MIRERO 12 - BIVHILI KHETHWA Mafhungo Madifha

¹ A funaho u laiwa u funa nḓivho; a sa funi u kaidzwa ndi maphuu.

² Muthu muvhuya u takadza Muṋe washu; mudzia-vhukwila ene u ḓo laṱwa.

³ Vhuvhi a vhu khwaṱhisi muthu; vhavhuya vha nga si tupulwe.

⁴ Musadzi wavhuḓi ndi tshiala tsha munna wawe; a no ita zwi shonisaho ndi ṱhahala.

⁵ A thetshelesaho Mudzimu u ṱoḓa zwi sa solisei; maano a muvhi ndi a vhufhura.

⁶ Zwiambo zwa muvhi ndi zwa u lalela vhathu na u fhaladza malofha; maipfi a a si na vhufhura one ndi a u tshidza vhathu.

⁷ Vhavhi vha ḓo tekulwa vha si tsha vha hone; nnḓu ya a thetshelesaho Mudzimu i ḓo sala yo ima.

⁸ Muthu u khoḓelwa ṱhalukanyo yawe; o thanyelaho dubo u a nyadziwa.

⁹ Ndi khwiṋe u pfi mushai u na phuli, u fhira u ḓiita muḓivhalea u si na tshine wa ḽa.

¹⁰ A no thetshelesa Mudzimu u londola tshifuwo tshawe; muvhi ene u na tshiṱuhu.

¹¹ A limaho tsimu yawe u ḓo ḽa a laṱa; a no tevhela zwi sa ḓivhalei ene ha na ṱhalukanyo.

¹² Muvhi u tama zwo wanalaho nga vhuvemu, hone mitshelo i fulwa nga a thetshelesaho Mudzimu.

¹³ Muvhi u fashwa nga nyambo yawe mmbi; a thetshelesaho Mudzimu ene u tinya khombo.

¹⁴ Muthu u ḽa zwivhuya zwe a wana nga u amba; u pfufhiwa nga zwe a zwi shumela.

¹⁵ Tsilu ḽi vhona nḓila ye ḽa i fara i yone-yone; muṱali u thetshelesa nyeletshedzo.

¹⁶ Zwine zwa dina tsilu a zwi lengi u vhonala; wa vhuṱali u kanda mupfa a tshi u vhona.

¹⁷ Ṱhanzi ya ngoho i tikedza khaṱhulo mbuya, ya mazwifhi yone i ṱuṱuwedza vhufhura.

¹⁸ Maipfi a veveru a runga unga pfumo; lulimi lwa muṱali lu a fhodza.

¹⁹ Ngoho i ḓo ima lini na lini; mazwifhi ha yi thambo.

²⁰ Vhufhura ho fhaṱela mbiluni dza vha no luka vhunwa; vha nyeletshedzo dzi ḓisaho mulalo vha dzula vho takala.

²¹ A no thetshelesa Mudzimu ha na mafhanza; vhavhi vha dzula vhe khomboni.

²² Muṋe washu u nyala mulomo wa mazwifhi; u takalela vha no fulufhedzea.

²³ Muthu wa maano u dzumba nḓivho yawe; tsilu ḽi anḓadza vhutsilu haḽo.

²⁴ Mushumi wa biko u ḓo vhusa; vhubva vhu guma nga vhupuli.

²⁵ U ḽa mbilu lu lemedza muthu; ipfi ḽavhuḓi ḽi a mu khuthadza.

²⁶ A thetshelesaho Mudzimu a tshi konana na muthu u ranga u sedza, hone nḓila ya vhavhi i a vha xedza.

²⁷ Mubva u shaya na phukha ya u gotsha; mushumi wa biko u wana lupfumopfumo.

²⁸ U thetshelesa Mudzimu ndi yone nḓila i isaho vhutshiloni; nḓila yeneyo a i na lufu.