MIRERO 3 - BIVHILI KHETHWA Mafhungo Madifha

Vhuṱali vhu ita uri u takalelwe nga Mudzimu na vhathu

¹ Ṅwananga, u songo hangwa pfunzo yanga, mbilu yau nga i vhulunge ndayo dzanga;

² zwi ḓo engedza vhutshilo hau wa tshila miṅwaha minzhi, wa ḓi vha na mashudu.

³ Dzula u tshi funa vhathu u tshi fulufhedzea; hezwo itou zwi kungela mukuloni wau; zwi ṅwale mbiluni yau,

⁴ ndi hone u tshi ḓo vha na phungo mbuya, wa takalelwa nga Mudzimu na vhathu.

⁵ Fulufhela Mudzimu nga mbilu yoṱhe, u songo ḓitika nga nḓivho yau.

⁶ U tshi ita tshithu, ranga u humbula Ene; u ḓo u onyolosela dzinḓila.

⁷ U songo vhona unga wo ṱalifha; ofha Muṋe washu u ile vhuvhi,

⁸ ndi hone muvhili wau u tshi ḓo takala, wa pfa u na nungo.

⁹ Hulisa Muṋe washu nga lupfumo lwau, na nga zwiranzhe zwa khaṋo yau,

¹⁰ ndi hone zwiṱaṱari zwau zwi tshi ḓo ḓala zwa tou wa muwa, nkho dzau dza tou balea nga waini.

¹¹ Ṅwananga, u songo nyadza ndayo dza Muṋe washu, a tshi u kaidza u songo zwi sanda;

¹² Muṋe washu u kaidza vhane a vha funa, unga khotsi a tshi kaidza vhana vhane a vha takalela.

Vhuṱali a vhu sokou wanala

¹³ U na mashudu munna ane a wana vhuṱali, ane a kona u ṱalukanya;

¹⁴ o pfuma u fhira a re na siliva, u bindula u fhira a re na musuku.

¹⁵ Vhuṱali vhu fhira nungu dza mutengo muhulu; zwine muthu a zwi tama, na tshithihi a tshiho tshi no vhambedzwa naho.

¹⁶ Ho puta ndalamo kha tshauḽa, kha tshamonde ho puta lupfumo na khuliso.

¹⁷ Vhu u ṋea vhutshilo vhu takadzaho, wa ḓi dzula u na mulalo;

¹⁸ vhane vha vhu kuvhatedza vha vhona vhu muri u ṋeaho vhutshilo; vha na mashudu vhane vha vhu nambatela.

¹⁹ Vhuṱali ndi he Muṋe washu a sika ḽifhasi ngaho, ḽiṱaḓulu a ḽi adza nga ṱhalukanyo,

²⁰ a fhandekanya mativha nga nḓivho yawe, makole a rothisa ṅwando.

²¹ Ṅwananga, dzula wo dzivhuluwa, u vhe na vhuronwane; zwenezwo zwi songo u ponyoka,

²² zwi ḓo u ṋea vhutshilo, zwa nakisa mukulo wau,

²³ wa tshimbila u sa ofhi tshithu, mulenzhe wau wa si khukhulwe.

²⁴ Wó lala a u nga ofhi tshithu, wó eḓela u ḓo pfa u tshi ḓiphiṋa.

²⁵ U songo ofha khombo dza tshihaḓu, kana phanzi dzine dza wela vhavhi;

²⁶ Muṋe washu u ḓo vha Ene fulufhelo ḽau, u ḓo tsireledza mulenzhe wau u si fashwe.

U tshilisana nga mulalo

²⁷ U songo shaisa vhaṅwe zwivhuya zwo vha fanelaho arali zwi zwanḓani zwau.

²⁸ U songo ri u na tshithu henefho, wa vhudza muṅwe wa ri, “Tshimbila, u vhuye matshelo, ndi ḓo u ṋea.”

²⁹ U songo lukela muṅwe vhunwa, ngeno a tshi u fulufhela.

³⁰ U songo sokou pomoka muthu á songo u khakhela.

³¹ U songo tama vhutshilo ha ḽivemu, u songo vhuya wa edzisa zwiito zwawe;

³² Muṋe washu u nyala phaṱhi; vha si na vhufhura a somolana navho zwa haṋwani.

³³ Muṋe washu u teketela nnḓu ya muvhi, ya muvhuya a i shudufhadza.

³⁴ U goḓa vhagoḓi; vha ḓiṱukufhadzaho a vha itela vhuthu.

³⁵ Pfufho ya vhaṱali ndi khuliso; matsilu one a ḓo niwa nga ṱhoni.