MIRERO 5 - BIVHILI KHETHWA Mafhungo Madifha

U ila vhupombwe

¹ Ṅwananga, thetshelesa ndi tshi u vhudza zwe nda vhona, ipfa ndi tshi u eletshedza,

² uri u vhe na vhuronwane, zwine wa amba zwi sumbe nḓivho.

³ Milomo ya musadzi wa phombwe i ela mutoli, haṋwani hawe hu suvhelela u fhira mapfura,

⁴ a fhedza nga u kalakata unga lunungwane, a halifha unga banga ḽa mutsheahoṱhe.

⁵ U ḓo u hwala a u tsisela lufuni, o livha vhudzulavhafu.

⁶ Nḓila dzi isaho vhutshiloni ha dzi londi, u sokou tendeleka a sa ḓivhi hune a ya.

⁷ Zwino iwe ṅwananga, nthetshelese, u songo pambuwa kha zwine nda u vhudza:

⁸ Mu shavhe, u vhe kule nae, u songo vhuya wa sendela tsini na vothi ḽa nnḓu yawe,

⁹ hu sa vho ḓo huliswa vhaṅwe, iwe wa nyadziwa, maanḓa au a vho ḓo fhedzwa nga wa tshiṱuhu,

¹⁰ vhatsinda vha ḽa lupfumo lwau, tsha biko ḽau tsha pfumisa mutsinda,

¹¹ wa vho fa u tshi gomela, ṋama yau na muvhili zwo ṱahala,

¹² wa vho ri, “Ndo ḓiitelani khundavhalai? Mbilu yanga yo nyadzelani u kaidzwa?

¹³ Ndo nyadza vhafunzi vhanga vha tshi nndaya, vha tshi mpfunza nda konyolela matanda nḓevheni!

¹⁴ Ndo ṱoḓou lovha ndi ṱano!”

Funa musadzi wau

¹⁵ A u vhoni ṅwananga, iwe inwa maḓi a bvaho tshisimani tshau, ane a gubunyea á songo dzikuswa nga muṅwe.

¹⁶ Kani u tama zwisima zwau zwi tshi ela na shango, maḓi a milambwana yau a ṱuwa na gondo?

¹⁷ Nga zwi vhe zwau u woṱhe, u songo ṱanganelana na vhatsinda.

¹⁸ Tshisima tshau nga tshi shudufhadzwe, u takalele musadzi we wa mu vhinga u tshee nga hau.

¹⁹ O naka sa ntsana, u tamisa sa ngululu. Ngavhe lunako lwawe lu tshi u nyanyula misi yoṱhe, a dzula o thuba mbilu yau.

²⁰ Ṅwananga, ndi mini mbilu yau i tshi nga thubwa nga musadzi wa phombwe, wa kuvhatedzana na musadzi a si wau?

²¹ Nḓila dza muthu dzi ḓivhiwa nga Muṋe washu, u sedza hoṱhe hune a tshimbila.

²² Muvhi u fashwa nga vhuvhi hawe, u vhoxwa nga nnzwa dza vhutshinyi hawe;

²³ u vhulawa nga u shaya mulayo, a xedzwa nga vhutsilu hawe vhuhulu.