MIRERO 20 - BIVHILI KHETHWA Mafhungo Madifha

¹ Muthu ó kambiwa u nyefula na zwikhethwa; halwa vhu a zhambisa; u tshi vho pepeleka nga waini wo no vha tsilu.

² Khosi yó sinyuwa ndi ndau i tshi vhomba; ane a vusa mbiti dzawe u a fa.

³ Muthu a no sendela kule na khakhathi u a hulisea; tsilu a ḽi lengi u pala nndwa.

⁴ Mubva tsha limuwa ha limi; vhaṅwe vha tshi kaṋa u sokou sedza a si wane tshithu.

⁵ Mbilu ya muthu ndi dzivha ḽa maḓi; a na ṱhalukanyo u a a ka.

⁶ Vhanzhi vha ri vha a fulufhedzea, hone a no fulufhedzea vhukuma a nga wanwa nga nnyi?

⁷ A no thetshelesa Mudzimu u tshila vhutshilo vhu sa solisei; na vhana vhawe vha ḓo vha na mashudu.

⁸ Khosi i tshi sengisa muthu a i lengi u vhona a na mulandu.

⁹ Ndi nnyi ane a nga ri, “Mbilu yanga yo ṱamba; ndo kuna, a thi na vhutshinyi”?

¹⁰ Hu zwikalo zwa vhufhura, hu mielo ya vhufhura, Muṋe washu u zwi sanda zwoṱhe.

¹¹ Muthu-muthu u vhonala a tshee nga hawe.

¹² Hu nḓevhe i pfaho, hu ḽiṱo ḽi vhonaho, zwoṱhe zwo itwa nga Muṋe washu.

¹³ U songo funesa khofhe, u sa ḓo shaya; dzula wo fhaṱuwa, ndi hone u tshi ḓo ḽa wa fura.

¹⁴ Murengi u ri, “Ndi malambelwa haya! Ndi malambelwa haya!” a tshi ṱuwa a zuwa tshe a renga.

¹⁵ Musuku u a wanala, na nungu nnzhi, huno mulomo u no bula a nḓivho ndi nungu i sa sokou wanala.

¹⁶ Mutsinda ane a ḓivhofha u lifha mulandu une muṅwe a nga ita, nga a dzhielwe nguvho, ha ḓivhiwi.

¹⁷ Zwiḽiwa zwo wanalaho nga vhufhura zwi a ḓifha muthu a tshi zwi ḽa; ngavhuya mulomo wau u ḓo vha wo ḓala muṱavha.

¹⁸ Vhamba maano nga u ṱoḓa nyeletshedzo; ranga u vhudzisa vhaeletshedzi u konou bva pfumo.

¹⁹ Mudziazwitshele u dzumbulula tshiphiri; u songo konana na veveru.

²⁰ Muthu a teketela khotsi kana mme, luvhone lwawe lu ḓo dziṅwa ha sala swiswi fhedzi.

²¹ Lupfumo lwo ḓaho nga tshihaḓu, a lu nga fhedzi nga mashudu.

²² U songo ri, “Ndi ḓo lifhedza!” Lindela Muṋe washu, u ḓo ima na iwe.

²³ Muṋe washu u sanda ndeme dzi sa fani, tshikalo tsha vhufhura a si tshavhuḓi.

²⁴ Muthu a tshi tshimbila u endedzwa nga Muṋe washu, zwino ene muṋe a nga ṱalukanya hani nḓila yawe?

²⁵ A no ṱavhanyedza u anela Mudzimu tshithu á songo ranga u elekanya, o ḓiretshela tshikwekwe.

²⁶ Khosi ya vhuṱali i fhefhera vhavhi, ya vha kuya.

²⁷ Luvalo lwa muthu ndi luvhone lwa Muṋe washu; lu vhonetshela mbilu lwa si siedze.

²⁸ Lufuno na u fulufhedzea zwi tsireledza khosi; khuluṋoni yawe i tikwa nga vhuthu.

²⁹ Vhugala ha vhaṱhannga ndi maanḓa avho; ha vhakalaha ndi mmvi.

³⁰ Mbuno dzi phulaho mbonzhe dzi laṱisa vhuvhi; ṱhamu i ilafha mbilu.