MIRERO 16 - BIVHILI KHETHWA Mafhungo Madifha

¹ Mbilu ya muthu i vhamba maano; Muṋe washu a vha Ene Ambadzifhele.

² Muthu u vhona nḓila dzawe dzoṱhe dzi sa solisei; a no sedza mbilu ndi Muṋe washu.

³ Mishumo yau yoṱhe i kumedze Muṋe washu, ndi hone zwe wa dzudzanya zwi tshi ḓo pfumba.

⁴ Tshiṅwe na tshiṅwe tshi na zwe Muṋe washu a tshi itela zwone; na ene muvhi, ene o itelwa musi wa khombo.

⁵ Muṋe washu u nyala mudzia-u-ḓihudza; na kathihi ha nga litshi u lifhedzwa.

⁶ Mulandu u lixwa nga u vha na lufuno na u fulufhedzea; muthu u tinya vhuvhi nga u ofha Muṋe washu.

⁷ Arali nḓila dzau dzi tshi takadza Muṋe washu, na maswina au u ḓo a pfumedzanya na iwe.

⁸ Ndi khwiṋe a vha na zwi si gathi zwe wa zwi wana nga pfanelo, u fhira u wana lupfumo lunzhi nga vhufhura.

⁹ U nga ḓi elekanya zwine wa funa u ita; a no u endedza ndi Muṋe washu.

¹⁰ Khosi ndi mulomo wa Mudzimu; a tshi haṱula a songo khakha.

¹¹ Muṋe washu u ṱoḓa tshikalo tshi sa fhuri; ndeme dzo tiwa nga Ene.

¹² Mahosi a nengwa zwiito zwivhi; khuluṋoni yo tikwa nga u fulufhedzea.

¹³ Mahosi a takalela milomo i si na vhufhura; muthu a no amba ngoho vha a mu funa.

¹⁴ Mbiti dza khosi ndi muḓinḓa wa lufu; muthu wa vhuṱali u a dzi dzikisa.

¹⁵ Tshifhaṱuwo tsha khosi tshó tsha ri a tshila; á u takalela zwi nga makole a mvula dza tseula.

¹⁶ Vhuṱali vhu fhira musuku kule; ṱhalukanyo i takadza u fhira siliva.

¹⁷ Vha si na vhufhura vha fara i no tinya vhuvhi; ane a tshila nga vhusedzi u a ḓilondola.

¹⁸ U ḓihudza hu ṱula u fa; u ḓiḓivha hu ṱula u wa.

¹⁹ Ndi khwiṋe u ḓibaḓekanya na vhashai, u fhira u kovhekana thundu dza vhuvemu na vhadzia-u-ḓihudza.

²⁰ Ane a thetshelesa a tshi laiwa zwi ḓo mu nakela; wa mashudu ndi ane a fulufhela Muṋe washu.

²¹ Muṱali u pfi u na vhusedzi; maipfi a vhulenda a tikedza ndayo.

²² Ṱhalukanyo ndi tshisima tshi ṋeaho vhutshilo; tsilu ḽi tshi laiwa ḽi vhuelwa nga vhutsilu fhedzi.

²³ Mbilu ya muṱali i langa mulomo wawe; maipfi awe a tikedza ndayo.

²⁴ Maipfi a vhulenda ndi tshigili tsha mutoli; a a ḓifha, a a fhodza.

²⁵ Hu na nḓila ine muthu a tshi i sedza a vhona i yone-yone, ya fhedza nga u mu isa lufuni.

²⁶ Nḓala i a shumisa; mala a tshi lila a a u khada.

²⁷ Muthu a sa ḓivhalei u luka vhunwa; nyambo yawe i nga mulilo u rungunyisaho.

²⁸ Nduṱa i luṱanya vhathu; mudziazwitshele u fhambanya dzikhonani.

²⁹ Mudzianndwa u kunga vhaṅwe, a vha isa nḓilani i si yavhuḓi.

³⁰ Ane a sinyedza nga maṱo ha tandi ḽi no fukwa; ane a kongomedza u ḓisa zwo vhifhaho.

³¹ Mmvi ndi tshiala tsha vhugala, dzi wanwa nga vha no thetshelesa Mudzimu.

³² A sa fheli mbilu u fhira muhali; hu ḓi nga ane a langa mbiti dzawe a tshi fhira ane a thuba miḓi.

³³ Madeṅwa a itwa nga vhathu; mulangi wao ndi Muṋe washu.