MIRERO 15 - BIVHILI KHETHWA Mafhungo Madifha

¹ Phindulo ya vhulenda i dzikisa mbiti; ipfi ḽa vhuhali ḽone ḽi a sinyusa.

² Lulimi lwa muṱali lu ita uri nḓivho i tamise; mulomo wa tsilu u shulula vhutsilu fhedzi.

³ Maṱo a Muṋe washu a hoṱhe-hoṱhe, a sedza vhavhi na vhavhuya.

⁴ Lulimi lwa vhulenda ndi muri u ṋeaho vhutshilo; lwa vhufhura lu pwashekanya mbilu.

⁵ Tsilu ḽi nyadza ndayo dza khotsi aḽo; ane a tenda u kaidzwa u na maano.

⁶ Nḓuni ya a no thetshelesa Mudzimu ho khokhana lupfumo; zwine vhavhi vha zwi wana zwi vha ḓisela khombo.

⁷ Mulomo wa muṱali u anḓadza nḓivho; mbilu dza matsilu a dzi fulufhedzei.

⁸ Tshiṱhavhelo tsha muvhi tshi nengisa Muṋe washu; u takalela thabelo ya a si na vhufhura.

⁹ Muṋe washu u nengwa nḓila ya muvhi; u funa a no ḓidinela u ita zwi re zwone.

¹⁰ A pambuwaho nḓilani u ḓo laṱiswa nga ṱhamu; ane a si fune u kaidzwa u ḓo fa.

¹¹ Muṋe washe u vhona na zwa dindini ḽa vhudzulavhafu, zwino a nga kundwa hani u ḓivha zwi re mbiluni ya muthu?

¹² Munyefuli ha funi u kaidzwa, ha ṱoḓi nyeletshedzo kha muṱali.

¹³ Mbilu yo takalaho i tshisa tshifhaṱuwo; u ḽa mbilu hu kulekanya nungo.

¹⁴ A na nzhele u ṱoḓisesa nḓivho; tsilu ḽi fushea nga vhutsilu fhedzi.

¹⁵ A ḽaho mbilu u vhona misi yoṱhe i mivhi; o rudzaho mbilu ene u dzula a tshi ḓiphiṋa.

¹⁶ Ndi khwiṋe u vha na zwi si gathi muthu a tshi ofha Muṋe washu, u fhira u vha na lupfumo luhulu ú songo rudza mbilu.

¹⁷ Ndi khwiṋe ni tshi ḓiḽela miroho ni tshi funana, u fhira u ḽa mapfura ni tshi dzula nga u vhengana.

¹⁸ Muthu wa mbiti u vusa khani; a sa fheli mbilu u lamula nndwa.

¹⁹ Nḓila ya mubva yo shoshelwa mipfa; ya a si na vhufhura i a tshimbilea.

²⁰ Muṱhanngana wa vhuṱali u takadza khotsi awe; muthu wa tsilu u nyadza mme awe.

²¹ A si na ṱhalukanyo u takadzwa nga vhutsilu; wa ṱhalukanyo u fara nḓila ye ya tou tswititi.

²² Ha sa vha na nyeletshedzo maano a a pfuvha; ha vha na vhaeletshedzi vhanzhi zwi a pfumba.

²³ Muthu u a takadzwa nga u fhindula zwo teaho; zwo naka hani ipfi ḽi tshi bulwa nga tshifhinga tsho teaho!

²⁴ Muṱali u gonya nga nḓila i yaho vhutshiloni, uri a sa ḓo godimela dindini.

²⁵ Muṋe washu u thutha nnḓu ya mudzia-u-ḓihudza, tsimu ya tshilikadzi a i tsireledza.

²⁶ Muṋe washu u nengwa mihumbulo ya muvhi, hone maipfi a vhuthu ha solisei.

²⁷ Ane a ṱoḓa u pfuma nga vhufhura u ṱulela muṱa wawe mafhanza, hone ane a vhenga tshanḓanguvhoni u ḓo lalama.

²⁸ A no thetshelesa Mudzimu u ranga u elekanya, a konou fhindula; mulomo wa muvhi wone u shulula vhuvhi.

²⁹ Muṋe washu u kule na vhavhi; thabelo ya vhane vha mu thetshelesa u a i pfa.

³⁰ Tshifhaṱuwo tsho tshaho tshi takadza mbilu; mafhungo a takadzaho a ṋea muthu nungo.

³¹ Ane a tshi laiwa a thetshelesa, u ḓo dzula na vhaṱali.

³² U landula ndayo ndi u ḓinyadza; u tenda u kaidzwa ndi u wana ṱhalukanyo.

³³ U ofha Muṋe washu zwi funza muthu vhuṱali; ranga u ḓiṱukufhadza, u ḓo konou huliswa.