MIRERO 14 - BIVHILI KHETHWA Mafhungo Madifha

¹ Muḓi u fhaṱwa nga vhuṱali ha musadzi; musadzi wa tsilu ene u a u thutha.

² A si na vhufhura u ofha Muṋe washu; wa nḓila dza magombikwa ene u a mu nyadza.

³ Zwiambo zwa tsilu zwi ḽi rwisa muṱana, hone milomo ya muṱali i a mu tsireledza.

⁴ Hu si na phulu a hu na tshinyalelo ya zwiḽiwa zwadzo, hone mavhele manzhi a ḓiswa nga nungo dza phulu.

⁵ Ṱhanzi i fulufhedzeaho a i zwifhi; ya mazwifhi yone i shulula mazwifhi fhedzi.

⁶ Munyefuli u ṱoḓa vhuṱali, he vhutoto; wa ṱhalukanyo a zwi mu konḓeli u wana nḓivho.

⁷ Tinya tsilu, ḽi nga si u funze tshithu.

⁸ Vhuṱali ha wa vhuronwane vhu mu sumbedza nḓila; tshidzingindi tshi fhurwa nga vhutsilu hatsho.

⁹ Tsilu ḽi nyadza u pfumelwa; vha si na vhufhura vha a takalelana.

¹⁰ Mbilu i ḓivha vhuṱungu hayo, na dakalo ḽayo a i kovhekani na muṅwe.

¹¹ Nnḓu ya muvhi i ḓo pwashekanywa; ya a si na vhufhura i ḓo shudufhadzwa.

¹² Hu na nḓila ine muthu a vhona i yone-yone, ya fhedza nga u mu isa lufuni.

¹³ Naho muthu a tshi sea, mbilu i nga kha ḓi vha yo ṱungufhala; dakalo ḽi nga ḓi fhedza nga u ṱungufhala.

¹⁴ O pambuwaho nḓilani ya Mudzimu u ḓo kaṋa zwe a zwala; na muvhuya u ḓo pfufhelwa zwivhuya zwawe.

¹⁵ Tshilendele ndi tendele; wa vhuronwane u sedza hune a ya.

¹⁶ Wa vhuṱali u na vhusedzi; u furalela vhuvhi; tsilu a ḽi londi, ḽi wela zwithu nga nṱha.

¹⁷ Wa mbilwana u ita zwa vhutsilu; wa vhumbulu u ḓivhengisa nga vhathu.

¹⁸ Mukovhe wa a si na maano ndi vhutsilu; tshiala tsha wa vhuronwane ndi nḓivho.

¹⁹ Vhaitazwivhi vha losha vhavhuya; vhavhi vha luvha khoroni dza vha no thetshelesa Mudzimu.

²⁰ Mushai u sandwa na nga vhadzulelani vhawe; mupfumi ene u na khonani nnzhi.

²¹ U nyadza muṅwe ndi u tshinya; u itela mushai vhuthu ndi one mashudu.

²² Kani vha no tanda ḽi sa fukwi a vha khou xela? Vha no langana zwivhuya a vha nga shandukelwi, vha ḓo funwa.

²³ Mushumi wa biko u a vhuelwa; a no sokou amba nga mulomo fhedzi u ḓo shaya.

²⁴ Muṱali u ḓo ambadzwa tshiala tsha lupfumo; tsilu ḽo kungela vhutsilu fhedzi.

²⁵ Ṱhanzi ya ngoho i tshidza vhathu; ine ya zwifha ndi tshifheṱi.

²⁶ Ane a ofha Muṋe washu o wana vhushavhelo ho khwaṱhaho; na vhana vhawe ḽi ḓo vha bako ḽavho.

²⁷ U ofha Muṋe washu ndi tshone tshisima tsha vhutshilo, hu tinyisa muthu zwikwekwe zwa lufu.

²⁸ Khosi ndi khosi nga vhathu; muvhusi a shaya vhalanda u a lovha.

²⁹ Ane a si fhele mbilu u na ṱhalukanyo khulu; wa mbilwana u ṱana vhutsilu.

³⁰ Mbilu yo rulaho i ṋea muvhili vhutshilo; vivho ḽone ndi ṱhahala.

³¹ Ane a kandeledza vhashai u nyadza Muvhumbi wavho; u itela vhaheḓana vhuthu ndi u hulisa Mudzimu.

³² Muvhi u wiswa nga vhuvhi hawe; wa u thetshelesa Mudzimu u wana vhushavhelo naho hu tshi fiwa.

³³ A na ṱhalukanyo ha ḓisumbedzi; tsilu ḽone ḽi a ḓiṱana.

³⁴ U thetshelesa Mudzimu hu hudza lushaka; vhutshinyi vhu lu ḓisela samba.

³⁵ Mukoma ane a shuma nga vhuṱali u takadza khosi; a no ita zwi shonisaho u a i sinyusa.