MIRERO 21 - BIVHILI KHETHWA Mafhungo Madifha

¹ Mbilu ya khosi i tshanḓani tsha Muṋe washu, u i livhisa hune a funa unga mulonga wa maḓi.

² Muthu u vhona nḓila dzawe dzoṱhe dzi dzone; Muṋe washu Ene u sedza mbilu.

³ U ita zwi re zwone u si na vhufhura, zwi takadza Muṋe washu u fhira zwiṱhavhelo.

⁴ Maṱo a u ṱonga, mbilu ya u ḓihudza – u linga u khakhulula muvhi a zwi farisi tshithu.

⁵ Zwine mushumi wa biko a humbula zwi a mu pfumisa; ṱhavhanyedza i ḓisa vhushai.

⁶ U pfuma nga lulimi lwa vhufhura ndi khuli i fhufhaho; a no ralo u ḓiṱoḓela lufu.

⁷ Vhuvemu ha vhavhi vhu ḓo vha kumba nga u hana u ita zwi re zwone.

⁸ Nḓila ya vha re na mulandu ndi ya magombikwa; maitele a vha si na mulandu o tou tswititi.

⁹ Ndi khwiṋe u dzula ṱhangani ya nnḓu, u fhira u dzula nḓuni na musadzi wa luambo.

¹⁰ Mbilu ya muvhi i swela u ita vhuvhi, ha khathutsheli muthu.

¹¹ Hu tshi lifhiswa munyefuli a si na nzhele u wana vhuṱali; muṱali a tshi laiwa u kuvhanganya nḓivho.

¹² Mudzimu Ene a sa khakhi u ḓivha zwi re nḓuni ya muvhi; vhavhi u ḓo vha lozwa.

¹³ Wa ḓidzingisa nḓevhe mushai a tshi lila, na tshau tshililo tshi nga si pfiwe.

¹⁴ Tshifhiwa tsha tshiphirini tshi dzikisa mbiti; tshanḓanguvhoni tshi gomadza vhuhali.

¹⁵ Ha vha na khaṱhulo mbuya vha no thetshelesa Mudzimu vha a takala; vhaitazwivhi vhone vha a ofha.

¹⁶ A no pambuwa nḓilani ya ṱhalukanyo u ḓo yo awela na vhafu.

¹⁷ A no funesa miḓifho u ḓo shaya; ane a funesa waini na mapfura a nga si pfume.

¹⁸ Muvhi u a fa, a vha tshipfumelo tsha a thetshelesaho Mudzimu; a sa fulufhedzei a vha tshipfumelo tsha a si na vhufhura.

¹⁹ Ndi khwiṋe u ḓidzulela phangani u fhira u dzula na musadzi wa luambo, wa mbiti.

²⁰ Nḓuni ya muṱali ho khokhwa zwiḽiwa zwavhuḓi na mapfura; tsilu ḽi holela mulomoni.

²¹ Wa vha na vhuthu na lufuno, u ḓo lalama, wa itelwa vhuthu, wa huliswa.

²² Muṱali u kona u dia muḓi wa vhahali, a thutha vhushavhelo he vha vhu fulufhela.

²³ A no linda mulomo wawe na lulimi ha weli khomboni.

²⁴ Mudzia-u-ḓihudza wa luswetho ndi munyefuli; ha ḓiḓivhi zwone.

²⁵ Zwine mubva a zwi lilela zwi ḓo mu lozwa, hufha zwanḓa zwawe zwi tshi hana u shuma.

²⁶ Ḓuvha ḽoṱhe u ṱwa a tshi elekanya zwine a fanela u zwi wana, ngeno a no thetshelesa Mudzimu e mapakulile.

²⁷ Tshiṱhavhelo tsha muvhi tshi a nengisa, zwihulu arali tshi tshi ṋekedzwa nga muhoyo.

²⁸ Ṱhanzhi ya mazwifhi i ḓo dzhenwa haṋwani; i no fulufhedzea i ḓo amba ya fhedza.

²⁹ A si na vhufhura u na tshileme; muvhi u tou ḓiita wa tshileme.

³⁰ Naho wo ṱalifha hani, u na ṱhalukanyo ngafhani, na maano áu, Muṋe washu u nga si mu kone.

³¹ Bere i nga ḓi lugiselwa musi wa mmbi, hone gundo ḽi bva ha Muṋe washu.