MIRERO 11 - BIVHILI KHETHWA Mafhungo Madifha

¹ Tshikalo tshi no kala zwi si zwone tshi nengisa Muṋe washu; tsho teaho tshi a mu takadza.

² U ḓihudza hu tevhelwa nga ṱhoni; tsha muṱali ndi u ḓiṱukufhadza.

³ U sa solisea ha vha si na vhufhura hu a vha endedza; vha sa fulufhedzei vha ḓo fela nḓila dzavho dza magombikwa.

⁴ Lupfumo a lu farisi tshithu musi wa khaṱhulo; u thetshelesa Mudzimu hu tshidza lufuni.

⁵ U fulufhedzea ha a sa solisei hu mu onyolosela nḓila dzawe, ngeno muvhi a tshi fashwa nga vhuvhi hawe.

⁶ Vhuvhuya ha vha si na vhufhura vhu a vha tshidza, ngeno vha sa fulufhedzei vha tshi fashwa nga nyemulo dzavho.

⁷ Zwe muvhi a zwi fulufhela, a tshi fa zwi lovha nae; maanḓa e a ḓitika ngao ndi mahandana.

⁸ A thetshelesaho Mudzimu u lamukiswa khomboni, ya wela muvhi.

⁹ A no nyadza Mudzimu u vhulaha vhaṅwe nga mulomo wawe, ngeno a thetshelesaho Mudzimu a tshi vha ponyokisa nga nḓivho yawe.

¹⁰ Musi muvhuya zwi tshi mu nakela, muḓi u huvha mihuvho; vhavhi vha tshi lovha hu pfala mifhululu.

¹¹ Muḓi u wana mashudu nga vha si na vhufhura, wa fhaṱwa; mulomo wa muvhi wone u pwasha muḓi.

¹² A no sasaladza vhaṅwe ha na ṱhalukanyo; munna wa ṱhalukanyo u a fhumula.

¹³ Wa zwitshele ha vhudzwi tshiphiri; ane a fulufhedzea u a tshi vhulunga.

¹⁴ Lushaka lu a wa nga u shaya nyeletshedzo, hone ho andaho vhaeletshedzi lu dzula lwo kunda.

¹⁵ Arali wa ḓivhofha u lifhela muṅwe mulandu une a nga u ita, u ḓo ḓisola; ane a lamba u ḓidzhenisa khazwo o ḓirula.

¹⁶ Musadzi u huliselwa vhulenda, hone vhalevhi vha zuwa lupfumo fhedzi.

¹⁷ Munna wa vhuthu u a vhuelwa; wa tshiṱuhu u ḓiṱoḓela mafhanza.

¹⁸ Muvhi u a bindula zwa fhufha; a no zwala mbeu ya vhuvhuya ha nga kundwi u pfufhiwa.

¹⁹ A sa tseki kha u ita zwi re zwone u ḓo tshila; ane a omelela kha vhuvhi u ḓo fa.

²⁰ Muṋe washu u vhenga vha mbilu ya vhufhura; u takalela vha sa solisei.

²¹ Ḓivhani uri: muvhi ha nga kundwi u lifhedzwa; vhana vha vhavhuya vhone vha ḓo wanala vha si na mulandu.

²² Musadzi wa lunako a si na ṱhalukanyo, u nga tshiṅina tsha musuku tshi ningoni ya nguluvhe.

²³ A thetshelesaho Mudzimu u ḓo wana zwivhuya zwine a zwi lila; muvhi ene o lindela ṱhamu fhedzi.

²⁴ Mapakulile u ḓi pfuma a tshi ya; a no dzima na zwo fanelaho vhaṅwe ene u ḓi shaya a tshi ya.

²⁵ A si na vhutshivha u ḓo pfuma; a no dzimula ḓora ḽa vhaṅwe, na ḽawe ḽi ḓo dzimulwa-vho.

²⁶ Ane a hana na mavhele, vhathu vha a mu teketela; hu shudufhadzwa ane a tenda u a rengisa.

²⁷ Ane a ḓidinela u ita zwivhuya u ḓo takalelwa; tshilila-u-vhona-khombo tshi ḓo i vhona.

²⁸ Ane a ḓitika nga lupfumo lwawe u ḓo wa; ane a fulufhedzea zwi ḓo mu nakela, a nga ṱari ḽidala ḽi titimaho.

²⁹ A sa londoli muṱa wawe u ḓo sala na muya; tsilu ḽi ḓo vha phuli ya muṱali.

³⁰ Mitshelo ya ane a thetshelesa Mudzimu i a tshidza; muṱali u kona u tswa mbilu dza vhathu.

³¹ Arali na muvhuya a tshi wana zwo mu fanelaho fhano fhasi, kha muvhi na mutshinyi zwi ḓo tou ngani?