MIRERO 28 - BIVHILI KHETHWA Mafhungo Madifha

¹ Muvhi u ofha swiswi ḽi si na phele; a no thetshelesa Mudzimu u nga ndau, ha ofhi tshithu.

² Ha vha na muvhango vhavhusi a vha fheli; munna wa ṱhalukanyo na nḓivho ene u ḓi vhusa.

³ Mushai a no kandeledza vhashai, u nga mvula ya mikumbela i no kumba mavhele ha wa nḓala.

⁴ Vhane vha nyadza mulayo vha khoḓa muvhi; vha no u vhulunga vhone vha lwa nae.

⁵ Muvhi ha ṱalukanyi khaṱhulo mbuya; a no ṱoḓa Muṋe washu ene u i ṱalukanya nga vhuḓalo.

⁶ Ndi khwiṋe u vha mushai u sa solisei, u fhira u vha mupfumi wa nḓila dza magombikwa.

⁷ Muṱhannga a no vhulunga mulayo u na maano; a no konana na vha sa ḓivhalei u shonisa khotsi awe.

⁸ A no andisa lupfumo nga u ḽa vhathu, u lu khokhela muṅwe a no ḓo tonda vhashai ngalwo.

⁹ Ane a konyolela matanda nḓevheni a si pfe mulayo, na thabelo dzawe dzi a nengisa.

¹⁰ Ane a xedza vha si na vhufhura u ḓo fashwa nga khunḓa yawe ene muṋe; vha sa solisei vhone vha ḓo wana ifa ḽavhuḓi.

¹¹ Mupfumi a nga vhona unga o ṱalifha; mushai a re na ṱhalukanyo ene u a mu vhonolola.

¹² Ha kunda muvhuya, vhathu vhoṱhe vha a pembela; hu tshi thoma u vhusa muvhi, vha a dzumbama.

¹³ Ane a dzumba vhutshinyi hawe a zwi mu nakeli; ane a vhu bula a vhu furalela, u khathutshelwa nga Mudzimu.

¹⁴ U na mashudu a no dzula a tshi ofha Muṋe washu; ane a ita tshipimbi ene u wela khomboni.

¹⁵ Muvhusi muvhi a tshi vhusa vha sa koni u ḓilwela, u nga ndau i vhombaho, u nga biara i na nḓala.

¹⁶ Muvhusi wa tshiṱuhu ha na ṱhalukanyo; ane a vhenga zwa u ḽa vhathu u ḓo lalama.

¹⁷ O hwalaho mulandu wa vhupondi u ḓo vha tshavhi a vhuya a fa; hu songo vha na a mu tikedzaho.

¹⁸ Wa nḓila dzi sa solisei u ḓo tsireledzwa; wa nḓila dza magombikwa ene ha lengi u wa.

¹⁹ Ane a lima tsimu yawe, u ḓo ḽa a fura; a no tevhela mahandana u ḓo fura vhushai.

²⁰ Ane a fulufhedzea u ḓo shudufhadzwa vhukuma; ane a lilela u pfuma nga tshihaḓu ha nga litshi u rwiwa.

²¹ Tshiṱalula a si tshavhuḓi; u hone muhaṱuli a no khakhiswa na nga u ṋewa kugaku kwa vhuswa.

²² Mudzia-u-dzimana u lilela u pfuma; ha ḓivhi uri vhushai ho mu lindela.

²³ Ane a kaidza muthu u ḓo takalelwa ngavhuya u fhira wa lulimi lwa muhoyo.

²⁴ Ane a tswela vhabebi a ri, “A zwo ngo khakhea!” ndi ṱhama ya phondi.

²⁵ A no lilela lupfumo u vusa nndwa; a no fulufhela Muṋe washu ene zwi ḓo mu nakela.

²⁶ Ane a ḓifulufhela ndi tsilu; a no endedzwa nga vhuṱali ha ofhi tshithu.

²⁷ A no tonda vhashai ha nga shayi tshithu; a no bonya maṱo a nga ha vha vhoni, vha a mu teketela.

²⁸ Hu tshi thoma u vhusa muvhi, vhathu vha a dzumbama; vhavhi vha tshi lovha, vhavhuya zwi a vha nakela.