MIRERO 10 - BIVHILI KHETHWA Mafhungo Madifha

Mirero ya Solomoni yo kuvhanganywaho (10:1 – 22:26)

¹ Iyi ndi mirero ya Solomoni. I ri: Ṅwana wa vhuṱali u takadza khotsi awe; ṅwana wa tsilu ene u ḽisa mme awe mbilu.

² Lupfumo lwo wanalaho nga nḓila mmbi a lu na lukuna, hone u pfa Mudzimu zwi tshidza lufuni.

³ Muṋe washu ha ladzi muvhuya na nḓala; vhavhi u vha shaisa zwine vha zwi lila.

⁴ Tshanḓa tsha mubva tshi mu ḓisela vhushai, tsha mushumi wa biko tshone tshi tshi mu pfumisa.

⁵ Ṅwana wa maano ndi ane a kuvhanganya mavhele misi ya nḓalo; ane a lala vha tshi kaṋa u a shonisa.

⁶ Mashudu a wanwa nga a fulufhedzeaho; u levha ha mulomo wa muvhi hu mu ḽa ṱhoho.

⁷ Vhathu vha tshi humbula a fulufhedzeaho vha pfa vho takala; dzina ḽa muvhi ḽone ḽi a sina.

⁸ Muṱali u tenda u laiwa; vavhi ḽi sokou lopola, tshaḽo ndi u lovha.

⁹ A sa solisei a tshi tshimbila ha ofhi tshithu; a no ita zwo vhifhaho u ḓo dzumbululwa.

¹⁰ Vha u sinyedzana vha konḓisela vhaṅwe vhutshilo, vavhi ḽi no sokou lopola tshaḽo ndi u lovha.

¹¹ Mulomo wa a fulufhedzeaho ndi tshisima tsha vhutshilo; u levha ha mulomo wa muvhi hu mu ḽa ṱhoho.

¹² Vengo ḽi vusa nndwa; lufuno lu tsinya iṱo lwa si sedze vhukhakhi.

¹³ Mulomoni wa a na ṱhalukanyo hu na vhuṱali; tsha muṱana wa a si na ṱhalukanyo ndi ṱhamu.

¹⁴ Vhaṱali vha khokha nḓivho; mulomo wa tsilu u ṱula khombo.

¹⁵ Muḓi une vhapfumi vha shavhela khawo ndi lupfumo lwavho; vhushai ha vhadziili ndi ḽone bulayo ḽavho.

¹⁶ A no fulufhedzea u pfufhiwa nga vhutshilo; khaṋo ya muvhi ndi vhuvhi.

¹⁷ Ane a tenda u laiwa o fara i yaho vhutshiloni; a sa tendi u laiwa ú bva nḓilani.

¹⁸ Wa luvhengelambiluni u na milomo ya mazwifhi, a no isela vhaṅwe phungo ndi tsilu.

¹⁹ Wa u ambesa a nga si kundwe u tshinya; a na maano u a fhumula.

²⁰ Lulimi lwa a fulufhedzeaho ndi siliva i songo vangwaho; mbilu ya muvhi ndi mahandana.

²¹ Milomo ya vha thetshelesaho Mudzimu i fusha vhanzhi, ngeno matsilu a tshi fa nga u shaya ṱhalukanyo.

²² Tshine tsha pfumisa ndi mashudu a no bva ha Muṋe washu; u ḓinetisa ha muthu a tshi shuma a zwi engedzi tshithu khao.

²³ Tsilu ḽi tshi ita zwi shonisaho ḽi vhona u mutambo, ngeno mutambo wa a na ṱhalukanyo vhu vhuṱali.

²⁴ Zwine muvhi a zwi ofha, ndi zwone zwine zwa ḓo mu wela; a fulufhedzeaho ene u ḓo ṋewa zwine a zwi tama.

²⁵ Ha bvelela ḓumbu ḽi kumba muvhi, ngeno a fulufhedzeaho a tshi ima o khwaṱha lini na lini.

²⁶ Mubva u netisa a mu rumaho; u nga viniga i tshi tatisa maṋo, u nga vhutsi vhu tshi kombodza maṱo.

²⁷ A no ofha Muṋe washu u a lalama; muvhi ene ha nga yi thambo.

²⁸ Tsho fulufhelwaho nga a fulufhedzeaho tshi guma nga dakalo, hone tshe muvhi a lavhelela ha tshi wani.

²⁹ Muṋe washu ndi vhushavhelo ha o faraho nḓila i sa solisei, ngeno a tshi lozwa vhaitazwivhi.

³⁰ A fulufhedzeaho ha tupuwi na kathihi; muvhi ene ha nga dzuli shangoni.

³¹ A fulufhedzeaho u amba a vhuṱali, hone lulimi lwa a shandaho mafhungo lu ḓo tumulwa.

³² Milomo ya a thetshelesaho Mudzimu i ḓivha u amba zwo teaho, ngeno mulomo wa muvhi u tshi amba zwa magombikwa.