MIKA 5 - BIVHILI KHETHWA Mafhungo Madifha

¹ Hone nṋe ndi ri: Iwe muḓi wa dzimmbi, kuvhanganya mmbi dzau! Uvha ro govhelwa! Vha ḓo rwa luṱaha lwa muvhusi wa Israele nga tshibonda

² Muṋe washu u ri, “Huno iwe Betlehema Efratha, naho u muṅwe wa mivhundu miṱuku ya Juda, kha iwe ndi ḓo bebelwa muvhusi wa Israele, lutsinga lwa muṱa wawe lu bva kule, lwo thoma misi ya kale-kale.”

³ Zwenezwo Muṋe washu u ḓo kumedza Vhaisraele maswina avho u swika tshifhinga tshine musadzi a re muthu wa thovhela a ḓo beba ṅwana, ndi hone na vharathu vhaṅwe vhoṱhe vha muvhusi vha tshi ḓo vhuelela ha Vhaisraele vha havho.

⁴ U ḓo takuwa a lisa sambi ḽawe ḽa nngu nga maanḓa a no bva ha Muṋe washu, nga vhugala ha dzina ḽa Muṋe washu Mudzimu wawe ḽi re na bvumo. Vha ḓo dzula vha sa ofhi tshithu, ngauri vhuhulu hawe vhu ḓo vhonala u swika vhugumoni ha ḽifhasi.

⁵ U ḓo vha ene mulalo washu. Vhaporofita vha hanedza vha ri, “Hu ḓo ri Vhaashuru vha tshi dzhena shangoni ḽashu, vha kanda miḓini yashu i re na mitsheṱo, ri ḓo vha rambela vhalisa vha dzitshakha vhaṱanu na vhavhili na mahosi a vhannḓa vhaṱanu na vhararu.

⁶ Vha ḓo vhusa shango ḽa Ashuru nga pfumo, vha ḓo vhusa shango ḽa Nimirodo vho fara mapanga. Vhaashuru vha tshi dzhena shangoni ḽashu, vha tshi tshoṱhela nga masakhani ashu, Khosi yashu i ḓo ri lamulela.”

Vhaisraele vha misi i ḓaho vhe vhukati ha dzitshakha

⁷ Nṋe ndi ri: Tsalela dza Jakopo vha misi i ḓaho, vha ḓo vha vhe vhukati ha tshakha dzoṱhe vha tshi nga ṅwando u no wa u tshi bva ha Muṋe washu, vha tshi nga vhusuṱo vhu no nela hatsi. A vha nga ḓitiki nga muthu zwawe, a vha nga fulufheli muthu wa ṋama.

⁸ Hone vhaporofita vha ri, “Tsalela dza Jakopo vha misi i ḓaho vha ḓo vha vhe vhukati ha dzitshakha, vhukati ha tshakha dzoṱhe vha nga ndau vhukati ha phukha dza ḓaka, vha nga ndau vhukati ha masambi a nngu, i a dzi fhaḓa, ya dzi fara, ya dzi fhandula, dza si vhe na muponyokisi.

⁹ Angaladza tshanḓa, Israele, u die maswina, vhoṱhe vhane vha lwa na iwe nga vha lovhe!”

Khaṱhulo i ḓaho

¹⁰ “Yahavee a tshi haṱula dzitshakha o ri, ‘Musi wonoyo ndi ḓo lozwa bere dzaṋu na si tsha vha nadzo, nda pwashekanya gariki dzaṋu dza nndwa.

¹¹ Ndi ḓo phusukanya miḓi ya shango ḽa haṋu, nda thutha mitsheṱo yaṋu.

¹² Ndi ḓo fhelisa zwa manditi, na si tsha ita zwa u bvumba.

¹³ Ndi ḓo pwasha zwifanyiso zwaṋu zwo vhaḓwaho na matombo aṋu a zwitungulo na si tsha vha nazwo; a ni tsha ḓo gwadamela zwithu zwe na vhumba nga zwanḓa zwaṋu.

¹⁴ Ndi ḓo tupula zwifanyiso zwa thanda zwa Ashera mudzimu wa musadzi, nda phusukanya miḓi yaṋu.

¹⁵ Tshakha dze dza si nthetshelese ndi ḓo dzi lifhedza nga mbiti ndo sinyuwa.’ ”