MIRERO 8 - BIVHILI KHETHWA Mafhungo Madifha

Zwivhuya zwine Vhuṱali ha ṋea muthu

¹ Kani Vhuṱali a vhu ngi mufumakadzi a no khou vhidzelela? Ṱhalukanyo a i khou huwelela kani?

² Vhu miṱumbani ya zwikwara, tsini ha nḓila, ho ima mafhandeni a dzinḓila.

³ Vhu tsini ha mafhoro a miḓi; vhu miṋangoni, vhu huwelela ha ri,

⁴ “Hee inwi vhanna, ndi khou ni vhidzelela, ndi khou vhidza inwi vhathu noṱhe!

⁵ Inwi ni si na nzhele, ivhani na nzhele, inwi matsilu, wanani ṱhalukanyo!

⁶ Edzonu tshete ndi ni vhudze mafhungo mahulwane, ndi ḓo amba zwi re zwone.

⁷ Zwine nda amba ndi ngoho fhedzi, ndi ila u amba vhuvhi.

⁸ Maipfi oṱhe ane nda amba a a fulufhedzea, a hu na ḽo shandeaho, a hu na ḽo kombamaho;

⁹ o tou tswititi kha ane a a ṱalukanya, kha a re na nḓivho a a pfala.

¹⁰ Nangani ndayo dzanga ni litshe siliva, ni nange nḓivho ni litshe musuku.

¹¹ Vhuṱali vhu fhira nungu dza mutengo muhulu; kha zwoṱhe zwine zwa takadza a hu na tshi vhambedzwaho naho.

¹² “Nṋe Vhuṱali ndi dzula na maano, ndi kona u elekanya nga vhuronwane.

¹³ U ofha Mune washu ndi u vhenga vhuvhi; ndi vhenga u ḓihudza na u ḓiḓivha, na maitele mavhi, na nyambo dzo bvaho nḓilani.

¹⁴ Ndi nṋe ane nda ni ṋea nyeletshedzo na vhuṱali vhukuma, ṱhalukanyo ndi nṋe, ndi nṋe a re na maanḓa.

¹⁵ Mahosi a vhusa nga nṋe, vhavhusi vha konou vhea milayo i ladzaho shango;

¹⁶ vhahulwane vha vhusa nga nṋe, ndi ita uri magota a vhuse ḽifhasi.

¹⁷ Ndi funa vhane vha mpfuna, vhane vha nṱoḓa nga nungo dzoṱhe vha a nngwana.

¹⁸ Ndi ṋea vhathu lupfumo na khuliso, vha wana lupfumo lu sa fheli zwa vha nakela.

¹⁹ Mutshelo wanga u fhira musuku u songo vangwaho, khaṋo yanga i fhira siliva yó tou nanguludzwa.

²⁰ Hune nda tshimbila ndi sia mulalo, hune nda swika ndi ḓa na khaṱhulo mbuya.

²¹ Vhane vha mpfuna ndi vha kovhela lupfumo, nda lu khokha maḓuluni avho.

²² “Muṋe washu o ranga nga u sika nṋe; ndi wone mushumo wawe wa u ranga wa zwe a ita kale.

²³ Ndo vhumbwa kale-kale, u rangani, shango ḽi sa athu vha hone.

²⁴ Ndo bebwa malwanzhe a sa athu vha hone, hu sa athu vha na zwisima zwo ḓalaho maḓi,

²⁵ thavha dzi sa athu tikwa, zwikwara zwi sa athu bebwa,

²⁶ Mudzimu a sa athu sika ḽifhasi na midavhi yaḽo, na mavu na maṱukuṱuku a sa athu vha hone.

²⁷ Ndo vha ndi hone a tshi adza ḽiṱaḓulu a tshi ṱharamudza vhusendekamisi nṱha ha lwanzhe,

²⁸ musi a tshi vhea makole lutomboni, a tshi phula zwisima zwa mativha mahulu,

²⁹ musi a tshi vhea mukano wa lwanzhe, uri maḓi a si pfuke mulayo wawe, a tshi tea ḽifhasi

³⁰ ndo vha ndi nae ndí mutsila wawe. Ndo vha ndi tshi mu takadza misi yoṱhe, ndi tshi ḓiphiṋa ndi nae,

³¹ ndi tshi ḓiphiṋa nga shango ḽe a sika, ndi tshi takadzwa nga vhathu.

³² “Zwino-ha vhananga, thetshelesani ndi ni vhudze: Vha na mashudu vhane vha kanda nḓilani dzanga.

³³ Thetshelesani ndayo dzanga ni ṱalifhe, ni songo dzi nyadza.

³⁴ U na mashudu ane a nthetshelesa, ane a dzula o linda khoro dzanga, o nndindela muṋangoni.

³⁵ Ane a nngwana o wana vhutshilo, u ḓo takalelwa nga Muṋe washu;

³⁶ ane a si nngwane ene u a ḓihuvhadza, vhane vha mmbenga vha funa lufu.”