MIRERO 19 - BIVHILI KHETHWA Mafhungo Madifha

¹ Ndi khwiṋe u mushai, nḓila dzau dzi sa solisei, u fhira u vha mudzia-u-zwifha wa dovha wa vha tsilu.

² U ḓifunga u si na nḓivho a si zwavhuḓi; ṱhavhanyedza i a khakhisa.

³ Muthu u xedzwa nga vhutsilu hawe ene muṋe, a vho sinyutshela Muṋe washu.

⁴ Lupfumo lu kunga ṱhama nnzhi; mushai u laṱwa na nga khonani yawe.

⁵ Ṱhanzi ya mazwifhi a i nga tinyi ṱhamu; mudzia-u-zwifha ha nga ponyoki.

⁶ Muhulwane ha shayi vhahoi; mapakulile ha shayi khonani.

⁷ Mushai u nyalwa na nga vhana vha mme awe; khonani dzawe dzi nga kundwa ngani u mu laṱa? Nangwe a tshi vha luvhelela a vha tsha vhonala.

⁸ Ane a wana vhuṱali u a ḓitonda; a no takalela ṱhalukanyo zwi ḓo mu nakela.

⁹ Ṱhanzi ya mazwifhi a i nga tinyi ṱhamu; mudzia-u-zwifha u ḓo lovha.

¹⁰ A zwo ngo tea tsilu ḽi tshi tshila nga u ḓiphiṋa; zwi ḓi nga phuli i tshi vhusa vhahulwane.

¹¹ Vhuṱali vhu kata muthu a si sokou fhela mbilu; vhugala hawe ndi u kanda mupfa a tshi u vhona.

¹² Khosi yo sinyuwa i nga ndau i tshi vhomba; a tshi u takalela zwi nga ṅwando wo wela hatsini.

¹³ Muṱhanngana wa tsilu u hoṱefhadza khotsi awe; musadzi wa luambo u nga maḓi a tshi bvuḓa a sa gumi.

¹⁴ Ifa ḽa nnḓu na lupfumo muthu u sielwa nga vhabebi; musadzi wa ṱhalukanyo ndi tshifhiwa tsha Muṋe washu.

¹⁵ Vhubva vhu vhidza khofhe, muthu a lala e mbwandaa; wa sa shuma u ḓo fa nga nḓala.

¹⁶ U tevhela ndaela ndi u ḓilondola; ane a si londe u ḓo lovha.

¹⁷ A no khathutshela mushai o fhahea kha Muṋe washu; u ḓo pfufhelwa zwe a ita.

¹⁸ Laṱisa ṅwana wau a tshi kha ḓi vha nga hawe, hone u songo mu rwa wa tou vhulaha.

¹⁹ Muthu wa mbilwana tshawe ndi u lifha; wa mu lamukisa u ḓo ḓi dovha.

²⁰ Thetshelesa nyeletshedzo u tende u laiwa, ndi hone u tshi ḓo fhedza nga u ṱalifha.

²¹ Mihumbulo ya muthu a i fheli, fhedzi hu ḓo pfumba zwe zwa dzudzanywa nga Muṋe washu.

²² Muthu u huliselwa u fulufhedzea; ndi khwiṋe u shaya u fhira u zwi wana nga vhufhura.

²³ U ofha Muṋe washu zwi tshidza muthu, u lala e mbwandaa, a si welwe nga khombo.

²⁴ Mubva a longa tshanḓa tshidongoni, u bvafha u tshi humisela mulomoni.

²⁵ Irwa munyefuli uri a no shaya nzhele a vhe na maano; kaidza a re na vhusedzi, ndi hone a tshi ḓo vha na nḓivho.

²⁶ Ane a tswela khotsi awe, a thatha mme awe, u ita zwi shonisaho, zwi nyadzisaho.

²⁷ Ṅwananga, konyolela zwau matanda nḓevheni u tshi laiwa, ndi hone wo xedza maipfi a nḓivho.

²⁸ Ṱhanzi i sa ḓivhalei i nyefula khaṱhulo mbuya; muvhi u pfa vhuvhi vhu tshi ḓifha.

²⁹ Vhanyefuli vho dzula vho vhetshelwa ṱhamu; miṱana ya matsilu yo lindela u rwiwa.