MIRERO 18 - BIVHILI KHETHWA Mafhungo Madifha

¹ A sa anḓani na vhaṅwe u ḓiwanela tsha u ḓikupula, ha vhuyi a tenda u eletshedzwa.

² Tsilu a ḽi takaleli ṱhalukanyo, tshaḽo ndi u ṱana mihumbulo yaḽo.

³ Vhuvhi vhu nyadzisa muvhi; a no kola u ḓo kolelwa.

⁴ Maipfi a no bva haṋwani ha muthu ndi mativha; tshisima tsha vhuṱali ndi mulambwana u gubunyeaho.

⁵ U imelela a re na mulandu tsengoni a si zwavhuḓi; zwi ḓi nga u laṱa a si na mulandu.

⁶ Milomo ya tsilu i vusa mufhirifhiri; nyambo yawe i mu ṱulela ṱhamu.

⁷ Tsilu ḽi ḓibwela tshalo nga mulomo waḽo; nyambo yawe ndi khunḓa yawe.

⁸ Zwitshele ndi mikonde ya vhuswa; ri tama hani u zwi midza!

⁹ Mulozwi na a no teledza u shuma ndi vhana vha musadzi.

¹⁰ Dzina ḽa Muṋe washu ndi mutsheṱo wo khwaṱhaho: a no mu thetshelesa u shavhela ngomu a dzumbama.

¹¹ Lupfumo lwa mupfumi ndi wone muḓi wawe wo tsireledzwaho; u vhona unga ndi mutsheṱo u sa konadzei.

¹² U ḓihudza hu ṱula u lozwiwa; u ḓiṱukufhadza hu ṱula u huliswa.

¹³ A no fhindula a sa athu pfa, u ḓo shona nga vhutsilu hawe.

¹⁴ Muya u tshee na nungo u konḓelela vhulwadze, hone wo no kulea nungo, nungo u nga dzi wanafhi?

¹⁵ Mbilu ya a re na vhusedzi i kuvhanganya nḓivho; na nḓevhe ya muṱali i a i ṱoḓa.

¹⁶ Tshifhiwa tshi vulela muṋei nḓila, tsha mu swikisa ha vhahulwane.

¹⁷ A no ranga u swikisa mulandu musanda u nga u amba zwone, u mu hanedzaho a vhuya a vhudzisa mbudziso.

¹⁸ Deṅwa ḽi lamula vhathu, ḽa fhandekanya vhahali vhavhili.

¹⁹ Muḓi wo tangwaho nga mitsheṱo u nga kha ḓi dzhenwa, hone wa khakhela murathu wau ha tsha tenda u pfumelwa; wa lwa nae ú tila unga vothi ḽa tsimbi.

²⁰ Muthu u ḽa zwivhuya zwe a wana nga u amba; u kaṋa zwa mulomo wawe.

²¹ Lulimi lu langa lufu na vhutshilo; vhane vha lu vhaḓa vha ḓo ḽa mitshelo yalwo.

²² Ane a wana musadzi o wana tshithu tshavhuḓi; ndi mashudu a bvaho kha Muṋe washu.

²³ Mushai a tshi amba u a luvhelela; mupfumi a tshi fhindula u mu ḽela vhuhali.

²⁴ Hu na khonani dzi no lozwa muthu, ha vha na ṱhama i no u tikedza u fhira ṅwana wa mme au.