MIRERO 23 - BIVHILI KHETHWA Mafhungo Madifha

6

¹ Arali u tshi ḽa na muvhusi, ḓivha uri u na nnyi.

² Arali u khusha, ḓidzime;

³ u songo tamesa madzanga awe, a nga vha e mureo.

7

⁴ U songo ḓinetisa u tshi ṱoḓa u pfuma; ivha na vhuṱali, zwi litshe;

⁵ u tshi tou maṱo hasha kha lupfumo, lu ḓo vha lwo fhalala; a lu lengi u fhufha, lu nga goni ḽi tshi fhufhela makoleni.

8

⁶ U songo yo ḽa zwiḽiwa zwa muthu wa vhutshivha, u songo tama madzanga awe;

⁷ ene u dzula a tshi khou elekanya mutengo wazwo. U ri, “Iḽa u nwe!” ngeno mbilu yawe i sa u takaleli.

⁸ U ḓo ṱanza zwigaku zwe wa zwi ḽa, wa vha wo tshinya maipfi au avhuḓi.

9

⁹ U songo amba u tshi pfiwa nga tsilu, ḽi sa ḓo nyadza vhuṱali ha maipfi au.

10

¹⁰ U songo sudzulusa mikano ya kale, kana wa dzhena tsimuni ya tsiwana;

¹¹ Mulamuleli wavho u na maanḓa, u ḓo vha sengela mulandu ha kundwa iwe.

11

¹² U tshi laiwa u kolongonye nḓevhe, u thetshelese maipfi a nḓivho.

12

¹³ U songo litsha u laya ṅwana wau; u mu rwa nga ṱhamu a si u mu vhulaha.

¹⁴ Mu laṱise nga ṱhamu, ndi hone wo mu tshidza lufuni.

13

¹⁵ Ṅwananga, arali wa ṱalifha, na nṋe mbilu yanga i ḓo takala.

¹⁶ Ndi ḓo takala hani u tshi vho kona u amba zwi re zwone!

14

¹⁷ Mbilu yau i songo emula zwa vhatshinyi, tshau nga hu vhe u ofha Muṋe washu,

¹⁸ ndi hone zwa matshelo zwi tshi ḓo u nakela, zwe wa zwi lavhelela u nga si kundwe u zwi wana.

15

¹⁹ Ṅwananga, thetshelesa u ṱalifhe, mbilu yau i si pambuwe nḓilani ya ngoho.

²⁰ U songo ḓowelana na vha no nwesa waini, na phangwa dzi ḽesaho ṋama.

²¹ Zwidakwa na phangwa vha ḓo vha vhashai, vhudakwa vhu ambadza muthu madzanganda.

16

²² Thetshelesa khotsi au, vho u beba, mme au vhó no kegula u songo vha nyadza.

²³ Renga ngoho, u songo tsha i rengisa; renga vhuṱali, na ndayo, na ṱhalukanyo.

²⁴ Khotsi a a no thetshelesa Mudzimu u a pembela; o bebaho ṅwana wa vhuṱali u a takala.

²⁵ Iwe takadza khotsi au na mme au, mme au vho u bebaho vha pembele.

17 Vhupombwe

²⁶ Ṅwananga, mphe mbilu yau, takalela u kanda vhuṱalani hanga.

²⁷ Musadzi wa phombwe ndi khunḓa, musadzi a si wau ndi mulindi musekene.

²⁸ U u lalela unga ḽivemu, a andisa vhanna vha sa fulufhedzei.

18 Vhudakwa

²⁹ A no ṱolou ṱavha mukosi ndi nnyi? A re na tshigomelo ndi nnyi? A na muvhango ndi nnyi? A no ḽa mbilu ndi nnyi? A na philipise ndi nnyi? A na maṱo o tswukaho ndi nnyi?

³⁰ Ndi vhane vha lala vha tshi nwa; ndi vhane vha enda vha tshi thetshela waini yo vangiwaho.

³¹ U songo ṱalela waini yo tswuka, i tshi khou fhufhuma tshinweloni, i tshi tsa zwavhuḓi!

³² I fhedza nga u luma unga ṋowa, i na vhuṱungu vhu no nga ha vuluvulu.

³³ Maṱo au a ḓo vhona zwi siho, wa elekanya zwi sa ḓivhalei.

³⁴ U ḓo nga muthu o lalaho vhukati ha lwanzhe, wa nga wo lala nṱha ha seila ya tshikepe,

³⁵ wa ri, “Vho nthwa ndi si huvhale, vho nndikita nda si zwi pfe! Ndi ḓo vuwa lini nda dovha nda nwa?”