MIRERO 30 - BIVHILI KHETHWA Mafhungo Madifha

Mirero ya Aguru

¹ Iyi ndi mirero ya Aguru, ṅwana wa Jake, wa Masa. U ri: Mudzimu, ndo ḓinetisa, ndo ḓinetisa nda vhuya nda kulea nungo.

² Nṋe a thi ngi muthu, ndi tou nga phukha; ndi shaya ṱhalukanyo ya muthu.

³ A tho ngo guda vhuṱali nda swika hune nda ḓivha Ene Mukhethwa.

⁴ Ndi nnyi we a gonya makoleni a dovha a tsela fhasi? Ndi nnyi we a puta muya nga zwanḓa? Ndi nnyi we a putela maḓi mahulu nga nguvho yawe? Ndi nnyi we a tea migumo ya ḽifhasi? Dzina ḽawe ndi nnyi? Murwa wawe u pfi nnyi? Ane a zwi ḓivha nga a mmbudze!

⁵ Maipfi oṱhe a Mudzimu o ḓi wanala e a ngoho; ndi tshiṱangu tsha vhane vha dzumbama ngae.

⁶ U songo engedza maipfi awe, a sa ḓo u kaidza, wa vhonala uri u mudzia-u-zwifha.

U wana zwo eḓanaho

⁷ Muṋe washu, ndi humbela zwithu zwivhili fhedzi, u songo nnzima zwone ndi tshi kha ḓi tshila:

⁸ Itou nnyilisa vhufhura na mazwifhi; u songo mpha vhushai kana lupfumo, u mphe zwiḽiwa zwanga zwo nnyeḓanaho fhedzi,

⁹ ndi sa ḓo vha na zwinzhisa nda vho u ṱamba, nda vho ri, “Yahavee ndi nnyi?” kana nda vha mushai nda vho tswa, u ralo nda vha ndo nyadzisa dzina ḽa Mudzimu wanga.

Miṅwe mirero ya Aguru

¹⁰ U songo sasaladza mushumi u tshi vhudza muṋe wawe, a sa ḓo u teketela wa vho zwi lifha.

¹¹ Hu na vhane vha teketela vhokhotsi avho, vha si ambe vhomme avho zwavhuḓi;

¹² vha vhona unga vho kuna, ngeno vho kumala;

¹³ vha dzula vha tshi ḓihudza, vha sedza vhaṅwe nga lunyadzo;

¹⁴ maṋo avho ndi mapanga, ṱhaha dzavho dzo khuba phanga; vha ḽa vhashai fhano fhasi, vha fhedza vhaheḓana vhukati ha vhathu.

Mirero ya dzimbalo

¹⁵ Gulula ḽi na vhana vhavhili vha vhasidzana, vha pfi Mphe na Mphe. Hu na zwithu zwiraru zwi sa furi, na tsha vhuṋa tshi sa vhuyi tsha ri, “Zwo eḓana.”

¹⁶ Ndi tshalo, ndi thumbu ya muumba, ndi shango, a ḽi furi maḓi, ndi mulilo, a u vhuyi wa ri, “Zwo eḓana!”

¹⁷ Iṱo ḽi no sinyedza khotsi, ḽa nyadza ndayo dza mme, ḽi ḓo nongolwa nga mahunguvhu, ḽi ḓo ḽiwa nga maanga.

¹⁸ Hu na zwithu zwiraru zwine zwa nkanukisa, na tsha vhuṋa tshine nda si tshi ṱalukanye:

¹⁹ Ndi nḓila ya goni ḽi tshi fhufha makoleni, ndi nḓila ya ṋowa luwani, ndi nḓila ya tshikepe lwanzheni luhulu, ndi nḓila ya munna a tshi funana na musidzana.

²⁰ Maitele a musadzi wa phombwe khea: U ri u ita vhupombwe a ṱamba, a ri, “A tho ngo tshinya tshithu!” – zwa nga u ḽa zwiḽiwa wa phumula milomo.

²¹ Hu na zwithu zwiraru zwi no dzinginyisa shango, na tsha vhuṋa tshi sa konḓelelei:

²² ndi phuli i tshi vho vha khosi, ndi tsilu ḽi tshi ḽa ḽa fura,

²³ ndi musadzi a sa funwi a tshi vho vhingwa, ndi phuli ya musidzana i tshi vho vha mufumakadzi.

²⁴ Hu na zwithu zwiṋa zwiṱuku fhano shangoni, hone zwi na vhuṱali vhuhulu:

²⁵ ndi vhusunzi, zwikhokhonono zwi si na nungo, hone vhu kuvhanganya zwiḽiwa zwaho tshilimo;

²⁶ ndi mbila, zwipuka zwi si na nungo, hone dzi fhaṱa mahaya adzo nngwani;

²⁷ ndi nzie, a dzi na khosi, hone dzi fhufha dzo ita lutsinga dzo tevhekana;

²⁸ ndi tswina, u nga ḓi i fara nga tshanḓa, hone i dzula na pfamoni dza mahosi.

²⁹ Hu na zwithu zwiraru zwine zwa tamisa zwi tshi tshimbila, na tsha vhuṋa tshine tsha tshimbila tshihulwane:

³⁰ ndi ndau, tshone tshivhanda tsha maanḓa, tshi sa ofhi tshithu;

³¹ ndi mukukulume u no tshimbila wo ragalala; ndi mbokoṱo; ndi khosi yo tangwa nga mmbi yayo.

³² Arali wo ḓiita tsilu nga u ḓihudza, kana wo tanda ḽi sa fukwi, ḓibomodze mulomo!

³³ Wa phophisa mafhi hu sala makheṱhe; wa rwa muṅwe ningo u bva mikota; sa zwenezwo wa ṱunga muthu, hu vuwa nndwa.