MIRERO 31 - BIVHILI KHETHWA Mafhungo Madifha

U laya khosi

¹ Idzi ndi ndayo dze khosi Lemuele wa Masa a laiwa nga mme awe. Vho ri:

² Iwe ṅwananga, iwe ṅwananga we nda tou mu beba, iwe ṅwananga we nda mu wana nga thabelo,

³ u songo fhedza nungo dzau nga vhasadzi; maanḓa au a songo fhelela khavho, ndi vhone vhane vha lozwa mahosi.

⁴ Lemuele, u songo ḓikumedza waini nandi, hezwo a zwo ngo tea khosi; a zwo ngo tea khosi u lilela halwa.

⁵ A nga ḓo ri u nwa a hangwa zwine mulayo wa amba, a vho kundisa vho kandeledzwaho u wana pfanelo dzavho.

⁶ Halwa vhu fhiwe vha no khou lovha, waini i fhiwe vha no khou ḽa mbilu,

⁷ vha nwe vha hangwe vhushai havho, vha si tsha dovha vha elelwa u tambula havho.

⁸ Ambela vha sa koni u ḓiambela; lwela pfanelo dza vha sa koni u ḓilwela.

⁹ Vha ambele, u haṱule u sa ṱaluli, lwela pfanelo dza vhashai na vhaheḓana.

Musadzisadzi

¹⁰ Musadzisadzi a nga wanwa nga nnyi? Mutengo wawe u fhira wa nungu kule.

¹¹ Munna wawe u a mu fulufhela tshoṱhe, ha na tshivhuya tshine a tshi shaya.

¹² Musadzi wawe u mu itela zwivhuya fhedzi maḓuvha oṱhe a vhutshilo hawe, zwi si zwi huvhadzaho.

¹³ U nanguludza ulu na muḓali, a shuma nga zwanḓa zwawe zwo takala.

¹⁴ U nga zwikepe zwa vhavhambadzi, a tshi vhuya na zwiḽiwa zwawe zwi no bva kule.

¹⁵ U fhinduwa hu tshee hee nzwii, a bikela muṱa wawe zwiḽiwa, a avhela na vhashumi vhawe vha vhasidzana.

¹⁶ U vhamba maano a renga tsimu, a limisa tsimu ya minḓirivhe nga malamba awe.

¹⁷ Ndi mushumi wa biko, zwanḓa zwawe zwi na nungo, zwi kona u shuma.

¹⁸ U vhona uri zwine a shuma zwi a mu vhuedza, luvhone lwawe lu lala lu tshi duga.

¹⁹ U hoṱa muḓali, a luka masila.

²⁰ U putulula tshanḓa tshawe a pakulela vhashai, a ṋea vhaheḓana zwine vha zwi shaya.

²¹ Musi mahaḓa a tshi wa, ha ofhi tshithu, hufha vha muṱa wawe vhoṱhe vho ambara tswuku.

²² U luka masila a u pila mmbete wawe; ene o ambara muḓali na dza muridili.

²³ Munna wawe u a huliswa khoroni ya muḓi hune a dzula na vhahulwane vha shango.

²⁴ Musadzi uyo u luka masila a muḓali a a rengisa, a rengisela vhavhambadzi masila a u atha.

²⁵ O ambara nungo na vhugala, ha ofhi zwa maḓuvha a ḓaho.

²⁶ A tshi amba u sumbedza vhuṱali; lulimini lwawe hu na ndayo dzi fulufhedzeaho.

²⁷ U sedza mafhungo a muṱa wawe; ha dzuli nga zwanḓa.

²⁸ Vhana vhawe vha a mu khoḓa vha ri u na mashudu; na munna wawe u ralo, a ri,

²⁹ “Vhasadzi vhanzhi vha ita zwihulu, hone inwi ni vha fhira vhoṱhe!”

³⁰ Lunako lu a fhura, lu a fhufha lwa fhira, huno a no fanela u khoḓiwa ndi musadzi a ofhaho Muṋe washu.

³¹ Nga a ṋewe pfufho yo mu teaho; nga a khoḓwe khoroni ya muḓi, a tshi khoḓelwa zwe a shuma!