MIRERO 24 - BIVHILI KHETHWA Mafhungo Madifha

19

¹ U songo tama vhutshilo ha vhavhi, u songo konana navho.

² Mbilu dzavho dzi luka vhunwa, vha amba zwa u levha fhedzi.

20

³ Vhuṱali vhu fhaṱa nnḓu, ṱhalukanyo ya i khwaṱhisa,

⁴ nḓivho yone ya i ḓadza, ya ḓala zwo nakaho zwi sa sokou wanala.

21

⁵ Muṱali u na maanḓa mahulu; nḓivho yawe i engedza nungo dzawe.

⁶ Zwenezwo u tshi bva pfumo, ranga u ṱoḓa nyeletshedzo; u tshi ḓo kunda, u ṱoḓa vhaeletshedzi vhanzhi.

22

⁷ Vhuṱali tsilu ḽi nga si vhu hovhelele, khoroni ha na tshine a amba.

23

⁸ Ane a ṱolou luka vhunwa u ḓo fhedza nga u pfi mulukavhunwa.

⁹ Zwine vhutsilu ha tanda ndi vhutshinyi fhedzi; munyefuli u vhengwa nga vhathu vhoṱhe.

24

¹⁰ Wa timatima musi wa khombo, nungo dzau dzi a fhungudzea.

25

¹¹ Lamukisa vha no khou khwikhwidzelwa lufuni; humisa vha no khou pepeleka vha tshi yo vhulawa nandi!

¹² Arali wa ri, “Huno izwo ro vha ri sa zwi ḓivhi,” kani ane a sedza mbilu ha zwi vhoni? A no londola vhutshilo hau ha zwi ḓivhi kani? Ha nga pfufhi muṅwe na muṅwe a tshi tevhedza zwe a ita naa?

26

¹³ Ṅwananga, iḽa ṋotshi, ndi dzavhuḓi, mutoli u a ḓifha.

¹⁴ Ḓivha uri na vhuṱali vhu a u ḓifhela; wa vhu wana, zwa matshelo zwi ḓo u nakela, zwe wa zwi lavhelela a u nga kundwi u zwi wana.

27

¹⁵ U songo nga muvhi wa lalela nnḓu ya a thetshelesaho Mudzimu; u songo ṱangula muḓi wawe;

¹⁶ nangwe a wa kaṱanu-na-kavhili, u ḓo dovha a vuwa; vhavhi vhone vha ḓo wa vha si tsha vuwa.

28

¹⁷ Swina ḽau ḽa wa, u songo ri, “Koṱo!” A khukhulwa u songo fhululedza,

¹⁸ Muṋe washu a sa ḓo ri u zwi vhona a u sola, a vho ḓo litsha u mu sinyutshela.

29

¹⁹ U songo dinalea nga ṅwambo wa vhaitazwivhi, u songo tama vhutshilo ha vhavhi;

²⁰ muvhi zwa matshelo ha nga zwi vhoni; a no nyadza Mudzimu, luvhone lwawe lu ḓo dziṅwa.

30

²¹ Ṅwananga, ofha Muṋe washu na khosi, u songo konana na mavhanga;

²² vhone vha ḓo lovha kathihi fhedzi: ndi nnyi a no ḓivha uri Mudzimu na khosi vha ḓo vha lozwa hani?

Miṅwe mirero ya vhaṱali

²³ Vhaṱali vho dovha vha ri: U haṱula nga tshiṱalula a si zwavhuḓi;

²⁴ ane a vhuya a vhudza a re na mulandu, a ri, “A u na mulandu” – u ḓo teketelwa nga vhathu vhoṱhe, a vhengwa nga dzitshakha;

²⁵ hone vhane muthu o khakha vha mu vhona mulandu, zwi ḓo vha nakela, vha ḓo vha na mashudu manzhi.

²⁶ A no fhindula zwa ngoho ndi khonani yone-yone.

²⁷ Ranga u fhedza mishumo yau, u lime masimu au, u konou fhaṱa nnḓu.

²⁸ U songo ṋea vhuṱanzi vhune ha laṱa a si na mulandu, kana ha u piringanya mafhungo.

²⁹ U songo ri, “Ndi ḓo mu ita zwe a nnyita, ndi ḓo mu lifhedza zwe a ita.”

³⁰ Ndo vhuya nda tshimbila, nda fhira nga tsimuni ya mubva, tsimuni ya minḓirivhe ya munna a si na ṱhalukanyo,

³¹ nda wana yo mela mipfa hoṱhe-hoṱhe, mavu a sa vhonali nga tsheṋe, mutsheṱo wo wa,

³² nda ri u zwi sedza nda elekanya, nda wana pfunzo kha zwe nda vhona:

³³ Khofhenyana nandi! Ndi tou zhambu kathihi! Ndi ḓikuvhatedze ndi awelenyana!

³⁴ Ndi hone vhushai vhu tshi ḓo u zhongondedza unga ḽivemu ḽi na thonga, u shaya ha u ḓela unga muhali o kungela zwihali.