MISHUMO 22 - BIVHILI KHETHWA Mafhungo Madifha

¹ “Vhanna vha hashu, vhokhotsi na vhakomana, zwino nthetsheleseni ndi tshi ḓifhindulela!”

² Vha tshi pfa a tshi amba nga Tshiheberu, vha mbo ḓi tou fhumula tshoṱhe, Paulo a konou isa phanḓa a ri:

³ “Nṋe ndi Mujuda o bebwaho Tharasisi kha ḽa Kilikia, hone nda aluswa henefhano Jerusalema ndi mufunziwa wa Gamaliele. Mulayo wa vhomakhulukuku washu nda u funzwa nda si siedze, ndó ḓikumedza Mudzimu sa inwi noṱhe zwino.

⁴ Vhathu vho faraho hei nḓila ndo vha tovhola uri vha vhuye vha tou vhulawa. Nda fara vhanna na vhasadzi ndi tshi vha hoṋela dzhele.

⁵ Tshifhe muhulu na khoro yoṱhe ya lushaka ndi ṱhanzi dzanga vhunga vhe vhone vhe vha nṋea maṅwalo o ṅwalelwaho Majuda vha hashu vha re Damasko. Nangoho nṋe nda ya uri ndi fare Vhakhriste ndi vhuye navho Jerusalema vho vhoxwa uri vha wane ṱhamu.

Paulo a tshi anetshela zwa u rembuluwa hawe

⁶ “Musi ndi nḓilani, ndi tshi vho hovhelela Damasko, masiari tshivhangalala kathihi fhedzi nda penyelwa nga tshedza tshihulu tshi tshi bva ṱaḓulu, tsha tou mputela.

⁷ Nda wela fhasi nda pfa ipfi ḽi tshi ri, ‘Saulo! Saulo! U ntovholelani?’

⁸ Nṋe nda fhindula nda ri, ‘Muṋe wanga, ndi khou amba na nnyi?’ A mphindula a ri, ‘Ndi Nṋe Yesu wa Nazaretha ane wa mu tovhola.’

⁹ Vhanna vhe nda vha ndi navho vha sokou vhona tshedza, hone vha si pfe zwine ipfi ḽa amba.

¹⁰ Nṋe nda vhudzisa nda ri, ‘Zwino ndi iteni Muṋe wanga?’ Muṋe washu a fhindula a ri, ‘Vuwa u dzhene Damasko. Ndi hone hune wa ḓo vhudzwa zwoṱhe zwine Mudzimu a ṱoḓa u tshi ita.’

¹¹ Zwino vhunga tshiḽa tshedza tsho vha tsho mpofudza nga lupenyo lwatsho, nda dzhena Damasko khonani dzanga dzo no tou mpfara nga tshanḓa.

¹² “Henefho ho vha hu na muṅwe munna a no pfi Ananiasi, muthu a ofhaho Mudzimu, a tevhedzaho Mulayo, a huliswaho nga Majuda vhoṱhe vha dzulaho henefho.

¹³ A ḓa a ima tsini hanga a ri, ‘Paulo murathu wanga, dovhani ni vhone!’ Kathihi fhedzi nda mbo ḓi dovha nda vhona, nda mu lavhelesa.

¹⁴ A dovha a ri, ‘Mudzimu wa vhomakhulukuku washu o ni nanga uri ni ḓivhe zwauri zwine a funa ndi zwifhio na uri ni vhone Muḓinḓa wawe muvhuya, ni mu pfe a tshi amba nga mulomo wawe.

¹⁵ Ni ḓo vha ṱhanzi yawe ine ya ḓo vhudza vhathu vhoṱhe zwe na zwi vhona na zwe na zwi pfa.

¹⁶ Zwino ni kha ḓi lengelani? Takuwani ni lovhedzwe, ni ṱanzwiwe vhutshinyi haṋu ni tshi khou mu rabela!’

Paulo a tshi ruṅwa kha vhannḓa

^17-18 “Zwino ndó no vhuelela Jerusalema, ndi tshi khou rabela thembeleni nda pfa ndi Muyani, nda vhona Yesu henefho, a tshi khou amba na Nṋe a tshi ri, ‘Ṱavhanya u ṱuwe hafhano Jerusalema ngauri vhathu a vha nga ṱanganedzi zwine wa ḓo ṱanzilela nga Nṋe.’

¹⁹ Nṋe nda fhindula nda ri, ‘Muṋe wanga, hufha vhathu vha tshi zwi ḓivha zwavhuḓivhuḓi uri nṋe ndo vha ndi tshi ya sinagogoni nda fara vhane vha u fulufhela nda vha rwa!

²⁰ Na zwiḽa malofha a ṱhanzi yau Stefane a tshi shululwa nṋe ndo vha ndi hone, ndi tshi zwi takalela! Na zwiambaro zwa vhavhulahi vhawe, mulindi wazwo o ḓi vha nṋe.’

²¹ Muṋe washu a fhindula a ri, ‘Nṋe ndi ri ṱuwa! Ndi kha ḓi ḓo u ruma ngei kule-kule kha vhannḓa!’ ”

Paulo na mulangammbi wa Muroma

²² Paulo a amba u swika henefho vhathu vho ḓi thetshelesa. Huno vha tshi pfa a tshi ralo vha thoma u zhamba vha tshi ri, “A ri tsha funa na u mu vhona, kha a vhulawe! Tshithu tsho raliho ndi khwiṋe tshi tshi fa!”

²³ Vha zhamba vha tshi gidima vha tshi bvula zwiambaro zwavho, vha tshi phusula na mabuse,

²⁴ mulangammbi wa Muroma a vhudza vhathu vhawe uri vha dzhenise Paulo gammbani ya maswole, vha mu rwe nga nnzi uri a vha vhudze uri ndi mini Majuda vha tshi khou mu ṱavhela mukosi.

²⁵ Musi vha tshi khou mu vhamba uri a rwiwe, Paulo a amba na mulangagomane o imaho henefho a ri, “Nṋa mulayo no u wanafhi wa u rwa mudzulapo wa Roma a songo vhuya a thoma u sengiswa ha wanala mulandu wawe?”

²⁶ Mulangagomane a tshi pfa a tshi ralo, a ya kha mulangammbi a ri, “Nṋa vha ṱoḓa u ri vhonisani vhone? Munna hoyu ndi mudzulapo wa Roma!”

²⁷ Ndi hone mulangammbi a tshi ya kha Paulo a ri, “Inwi, dzonu mmbudza! Atsina inwi ni mudzulapo wa Roma?” Paulo a fhindula a ri, “Ndi zwone!”

²⁸ Mulangammbi a ri, “Nṋe uri ndi vhe mudzulapo wa Roma ndo tou thoma nda bvisa tshelede i si na vhukono.” Paulo a ri, “Nṋe-ha ndo tou bebwa ndo ralo.”

²⁹ Zwenezwo vhaḽa vhanna vhe vha vha vha tshi ṱoḓa u sengulusa Paulo vha mbo ḓi zwi litsha; na uḽa mulangammbi a tshi pfa uri uyo munna we a mu vhofha ndi mudzulapo wa Roma, a thoma u dzhenwa nga nyofho.

Paulo a tshi sengiswa nga Khoro ya Majuda

³⁰ Mulangammbi nga u funa u ḓivha uri vhukumakuma Majuda vha khou ri Paulo o tshinyani, nga matshelo a bvisa Paulo dzhele, a ri vhotshifhe vhahulwane na Khoro yoṱhe ya Majuda vha kuvhangane. A konou dzhia Paulo a mu imisa phanḓa havho.