MIRERO 25 - BIVHILI KHETHWA Mafhungo Madifha

Miṅwe mirero ya Solomoni

¹ Hei ndi mirero ya Solomoni ye ya kuvhanganywa nga vhakoma vha Hiskia khosi ya Juda. I ri:

² Mudzimu u rendelwa u dzumba mafhungo, mahosi a khoḓelwa u ṱoḓisesa mafhungo.

³ Mbilu ya khosi a i ṱolei, yo ṱanḓavhuwa unga maṱaḓulu, ya tsisa unga lwanzhe.

⁴ Ha bviswa malambelo kha siliva hu sala zwine mufuli a fula;

⁵ ha bviswa vhavhi hune khosi ya vha hone, ndi hone khuluṋoni yawe i tshi ḓo tikwa nga khaṱhulo mbuya.

⁶ U songo ḓihudza maṱoni a khosi, u songo vhanga vhudzulo vhukati ha vhahulwane;

⁷ ndi khwiṋe muthu a tshi tou pfi, “Kha vha ḓe ngeno phanḓa!” u fhira u ṱukufhadzwa nga u pfi a sendelele a mu fhiraho.

⁸ Zwe wa zwi vhona nga maṱo au u songo ṱavhanya u zwi hwelela khoroni; zwino arali muṅwe a u shonisa u ḓo fhedza nga u itani?

⁹ Arali u na nndwa na muthu u songo dzumbulula tshiphiri tsha muṅwe,

¹⁰ a sa ḓo ri u zwi pfa a u shonisa, wa ḓi dzula na phungo mmbi.

¹¹ Ipfi ḽo teaho nga tshifhinga tsho teaho ḽi nga maapula a musuku o vhewa kha mudzio wa siliva.

¹² Muṱali a tshi kaidza tshi na nḓevhe zwi nga tshiṅina tsha musuku na geḓane ya musuku.

¹³ Muḓinḓa a fulufhedzeaho u netulusa mbilu dza vhaṋe vhawe unga mukumbi ḽi tshi fhisa.

¹⁴ Muthu a no ṱongisa dzimpho dzine a si tsha ṋea muthu, u nga makole na muya u sa ḓisi mvula.

¹⁵ Wa luvhelela muvhusi u sa fheli mbilu, a nga vhuya a tenda; lulimi lwa vhulenda lu vunḓa shambo.

¹⁶ Wa wana mutoli itou ḽa wo eḓanaho; wa ḽesa u ḓo ṱanza.

¹⁷ U songo dalesa nḓuni ya khonani yau, u sa ḓo mu netisa a vho u vhenga.

¹⁸ Muthu ane a ṱanzilela mazwifhi, ndi thonga, ndi pfumo, ndi musevhe wo ṱuṱulwaho.

¹⁹ U ḓitika nga muthu a sa fulufhedzei musi wa khombo, zwi nga ḽiṋo ḽo sinaho, zwi nga mulenzhe wa tshihole.

²⁰ U imbela muthu nyimbo dza dakalo ó vhaisala mbiluni, zwi nga muthu a tshi bvula tshiambaro musi wa phepho, zwi nga u phupha mbonzhe nga muṋo.

²¹ Arali swina ḽau ḽi na nḓala, ḽi fhe zwiḽiwa ḽi ḽe: arali o farwa nga ḓora, mu fhe maḓi a nwe,

²² ndi hone a tshi ḓo sala o tou niwa nga ṱhoni, Muṋe washu a ḓo konou u pfufha.

²³ Zwitshele zwi sinyusa vhathu, unga muya wa devhula u tshi ḓisa mvula.

²⁴ Ndi khwiṋe u dzula ṱhangani ya nnḓu u fhira u dzula nḓuni na musadzi wa luambo.

²⁵ Mafhungo a takadzaho a tshi bva shangoni ḽa kule, a nga maḓi a tshi rothodza mikulo yo omaho.

²⁶ A no thetshelesa Mudzimu a vhuya a tenda u xedzwa nga muvhi, zwi nga tshisima tsho dzikuwaho, zwi nga bidzi i re na mashika.

²⁷ U huliseswa zwi nga u ḽesa mutoli.

²⁸ Munna a sa koni u ḓilanga u nga muḓi wa mitsheṱo yo pwashiwaho.