MIRERO 1 - BIVHILI KHETHWA Mafhungo Madifha

Pfunzo ya ino bugu

¹ Iyi ndi mirero ya Solomoni, ṅwana wa Dafita, khosi ya Israele.

² I funza muthu vhuṱali, ya mu laya, a ṱalukanya maipfi a vha re na nḓivho.

³ Ndi nyeletshedzo i no funza muthu u tshila nga vhuronwane, e kwae, a tshi ita zwi re zwone, a si na vhufhura,

⁴ mushaanzhele a vha na nzhele, muṱhannga a vha na nḓivho na vhusedzi.

⁵ Na munna wa vhuṱali nga a thetshelese a engedze nḓivho yawe, wa ṱhalukanyo a wane vhutsila,

⁶ a konou ṱalukanya zwine vhaṱali vha amba: mirero yavho, na zwiga, na dzithai.

U laya vhaṱhannga

⁷ U ofha Mudzimu ndi tshone tshisima tsha vhuṱali; matsilu ndi one a no nyadza vhuṱali na u laiwa.

⁸ Ṅwananga, thetshelesa khotsi au a tshi u laya, u si hane mme au a tshi u funza.

⁹ Ndi tshone tshiala tshi tondaho ṱhoho yau, ndi hone vhulungu vhu nakisaho mukulo wau.

¹⁰ Ṅwananga, arali vhavhi vha tshi u kunga, u songo tenda.

¹¹ Arali vha tshi ri, “Nga ri yo lalela vhathu ri vha ponde, ri sokou phuthuma a sa huvhadzi muthu;

¹² nga ri tou nga lufu, ri vha mile vha tshi kha ḓi tshila, vha godimele tshaloni vhá songo lwala!

¹³ Ri ḓo wana lupfumo lwa tshakha-tshakha, ra ḓadza nnḓu dzashu ngalwo.

¹⁴ Ita madeṅwa na riṋe, ri kovhekane tshelede!”

¹⁵ Ṅwananga, u songo tshimbila navho, u songo longa mulenzhe wau nḓilani yavho;

¹⁶ milenzhe yavho i gidimela vhuvhini, vha gidimela u shulula malofha.

¹⁷ Tshenzhela unga tshiṋoni tshine muthu a tshi rea tsho mu sedza.

¹⁸ Havha vhathu vha lalela malofha a vhone vhaṋe; khunḓa i ḓo fasha muvei.

¹⁹ Hoho ndi hone vhuyo ha vhane vha bindula nga vhuvemu; ulwo lupfumo lu vha ḽa ṱhoho.

Vhuṱali vhu tshi vhidzelela

²⁰ Vhuṱali vhu khou vhidzelela vhú gondoni,

²¹ vhu ṱavha mukosi ho ḓalaho vhathu, vhu amba vhu mafhoroni a miḓi, vhu ri,

²² “Inwi ni si na nzhele, ni ḓo shaya nzhele u swika lini? Vhanyefuli vha ḓo nyefula u swika lini? Matsilu a ḓo vhenga nḓivho u swika lini?

²³ Thetshelesani ndi tshi ni kaidza, ndi hone ndi tshi ḓo ni eletshedza, nda ni shululela zwa mbiluni yanga.

²⁴ Ndo ni vhidza na lamba u nthetshelesa, nda ni vhidza nga tshanḓa na si zwi dzhiele nzhele.

²⁵ A no ngo londa nyeletshedzo dzanga, ndi tshi ni kaidza na si tende.

²⁶ Ndi zwone, ní khomboni ndi ḓo ni sea-vho, ni tshi welwa nga nyofho nda ni holedza.

²⁷ Musi zwi ofhisaho zwi tshi ni wela unga ḓumbu, khombo i tshi ni swiela unga tshiḓumbumukwe, vhuṱungu na phanzi zwi tshi ni tsikeledza,

²⁸ ndi hone ni tshi ḓo nṱavhela mukosi nda si aravhe, na nṱoḓa nga maṱo matswuku na si nngwane.

²⁹ Hufha no vhenga nḓivho, na si nange u ofha Muṋe washu.

³⁰ A no ngo thetshelesa nyeletshedzo dzanga, no nyadza ndi tshi ni kaidza.

³¹ Ndi zwine na ḓo kaṋa zwe na zwala, na fura vhufhura haṋu.

³² Vha si na nzhele vha konyolela matanda nḓevheni, vha fa ngazwo, matsilu a vhulawa nga u ḓiḓivha havho.

³³ Huno, a no nthetshelesa u ḓo tshila nga mulalo, a sa dinwi nga tshithu, a sa ofhi khombo.”