MIRERO 13 - BIVHILI KHETHWA Mafhungo Madifha

¹ Ṅwana wa vhuṱali u a thetshelesa khotsi awe a tshi mu laya; mudzia-u-kola ha pfi u kaidzwa.

² Muthu u ḽa zwivhuya zwe a wana nga u amba; wa vhufhura u tshila nga vhuvemu.

³ U fara lulimi ndi u vhulunga vhutshilo; u amba u sa londi ndi u ḓilozwa.

⁴ Mubva u tama tshithu a si tshi wane; mushumi wa biko u fushwa nga zwinzhi.

⁵ Ane a thetshelesa Mudzimu u vhenga mazwifhi; muvhi ene u ita zwi shonisaho a niwa nga ṱhoni.

⁶ Muthu a sa solisei u londolwa nga vhuvhuya hawe; muvhi u tekulwa nga vhuvhi hawe.

⁷ Hu na ane a ḓiita mupfumi ngeno a si na tshawe, muṅwe a ḓiita mushai e na lupfumo luhulu.

⁸ Lupfumo lwa mupfumi lu nga vha tshipfumelo tshawe; mushai ene ha londi u shushedzwa.

⁹ Tshedza tsha a thetshelesaho Mudzimu tshi tou penya; luvhone lwa muvhi lwone lu a dzima.

¹⁰ U ḓihudza hu vusa nndwa; ane a tenda u eletshedzwa u na vhuṱali.

¹¹ Lupfumo lune wa sokou lu wana a lu lengi u fhalala; ane a kuvhanganya nga zwiṱuku u andisa lupfumo lwawe.

¹² Wa kundwa u wana zwe wa zwi lavhelela zwi lwadza mbilu; zwine wa zwi tama zwa khunyelela zwi u ṋea vhutshilo.

¹³ Tshilamba-u-vhudzwa ndi tshilila-u-vhona; ane a tenda u laiwa u ḓo pfufhiwa.

¹⁴ Pfunzo ya muṱali ndi tshisima tsha vhutshilo; i humisa muthu o livha zwikwekweni zwa lufu.

¹⁵ Hu takalelwa a na ṱhalukanyo; vha sa fulufhedzei vho fara i isaho lufuni.

¹⁶ Wa vhuronwane u ita zwithu nga vhusedzi; veveru ḽone ḽi anḓadza vhutsilu haḽo.

¹⁷ Muḓinḓa muvhi u wedza vhathu khomboni; a fulufhedzeaho ene u a vha fhodza.

¹⁸ Ane a nyadza u laiwa, u vha mushai, a shona; ane a thetshelesa a tshi kaidzwa, ene u a huliswa.

¹⁹ Muthu a wana zwine a zwi tama u rudza mbilu; tsilu ḽone a ḽi funi u furalela vhuvhi.

²⁰ A tshimbilaho na vhaṱali u a ṱalifha; a konanaho na matsilu u a tsilufhala.

²¹ Vhatshinyi khombo a i vha humeli; vha thetshelesaho Mudzimu vha pfufhiwa nga zwivhuya.

²² Muvhuya u siela vhana vha vhana vhawe ifa; lupfumo lwa mutshinyi lwone lu khokhelwa vha thetshelesaho Mudzimu.

²³ Mukhatho wa mushai u nga bveledza zwiḽiwa zwinzhi, hone ha sa vha na mulayo u a kumbwa.

²⁴ A sa rwiho ṅwana wawe u a mu vhenga; ane a mu funa u mu laṱisa a tshee nga hawe.

²⁵ A thetshelesaho Mudzimu u ḽa a fura; thumbu ya muvhi yone i ṱwa na nḓala.