MIRERO 2 - BIVHILI KHETHWA Mafhungo Madifha

Vhuṱali ndi lupfumo na tsireledzo

¹ Ṅwananga, arali wa pfa maipfi anga, wa vhulunga ndaela dzanga,

² nḓevhe dzau dza thetshelesa vhuṱali, mbilu yau ya ṱalukanya –

³ ndi ngoho, arali wa vhidzelela nḓivho, wa huwelela ṱhalukanyo,

⁴ wa i ṱoḓa unga siliva, wa i ṱoḓisesa unga lupfumo lwo dzumbwaho,

⁵ ndi hone u tshi ḓo ṱalukanya uri u ofha Muṋe washu zwi amba mini, wa vhona uri u ḓivha Mudzimu ndi mini.

⁶ Vhuṱali ndi mpho ya Muṋe washu, nḓivho na ṱhalukanyo zwi bva mulomoni wawe.

⁷ Vha si na vhufhura u ḓo ita uri zwi vha nakele, ndi Ene tshiṱangu tsha vho faraho nḓila i sa solisei.

⁸ U linda nḓila dza vha no ita zwi re zwone, a tsireledza vhalanda vhawe vha fulufhedzeaho.

⁹ Arali wa nthetshelesa, ndi hone u tshi ḓo ḓivha u ita zwi re zwone, zwi sa khakhi, zwi sa solisei.

¹⁰ Ndi hone vhuṱali vhu tshi ḓo dzhena mbiluni yau, wa pfa nḓivho i tshi u ḓifhela.

¹¹ Vhuronwane vhu ḓo u tsireledza, ṱhalukanyo ya u londola.

¹² Vhuṱali vhu ḓo u pambusa nḓilani mmbi, wa fhambana na vha nyambo dza u thutha,

¹³ vhane vha pambuwa kha nḓila yo lugaho, vha fara i yaho swiswini,

¹⁴ vha takalela u ita zwivhi, vha ḓikhoḓa nga nyambo mmbi dza u thutha,

¹⁵ vhathu vha nḓila dza magombikwa, vho bvaho nḓilani.

¹⁶ Ndi hone u tshi ḓo kona u tinya musadzi wa phombwe, ane a u fhura nga lulimi lwa u ḓifha, hone e wa muṅwe,

¹⁷ ó ṱala munna we a mu vhinga a tshee nga hawe, a hangwa mulanga we a vhofha na Mudzimu wawe;

¹⁸ u mbwandamela lufuni hune ha ḓo vha hone nnḓu yawe, nḓila dzawe dzi livha hu no dzula vho faho.

¹⁹ Vhane vha mu dalela a vha tsha vhuya, a vha tsha vhona nḓila i yaho vhutshiloni.

²⁰ Zwenezwo tshimbila nḓilani ya vhavhuya, u nambatele ya vha fulufhedzeaho;

²¹ vha si na vhufhura vha ḓo kovhelwa shango, vha sa solisei vha ḓo sala khaḽo.

²² Vhavhi vhone vha ḓo swielwa shangoni, vha vhufhura vha ḓo tupulwa khaḽo.