MIKA 4 - BIVHILI KHETHWA Mafhungo Madifha

Vhaporofita vha khole-khole vha tshi fhindula Mika nga vhuporofita ha Yesaya

¹ Vhaporofita vha ri, “Hufha Yahavee o ri fulufhedzisa mulalo. O ri, ‘Misi i ḓaho, thavha ya thembele ya Yahavee i ḓo vha yone khulwane kha thavha dzoṱhe, i ḓo takulelwa nṱha ya fhira mivhundu, tshakha dzi ḓo rwa muduba dzi tshi ḓa khayo.

² Tshakha nnzhi dzi ḓo ḓa dza ri: Iḓani ri gonye thavha ya Yahavee, ri ye nḓuni ya Mudzimu wa Jakopo. U ḓo ri funza nḓila dzawe, ra tshimbila ngadzo. Ndi uri ndayo i ḓo bva i Tsioni, ipfi ḽa Muṋe washu ḽi ḓo bva Jerusalema.

³ U ḓo lamulela tshakha nnzhi, tshakha dza maanḓa u ḓo dzi pfumedzanya, na dza mashango a kule. Mapanga avho vha ḓo a fula vha ita malembe ngao, mafumo avho a vha phanga dza u khwathela. Lushaka a lu tsha ḓo bvela luṅwe pfumo, a vha tsha ḓo guda zwa nndwa.

⁴ Muṅwe na muṅwe u ḓo dzula murunzini wa munḓirivhe wawe, na wa muhuyu wawe, a hu na ane a ḓo vha shushedza. Hufha Yahavee Mulangazwoṱhe o ralo Ene muṋe!

⁵ Tshakha dzoṱhe nga dzi ḓitike zwadzo nga midzimu yadzo, riṋe ri ḓo tshila ro fulufhela maanḓa a Yahavee Mudzimu washu lini na lini.’ ”

Vhaporofita vha khole-khole: “Vhaisraele vho balanganaho vha ḓo kuvhanganywa Tsioni”

⁶ “Yahavee u ri, ‘Musi wonoyo ndi ḓo kuvhanganya zwihole; ndi ḓo vhutha nngu dzo balanganaho. Ndo vha tambudza,

⁷ hone zwihole ndi ḓo zwi ita mbeu ya lushaka luswa, vho thathwaho ndi ḓo vha ita lushaka luhulu. Yahavee u ḓo vha vhusa thavhani ya Tsioni u bva musi wonoyo na lini na lini.

⁸ A vha iwe mutsheṱo wa u linda sambi ḽa nngu, iwe vhushavhelo ha ṅwananyana Tsioni, u ḓo dovha wa ṋewa muvhuso wau, vhuhosi vhu ḓo dovha ha vhuelela Jerusalema ṅwananyana wa lunako.’

⁹ Khefha zwino u tshi lila wa ṱavha mukosi, a u na Khosi naa? Mueletshedzi wau o lovha, zwine wa farwa nga vhuṱungu vhu no nga ha musadzi a tshi ṱoḓou vhofholowa naa?”

¹⁰ Huno nṋe ndi ri: Iwe ṅwananyana Tsioni, ndi zwone, tupuluwa u gomele unga musadzi a tshi ṱoḓou vhofholowa, ngauri zwino u fanela u bva muḓini wa yo fhaṱa mushasha ḓakani. U ḓo ya Babele, wa lamukiswa u henengei. Muṋe washu u ḓo u vhofholola henengei, a u bvisa zwanḓani zwa maswina au.

U fulufhela zwi siho, na u tshidzwa ha vhukuma

¹¹ Vhaporofita vha ri, “Hone zwino tshakha nnzhi dzo u kuvhanganela. Vha ri, ‘Nga a tshipiwe, maṱo ashu nga a ḓiphiṋe nga u vhona matumba a Tsioni!’

¹² Hone a vha ḓivhi mihumbulo ya Yahavee; a vha ṱalukanyi zwe a dzudzanya: u vha kuvhanganya unga ṱhotshe luvhatani lwa u fhulela.

¹³ Yahavee u ri, ‘Hee ṅwananyana Tsioni, takuwa u fhule! Ndi ḓo u ṋea ṋanga dza tsimbi, nda u fha khwanḓa dza musinaseṱha, wa kandekanya tshakha nnzhi. Zwe vha thuba u ḓo zwi kumedza Yahavee, lupfumo lwavho wa lu ṋekedza Muṋe wa ḽifhasi ḽoṱhe.’ ”