MIRERO 4 - BIVHILI KHETHWA Mafhungo Madifha

Vhuṱali, lwone lupfumopfumo

¹ Inwi vhana, thetshelesani ndayo dza khotsi, ni kolongonye nḓevhe uri ni wane ṱhalukanyo;

² ndi ni ṋea ndayo dzavhuḓi, ni songo furalela pfunzo yanga.

³ Zwiḽa ndi tshee mutukana muṱani wa khotsi anga, ndi tshi kha ḓi vha mutete, ndi tshee ṅwana muthihi fhedzi wa mme anga,

⁴ khotsi anga vho mpfunza vha ri, “Mbilu yau nga i nambatele maipfi anga, vhulunga ndayo dzanga, ndi hone u tshi ḓo tshila.

⁵ Wana vhuṱali, wana ṱhalukanyo; u songo hangwa zwine nda amba, u songo zwi nyadza.

⁶ U songo furalela vhuṱali, vhu ḓo u tsireledza; vhu fune, vhu ḓo u londola.

⁷ Tshi no fhira zwoṱhe ndi vhuṱali; vhona uri u vhu wane, renga ṱhalukanyo nga zwoṱhe zwine wa vha nazwo.

⁸ Vhu vhone vhu tshi lilelwa, ndi hone vhu tshi ḓo u hulisa ha u gagamisa; arali wa vhu kuvhatedza vhu ḓo u tonda;

⁹ vhu ḓo u ambadza tshiala ṱhohoni, ha u ṋea khare ya vhugala.”

Vhuṱali, yone nḓila i sa ofhisi

¹⁰ Ṅwananga, thetshelesa u ṱanganedze maipfi anga, ndi hone u tshi ḓo lalama.

¹¹ Ndi ḓo u funza nḓila ya vhuṱali, nda u endedza kha nḓilatswititi.

¹² U tshi tshimbila a u nga kundwi, u tshi gidima a u nga khukhulwi.

¹³ Nambatela ndayo dzi si u ṱutshele, dzi londole, dzi ḓo u ṋea vhutshilo.

¹⁴ U songo kanda nḓilani ya vhavhi, kana wa fara ya vho furalelaho Mudzimu.

¹⁵ I tinye, u si tshimbile khayo, pambuwa khayo u i fhire.

¹⁶ Vhone a vha lali vha songo tshinya, a vha fari khofhe vha sa athu bidigamisa muthu.

¹⁷ Vhuvhi ndi tshone tshiḽiwa tshavho, vhupondi ndi yone waini yavho.

¹⁸ Nḓila ya vha no fulufhedzea yone i nga tshedza tsha maḓautsha, tshine tsha ḓi penya tshi tshi ya u swika masiari tshivhangalala.

¹⁹ Hone nḓila ya vhavhi i nga swiswi ḽihulu, a vha ḓivhi tshine tsha vha khukhula.

Vhuṱali, hone muṋei wa vhutshilo

²⁰ Ṅwananga, kolongonya nḓevhe u pfe maipfi anga, u tshingamisele nḓevhe kha zwine nda amba.

²¹ Maipfi anga a songo u ponyoka, a vhulunge mbiluni yau;

²² ane a a wana, a mu ṋea vhutshilo, na muvhili wawe wa takala woṱhe.

²³ Tshihulwane tshi no fhira zwoṱhe, linda mbilu yau, ndi yone i no vhumba vhutshilo hau.

²⁴ Nyambo dza vhumbulu dzi songo pfala mulomoni wau, zwiambo zwa vhufhura nga zwi vhe kule na iwe.

²⁵ Maṱo au nga a sedze phanḓa, u ṱalele zwi re phanḓa hau.

²⁶ Dzula wo dzudzanya nga vhuronwane zwine wa ita, ndi hone zwoṱhe zwi tshi ḓo u nakela.

²⁷ U songo pambutshela kha tshauḽa kana tsha monde, tinya vhuvhi hoṱhe.