MIRERO 27 - BIVHILI KHETHWA Mafhungo Madifha

¹ U songo zuwa zwa matshelo, hufha u sa ḓivhi zwine ḓuvha ḽa ḓo ḓa nazwo.

² U songo ḓikhoḓa nga wau mulomo, litsha vhaṅwe vha u khoḓe.

³ Tombo ḽi a lemela; muṱavha ndi muhwalo; u konḓelela tsilu zwi lemela u fhira na hezwo.

⁴ Mbiti dzi na tshiṱuhu; u sinyuwa ndi muḓalo wa maḓi, u a kumba; vivho ḽone ḽi nga konḓelelwa nga nnyi?

⁵ Ndi khwiṋe u kaidza muthu a tshi zwi pfa, u fhira u dzumba, wa fhumula nge wa mu funa.

⁶ Khonani i tshi u pfula mbonzhe i a u funa; swina ḽi tshi u kuvhatedza u vhone.

⁷ A no lamba mutoli ndi o furaho; a na nḓala, na tshinyai u a ḽa.

⁸ Munna ó shavha muḓi u nga tshiṋoni tsho shavha tshiṱaha.

⁹ Zwiḓolo zwi nukhelelaho u ḓifha, na zwioro, zwi takadza mbilu; vhukonani hone vhu takadza nga u eletshedzana.

¹⁰ U songo ṱamba khonani yau na ya khotsi au; wa welwa nga khombo u songo yo lilela ṅwana wa mme au; mutsinda a re tsini a nga u farisa u fhira ṅwana wa mme au a re kule.

¹¹ Ṅwananga, ivha na vhuṱali u takadze mbilu yanga, ndi hone ndi tshi ḓo kona u fhindula muṅwe na muṅwe ane a nnyadza.

¹² Wa maano u ri u vhona khombo a dzumbama; a shayaho nzhele ha humi, u lifha nga ṱhoho yawe.

¹³ Mutsinda ane a ḓivhofha u lifha mulandu une muṅwe a nga ita, nga a dzhielwe nguvho, ha ḓivhiwi.

¹⁴ Ane a resha muṅwe nga u ṱavha mukosi maḓautsha, u ḓo pfi u khou mu teketela.

¹⁵ Musadzi wa luambo u nga ṱhanga i no sokou tho, tho, tho, musi wa mvula;

¹⁶ u tshi mu kaidza uri a fhumule zwi nga u thivha muya, zwi nga u puta ole nga tshanḓa.

¹⁷ Tsimbi dzi a ṱuṱulana; vhathu vha a fhaṱana.

¹⁸ Ane a londola muhuyu u ḓo fula mahuyu awo; a no londola muṋe wawe u ḓo huliswa.

¹⁹ Ri ḓivhona tshifhaṱuwo sambeloni ḽa maḓi; tshivhoni tsha muthu tshone ndi mihumbulo yawe.

²⁰ Lufu na ndozwo a zwi furi; na maṱo a muthu o ralo, ha furi.

²¹ Siliva i bviswa manyelo nga khali ya tsimbi, tsha musuku ndi ṋanḓo; muthu ene u ḓihwa nga phungo kana bvumo.

²² Tsilu nangwe wa tou ḽi sinḓa mutulini, wa ḽi kuya guyoni, vhutsilu haḽo a vhu swotowi.

²³ Sedza mutakalo wa nngu dzau, londola kholomo dzau;

²⁴ hafhu lupfumo a lu yi thambo; na vhuhosi a vhu ratheli kha mirafho yoṱhe.

²⁵ Musi hatsi ha zwifuwo ho hwivhiwa, hó no mela vhuswá, na hatsi ha mivhunduni ho no kuvhanganywa,

²⁶ ndi hone ngwana dzi tshi ḓo u ṋea vhukuse ha u luka nguvho, wa rengisa mbudzi wa renga tsimu.

²⁷ U ḓo hama mafhi a mbudzi a si na vhukono, wa ḽa wa fura na muṱa wau, phuli dzau dza vhasidzana wa dzi lela ngao.