MIRERO 29 - BIVHILI KHETHWA Mafhungo Madifha

¹ Muthu a no ri u kaidzwa lunzhi a ḓi ita tshipimbi, ha nga lengi u lozwiwa – a hu na ṅanga.

² Hu tshi thoma u vhusa vha no thetshelesa Mudzimu vhathu vha a pembela; hu tshi vhusa vhavhi vhathu vha a gomela.

³ Ane a funa vhuṱali u takadza khotsi awe; a no konana na dziphombwe u tambisa lupfumo lwawe.

⁴ Khosi i ladza shango nga khaṱhulo mbuya; a no ziamedza vhathu nga mithelo u a ḽi phusukanya.

⁵ U hoya muthu ndi u mu retshela tshikwekwe.

⁶ Muvhi u fashwa nga vhuvhi hawe; a no thetshelesa Mudzimu u fhululedza ó takala.

⁷ A no thetshelesa Mudzimu u funa vhashai vha tshi wana pfanelo dzavho; vhavhi vhone izwo a vha zwi londi.

⁸ Vhanyefuli vha vusa mufhirifhiri muḓini; vhaṱali vhone vha dzikisa mbiti.

⁹ Arali muṱali a isana tsengoni na tsilu, tsilu ḽi fhufha ḽa ṋanzwa makole, ḽa nyefula, ḽa si tendele muṅwe a tshi amba.

¹⁰ Vhane vha funesa u shulula malofha vha vhenga a sa solisei; ndi vhavhi, vha ṱoḓa ṱhoho yawe.

¹¹ Tsilu a ḽi dzumbi mbiti dzaḽo; muṱali ene u a dzi kanda.

¹² Arali muvhusi a tshi thetshelesa mazwifhi, vhakoma vhawe vhoṱhe vha vha vhavhi.

¹³ Mushai na mukandeledzi vha fana nga hezwi: Muṋe washu u vha ṋea vhutshilo vhuvhili havho.

¹⁴ Khosi i no haṱula vhashai i sa ṱaluli, i ḓo vhusa u ya ho ya.

¹⁵ Ndayo na ṱhamu zwi ṋea muthu vhuṱali; ṅwana a no ita zwine a funa u ḓo fhedza nga u shonisa mme awe.

¹⁶ Hu tshi thoma u vhusa vhavhi vhuvhi vhu a anda; vhavhuya vhone vha ḓo tshila vha vhona vhavhi vha tshi wa.

¹⁷ Laṱisa ṅwana wau; u ḓo u rudza mbilu, u ḓo u takadza.

¹⁸ Hu si na nzumbululo ya Mudzimu hu anda vhuhwarahwara; u na mashudu ane a vhulunga mulayo.

¹⁹ Phuli a i laṱiswi nga maipfi fhedzi; u pfa i a pfa, i ro sa zwi ita.

²⁰ U a mu vhona muthu a no ṱavhanyedza u amba? Onoyo zwi ḓo mu vhifhela u fhira na tsilu.

²¹ Arali wa lema phuli i tshee nga hayo, i ḓo fhedza nga u u dzhiela zwoṱhe.

²² Wa mbilwana u vusa nndwa; mudziambiti u ita zwivhi zwinzhi.

²³ A no ḓihudza u a ṱukufhadzwa; a no ḓiṱukufhadza u a huliswa.

²⁴ Ane a shumisana na fobvu u a ḓivhenga; a aniswa tsengoni u dzumba vhuṱanzi.

²⁵ U ofha muthu ndi u ḓiretshela tshikwekwe; ane a ofha Muṋe washu ene o tsireledzwa.

²⁶ Vhanzhi vha ṱoḓa u funwa nga muvhusi; khaṱhulo mbuya yone i wanala ha Muṋe washu.

²⁷ A no thetshelesa Mudzimu u nengwa a sa fulufhedzei; muvhi ene u nengwa a si na vhufhura.