MIRERO 6 - BIVHILI KHETHWA Mafhungo Madifha

Khunḓa dzi no fasha mushaanzhele: U ḓivhofha u vha mulifheli

¹ Ṅwananga, arali wo ḓivhofha u lifha mulandu wa muṅwe, wa ana wa ri u ḓo lifha mulandu wawe une a nga ita,

² wa tshenuwa wó fashwa nga zwe wa amba, wó ḓifasha nga maipfi au,

³ ḓivha uri wo wela zwanḓani zwa muṅwe. Zwenezwo ita hezwi ṅwananga, uri u kone u ḓivhofholola: Iya khae u ḓisole, u mu luvhelele uri a u vhofholole.

⁴ U songo vhuya wa eḓela, u songo vhuya we khofhe zhambu,

⁵ u sa athu ḓivhofholola unga ntsa yo ponyoka muzwimi, unga tshiṋoni tsho ponyoka tshikwekweni tsha murei.

Vhubva

⁶ Mubva ndiwe, edzou sedza lusunzi, edzou sedza maitele alwo u ṱalifhe:

⁷ A lu na mulangi, a lu na muingameli, a lu na muvhusi,

⁸ naho zwo ralo lu ḓivhulungela mbuvha tshilimo, lwa ḓikuvhanganyela zwiḽiwa zwalwo nga tshifhinga tsha khaṋo.

⁹ Mubva ndiwe, u ḓo lala u swika lini? U ḓo vuwa lini khofheni dzau?

¹⁰ “Khofhenyana nandi, ndi tou zhambu kathihi, ndi ḓikuvhatedze ndi awelenyana!”

¹¹ Ndi hone vhushai vhu tshi u ḓela unga ḽivemu ḽi na thonga, vhusiwana ha u ḓela unga muhali o kungelaho zwihali.

Mudziavhukwila

¹² Muthu ane a enda a tshi shanda mafhungo nga lulimi lwawe ndi muthu muvhi a sa ḓivhalei.

¹³ Ú sinyedza nga maṱo, a ita na u kwetedza nga ṋayo, a sumba nga minwe;

¹⁴ u dzula a tshi luka vhunwa nga mbilu yawe, a endela u luṱanya vhathu.

¹⁵ Onoyo ha nga lengi u welwa nga khombo, kathihi fhedzi u ḓo pwashekanywa lu sa lafhei.

Zwithu zwiṱanu na zwivhili zwine Muṋe washu a zwi nengwa

¹⁶ Hu na zwithu zwiṱanu na tshithihi zwine Muṋe washu a zwi vhenga; zwine zwa mu nengisa zwi swika zwiṱanu na zwivhili:

¹⁷ ndi maṱo a u ḓihudza, ndi lulimi lwa u zwifha, ndi zwanḓa zwi no shulula malofha a vhathu vha si na mulandu,

¹⁸ ndi mbilu i no luka maano mavhi, ndi milenzhe i no gidimela vhuvhini,

¹⁹ ndi ṱhanzi i si ya ngoho i no amba mazwifhi, ndi muthu a no luṱanya vhana vha munna.

Vhupombwe

²⁰ Ṅwananga, vhulunga ndayo dza khotsi au, u songo nyadza pfunzo ya mme au;

²¹ i vhulunge mbiluni misi yoṱhe, i kungele mukuloni wau;

²² u tshi tshimbila, i ḓo u endedza, wó lala i ḓo u londola, u tshi vuwa i ḓo davhidzana na iwe.

²³ Milayo ndi luvhone, pfunzo ndi tshedza, u kaidzwa na u laiwa ndi yone nḓila ya vhutshilo;

²⁴ zwi u tsireledza kha musadzi muvhi, uri musadzi a si wau a si u fashe nga haṋwani hawe ha u ḓifha.

²⁵ Mbilu yau i songo tama lunako lwawe, u songo tenda a tshi u kunga nga u u sinyedza;

²⁶ musadzi wa phombwe u rengwa nga mukonde wa vhurotho, hone musadzi wa muṅwe u lixwa nga ṱhoho yau.

²⁷ U nga okela mulilo khanani nguvho dzau dza si swe naa?

²⁸ U nga tshimbila nṱha ha masimbe ṋayo dzau dza si rungunye naa?

²⁹ Zwo ralo kha muthu a no ya kha musadzi a si wawe: ane a mu kwama a nga si kundwe u lifhedzwa.

³⁰ A ri nyadzi fobvu arali ḽi tshi tswiswa nga nḓala,

³¹ hone arali ḽa farwa ḽi ḓo lifha kaṱanu na kavhili; ḽi ḓo lifha ḽa sala ḽi si na tshithu.

³² Ane a ita vhupombwe ene ha na ṱhalukanyo; ane a vhuya a ralo u a ḓivhulaha.

³³ U ḓo vha na mbonzhe a nyadzea; ṱhoni dzawe dzi nga si phumulwe.

³⁴ A hu na tshi no sinyusa munna u fhira u pwashelwa muḓi; a tshi lifhedza ha tsha khathutshela;

³⁵ ha tsha tenda tshipfumelo; tshifhiwa naho tshi tshingafhani a tshi mu rudzi mbilu.