶ Paulo a tshi tou vhona uri kha vhanna vha khoro vhaṅwe ndi Vhasadukei vhaṅwe ndi Vhafarisei, a vhidzelela henefho khoroni a ri, “Hee vha hashu! Nṋe ndi Mufarisei o bebwaho nga Vhafarisei. Zwino ndi vhona zwenezwi zwa u sengiselwa uri ndi mini ndi tshi lavhelela u vuwa ha vhafu!”

⁷ A tshi tou ralo a vha o luṱanya Vhafarisei na Vhasadukei, khoro ya mbo ḓi fhandekana nga vhukati.

⁸ (Ndi uri Vhasadukei vha ri vhafu a vha nga vuwi, nahone a vha tendi uri hu na vharuṅwa kana mimuya, ngeno Vhafarisei vha tshi zwi tenda zwoṱhe vhuraru hazwo.)

⁹ Vilili ḽa tou ṋaṋa, vhaṅwe vhaḓivhi vha Mulayo vha tshigwada tsha Vhafarisei vha takuwa vha hanedza vha ri, “Riṋe a ri vhoni uri hoyu munna o tshinyani! Khamusi nangoho muruṅwa o amba nae – kana ho amba muṅwe muya-vho!”

¹⁰ Khani ya vhifha lwe mulangammbi a thoma u ofha uri vha ḓo fara Paulo vha mu ṱhukukanya. Ndi hone a tshi vhudza maswole awe uri vha tsele khoroni vha dzhie Paulo vha mu ise gammbani ya maswole.

¹¹ Vhusiku honoho Muṋe washu a ḓa a ima phanḓa ha Paulo a mu vhudza a ri, “U songo kulea nungo. Fhano Jerusalema wo no ḓi nṱanziela, zwino zwo fanela uri u ḓi dovha u ite nga u ralo na Roma.”

Hu tshi langanwa u vhulaha Paulo

¹² Ḽi tshi tsha nga matsheloni Majuda vha kuvhangana vha luka vhunwa; vha ana muano wa uri a vha nga ḽi tshithu kana u nwa tshithu vha sa athu vhulaha Paulo.

¹³ Vhe vha langana zwenezwo vho vha vha tshi fhira 40.

¹⁴ Ndi hone vha tshi ya ha tshifhe muhulu na vhahulwane vha lushaka vha ri, “Riṋe ro ana ra tou khwaṱhisa uri a ri nga ḽi tshithu ri sa athu vhulaha Paulo.

¹⁵ Zwino vhone na vhanna vha khoro kha vha swikise fhungo kha mulangammbi wa Muroma ḽa uri Paulo a ḓiswe, vha ḓiite sa vha no khou ṱoḓa u sengulusa mulandu wawe zwavhuḓi. Hone u ḓo wana riṋe ro mu lalela ra mu vhulaha a sa athu swika fhano.”

¹⁶ Zwino matsina ṅwana wa khaladzi a Paulo wa mutuka tshikwekwe itsho o vho ḓo tshi pfa. Ndi hone a tshi ya a dzhena gammbani ya maswole a sevha Paulo eneo mafhungo.

¹⁷ Paulo a vhidza muṅwe mulangagomane a mu vhudza a ri, “Kha vha swikise hoyu muṱhanngana kha mulangammbi; u na zwine a funa u mu vhudza.”

¹⁸ Mulangagomane a mu dzhia a mu swikisa kha mulangammbi, a ri, “Paulo uḽa wa tshivhotshwa o mmbidza a nkhumbela uri ndi swikise hoyu muṱhannga kha vhone; hu na zwine a funa u vha vhudza.”

¹⁹ Mulangammbi a mu fara nga tshanḓa a ela nae thungo a mu vhudzisa a ri, “Ndi mini zwine na khou ṱoḓa u mmbudza muṱhannga?”

²⁰ Ene a fhindula a ri, “Vhahulwane vha Majuda vho langana u humbela vhone matshelo uri vha ḓise Paulo zwi tshi tou nga hu na zwine khoro ya ṱoḓa u sengulusa zwavhuḓi khae.

²¹ Zwino vhone vha songo vhuya vha tenda, ngauri hu ḓo vha na vhanna vha swikaho 40 vha paḓa vha no ḓo vha vho mu lalela. Vho anela Mudzimu uri a vha nga ḽi tshithu kana u nwa tshithu vha sa athu mu vhulaha. Na zwino vho no ḓi luga kale, ho tou sala fhedzi u pfa phindulo yavho.”

²² Mulangammbi a ri, “Ni songo vhuya na vhudza muthu uri no ntsevha haya mafhungo.” A ri u ralo a litsha uḽa muṱhanngana a ṱuwa.

Paulo a tshi rumiwa ha muvhusi Felikisi

²³ Ndi hone mulangammbi a tshi vhidza vhaṅwe vhalangagomane vhawe vhavhili a ri, “Ṱavhanyani ni lugise maswole a 200 a u ya Khisaria, ni lugise na maswole a dzibere a 70 na a 200 o faraho mafumo. Nga 9 ya madekwana ni vhe no luga, ni mbo ḓi takuwa.

²⁴ Na Paulo ni mu ṋee tsha u namela, ndi pfe o swika zwavhuḓi ha muvhusi Felikisi.”

²⁵ Ndi hone mulangammbi a tshi ṅwala luṅwalo lu no ri,

²⁶ “Nṋe Klaudiosi Lisiasi ndi ṅwalela vhone thovhela muvhusi Felikisi. Ri a vusa!

²⁷ Majuda vho vha vho fara hoyu munna vha tshi ṱoḓa u mu vhulaha. Nṋe nda ri u pfa uri ndi mudzulapo wa Roma nda ya nda mu lamukisa ndi na maswole anga.

²⁸ Zwino nge nda tama u pfa uri vha ri o tshinyani, nda tsela nae khoroni yavho.

²⁹ Ndi hone ndi tshi wana uri a hu na tshe a ita tsho eḓanwaho nga lufu, naho hu u tou hoṋelwa dzhele zwaho; mulandu wo vha wo bva kha khani vha tshi khou ṱaṱisana nga mulayo wavho.

³⁰ Zwino ndo ri u pfa uri vha khou mu langana, nda vhona uri ndi khwiṋe ndi tshi mu ruma ngeo kha vhone; na vhahweleli vhawe nda vha vhudza uri mulandu wawe ndi khwiṋe vha tshi u hwedza henengeo.”

³¹ Maswole vha ita zwenezwo zwe vha vhudzwa. Vhusiku honoho vha dzhia Paulo vha lala vho swika nae Anthiphathrisi.

³² Nga matshelo maswole a tshimbilaho nga milenzhe vha humela gammbani vha sia vha dzibere vha tshi khou fhirela nae phanḓa.

³³ Maswole vha tshi swika Khisaria vha ṋea muvhusi luḽa luṅwalo, vha mu kumedza na Paulo.

³⁴ Muvhusi o no lu vhala a vhudzisa Paulo uri u bva kha vundu ḽifhio. A tshi pfa uri u bva Kilikia,

³⁵ a ri, “Mafhungo aṋu ndi ḓo a pfa zwenezwo vhahweleli vhaṋu vha tshi swika.” Ndi hone a tshi ṋea ndaela ya uri Paulo a dzule o lindwa pfamoni ya Herude.