MIRERO 26 - BIVHILI KHETHWA Mafhungo Madifha

¹ Tsilu a ḽo ngo tewa nga khuliso, ḽa huliswa zwi nga mahaḓa a tshi wa tshilimo, zwi nga mvula ya muḓaphondo.

² Ṱhatshile a i ḽi muthu a si na mulandu; i fhira unga ṱhongola i tshi fhufha, i nga ṱhambamaḓi i sa kavhi.

³ Tsha bere ndi tshimebi, tsha donngi ndi dziḓomo, tsha muṱana wa tsilu ndi mbuno.

⁴ U songo fhindula tsilu u tshi tevhedza vhutsilu haḽo, u sa ḓo nga ḽone.

⁵ Fhindula tsilu nga ḽo fanelaho vhutsilu haḽo, ḽi sa ḓo vhona unga ḽo ṱalifha.

⁶ U laedza danana mafhungo ndi u ḓitumula milenzhe, ndi u ḓiṱoḓela mafhanza.

⁷ Veveru ḽi tshi bula murero, zwi nga mulenzhe wa tshihole u nembelelaho.

⁸ U hulisa tsilu zwi nga u vhofhelela tombo kha gatho, ḽa nambatela.

⁹ Vavhi ḽi tshi bula murero, zwi nga tshidakwa tsho vaiwa tshanḓa nga mupfa tshi sa pfi tshithu.

¹⁰ Ane a thola tsilu kana mufhiri wa nḓila, u nga mupfuli a no sokou pfula a sa sedzi.

¹¹ Tsilu ḽi ṱolou dzeula vhutsilu haḽo, unga mmbwa i tshi ri u ṱanza maṱanza ya dovha ya ḽa.

¹² Ane a ḓiita muṱali u ḓo fhirwa na nga tsilu.

¹³ Mubva u ri, “Afho nḓilani hu na ndau; mikotoni hu na ḽivhanda ḽi pondaho!”

¹⁴ Mubva u vhumbuluwa mmbeteni unga vothi ḽi tshi vula ḽi tshi valela.

¹⁵ Mubva a longa tshanḓa tshidongoni, u bvafha na u tshi humisela mulomoni.

¹⁶ Mubva u vhona unga o ṱalifha u fhira vhanna vhaṱanu na vhavhili vhane vha fhindula zwavhuḓi.

¹⁷ A no sokou dzhenelela nndwani i si yawe, u nga muthu a no ri u vhona mmbwa i tshi khou ḓifhirela nga nḓila, a i fara nga nḓevhe.

^18-19 Muthu a no ri u fhura muṅwe a ri, “Ndo vha ndi tshi khou swaswa!” u nga mpengo a no sokou posa misevhe i dugaho, i vhulahaho.

²⁰ Ha sa vha na khuni, mulilo u a dzima; ha sa vha na zwitshele, phambano dzi a fhela.

²¹ Muthu wa luambo u vusa nndwa, u nga muthu a tshi shela malasha masimbeni, zwi nga u khuṱhedza mulilo.

²² Maipfi a zwitshele a nga kugaku kwa u ḓifha; a tsela ngomu-ngomu thumbuni.

²³ Muthu wa nyambo yavhuḓi a re na mbilu mmbi, u nga khali ya gamba yo fhomiwaho nga phomo i penyaho unga ngilasi.

²⁴ Muthu wa vengo u a ḓikhakhisa nga nyambo yawe; mbiluni yawe hone o dzumba vhufhura.

²⁵ Nangwe haṋwani hawe hu tshi ḓifha u songo mu tenda; mbilu yawe yo ḓala zwi nengisaho.

²⁶ Vhuvhi hawe vhu nga ḓi vha ho dzumbama nga vhuhwavho; vhu ḓo vhuya ha dzumbululwa ha vhonwa nga vhoṱhe.

²⁷ Khunḓa i ḓo fasha muvei; tombo ḽi ḓo zhaka mukungulusi.

²⁸ Lulimi lwa mazwifhi lu vhenga mubaiwa; muhoi ndi mulozwi.