MIRERO 22 - BIVHILI KHETHWA Mafhungo Madifha

¹ Dzina ḽavhuḓi ḽi fhira lupfumo luhulu; u takalelwa hu fhira siliva na musuku.

² Muṋe washu u vhona mupfumi na mushai vha tshi fana; ndi Muvhumbi wavho vhoṱhe.

³ Wa maano u ri u vhona khombo a dzumbama; mushaanzhele ha humi, u lifha nga ṱhoho yawe.

⁴ A no ḓiṱukufhadza na u ofha Muṋe washu, u pfufhiwa nga lupfumo, na khuliso, na vhutshilo.

⁵ Nḓila ya a sa ḓivhalei yo ḓala mipfa na zwikwekwe; ane a ḓilondola u ḓo vha kule nayo.

⁶ Funza ṅwana kutshilele a tshee nga hawe; na musi o no kalaha u ḓo ḓi zwi nambatela.

⁷ Mupfumi u vhusa mushai; mupambi ndi phuli ya muadzimisi.

⁸ Wa zwala mbeu ya u kandeledza vhaṅwe, u ḓo kaṋa khombo; ṱhamu yau i ḓo vunḓea.

⁹ Mapakulile u ḓo vha na mashudu, hufha a tshi kovhekana zwiḽiwa na vhashai.

¹⁰ Wa thatha munyefuli, khakhathi i ḓo fhela; hu ḓo fhela mufhirifhiri na lunyadzo.

¹¹ A sa funi zwa vhufhura, wa nyambo ya vhulenda, u ḓo konana na khosi.

¹² Muṋe washu u londola nḓivho ya ngoho, a piringanya nyambo ya a sa fulufhedzei.

¹³ Mubva u ri, “Afho nnḓa hu na ndau; nda bva ndi a pondwa!”

¹⁴ Mulomo wa musadzi a si wau ndi khunḓa, i fasha we a teketelwa nga Muṋe washu.

¹⁵ Mbilu ya ṅwana yo ḓala vhutsilu; ṱhamu i a mu laṱisa.

¹⁶ Ane a andisa lupfumo nga u kandeledza vhashai, a ṋea vhapfumi zwifhiwa, u ḓo shaya.

Mirero ya vhaṅwe vhaṱali ya 30

¹⁷ Thetshelesa u pfe maipfi a vhaṱali, pfunzo yanga i dzhene mbiluni yau.

¹⁸ Zwi a ḓifha arali wa zwi vhulunga mbiluni yau, wa kona u zwi bula nga tshifhinga tsho teaho.

¹⁹ Ndi ṱoḓa u ri u fulufhele Muṋe washu, ndi zwine nda funza iwe ṋamusi.

²⁰ A thi ri ndo u ṅwalela mirero ya mahumi mararu, mirero ya nyeletshedzo na nḓivho.

²¹ Ndo vha ndi sa khou u funza maipfi a ngoho a fulufhedzeaho? Ndo vha ndi sa khou itela uri u kone u vhuya na phindulo yavhuḓi u tshi rumiwa?

1

²² U songo fhura mushai nga u vhona e mushai; u songo vhaisa muheḓana tsengoni;

²³ Muṋe washu u ḓo vha sengela, a zhaka vha no vha zhaka.

2

²⁴ U songo konana na mudziambiti, u songo ḓowelana na muthu wa mbilwana,

²⁵ u sa ḓo guda maitele awe, wa vho fashiwa wa fa.

3

²⁶ U songo ḓivhofha u lifhela muṅwe mulandu une a nga u ita,

²⁷ u sa ḓo ri wo kundwa u lifha wa dzhielwa mmbete u tshee wo lala nṱha hawo.

4

²⁸ U songo sudzulusa mikano ya kale yo vhewaho nga vhomakhulukuku wau.

5

²⁹ U a mu vhona muthu a shumaho nga vhutsila? Onoyo u ḓo vhuya a shumela mahosi, ha nga shumeli vhalanda.