MATIOSI 9 - BIVHILI KHETHWA Mafhungo Madifha

Yesu a tshi fhodza munna o omaho miraḓo

¹ Yesu a dzhena tshikepeni a wetshela seli na luḽa lwa dzivha, a swika muḓini wa hawe.

² E henefho vhathu vha ḓisa munna o omaho miraḓo, o ladzwa kha hingo. Yesu a tshi vhona fulufhelo ḽavho a amba na uyo o omaho miraḓo a ri, “Rudzani mbilu ṅwananga, no hangwelwa vhutshinyi.”

³ Vhaṅwe vha vhaḓivhi vha Mulayo vha tshi zwi pfa vha ambela mbiluni dzavho vha ri, “Hoyu munna u khou tamba nga dzina ḽa Mudzimu.”

⁴ Yesu nga u ḓivha mihumbulo yavho a ri, “Khezwi ni tshi elekanya mavhi mbiluni dzaṋu?

⁵ Tshi leluwaho kha hezwi zwivhili ndi tshifhio? Ndi u ri, ‘No hangwelwa vhutshinyi haṋu,’ kana ndi u ri, ‘Takuwani ni tshimbile’?

⁶ Hone Nṋe ndi ḓo ni sumbedza uri Mubebwa-nga-muthu u na maanḓa a u hangwela muthu vhutshinyi fhano fhasi.” Ndi hone a tshi vhudza uḽa munna o omaho miraḓo a ri, “Takuwani zwaṋu ni hwale hingo ḽaṋu ni ye hayani.”

⁷ Uḽa munna a mbo ḓi takuwa a ya hayani.

⁸ Vhathu vho kuvhanganaho vha tshi zwi vhona vha ofha, vha renda Mudzimu we a ṋea muthu maanḓa mangafhongafho.

Yesu a tshi vhidza Matiosi

⁹ Yesu a tshi fhirela phanḓa a vhona muṅwe munna wa muthelisi a no pfi Matiosi o dzula ofisini yawe, a amba nae a ri, “Kha ri ṱuwe roṱhe ni vhe mufunziwa wanga.” A mbo ḓi takuwa a mu tevhela.

¹⁰ Zwino musi Yesu o dzula nḓuni ya Matiosi vha tshi khou ḽa, ha ḓa vhaṅwe vhathelisi vhanzhi na vhatshinyi, vha ḽa na Yesu na vhafunziwa vhawe.

¹¹ Vhafarisei vha tshi zwi vhona vha vhudza vhafunziwa vhawe vha ri, “Nṋa mufunzi waṋu u itelani a tshi ḽa na vhathelisi na vhatshinyi?”

¹² Yesu a tshi zwi pfa a vha fhindula a ri, “Vhathu vha sa lwali a vha lili ṅanga; ṅanga i lilwa nga vhalwadze.

¹³ Iyani ni yo guda uri zwi amba mini hu tshi pfi, ‘A thi ṱoḓi dzinduvho, ndi ṱoḓa muthu a tshi vha na mbilutshilidzi.’ Nṋe a tho ngo ḓela vhavhuya, ndo ḓela vhatshinyi.”

Mafhungo a u ḓidzima

¹⁴ Ndi hone vhafunziwa vha Johanisi vha tshi ḓa ha Yesu vha ri, “Khezwi vhafunziwa vhavho vha sa ḓidzimi, ngeno riṋe na Vhafarisei ri tshi ṱolou ḓidzima?”

¹⁵ Yesu a vha fhindula a ri, “Nṋa ni vhona unga khonani dzi nga ḓa munyanyani wa mbingano dzi tshi ḓela u lila naa? Hufha mukwasha a tshee navho! Hone hu ḓo ḓa maḓuvha ane vha ḓo dzhielwa mukwasha wavho. Ndi hone vha tshi ḓo ḓidzima.

¹⁶ A hu na muthu ane a haswa tshiambaro tsha kale nga sila ḽiswa ḽi sa athu huma, ngauri ḽi tshi vho huma ḽi ḓo kherula na tshiambaro, buli ḽa endelela.

¹⁷ Nahone tuvhu ḽa waini a ḽi sheliwi mikhwamani ya mukumba wa kale, nga u ofha uri mikumba i nga balea musi ḽi tshi vhila, waini ya shuluwa, na mikhwama ya tshinyala. Tuvhu ḽi sheliwa mikhwamani miswa, zwa vhulungea zwoṱhe.”

Ṅwananyana wa Jairosi, na musadzi we a kwama nguvho ya Yesu

¹⁸ Yesu a tshi kha ḓi amba eneo, muṅwe muhulwane a ḓa khae a mu gwadamela a ri, “Ṅwananga wa musidzana u kha ḓi bva u tshinyala. Naho zwo ralo, nga vha ḓe vha mu vhee zwanḓa; u ḓo dovha a tshila.”

¹⁹ Yesu a takuwa a ṱuwa nae e na vhafunziwa vhawe.

²⁰ Vhe nḓilani ha ḓa musadzi we a vha o no fhedza miṅwaha ya 12 e na vhulwadze ha u ṱamba a sa gumi, a ḓa nga murahu ha Yesu a kwama shaphu ḽa nguvho yawe,

²¹ ngauri o vha o humbula a ri, “Nangwe nda tou kwama nguvho yawe zwayo, ndi ḓo fhola.”

²² Yesu a mbo ḓi rembuluwa a mu vhona a ri, “Rudzani mbilu ṅwananga; fulufhelo ḽaṋu ḽo ni tshidza.” Uḽa musadzi a mbo ḓi fhola na zwenezwo.

²³ Zwino Yesu a tshi vho swika nḓuni ya uḽa muhulwane, a tshi vhona vhalidzi vha dziṋanga na vhathu vhoṱhe vho kuvhanganaho vha tshi khou ṱavha mikosi,

²⁴ a amba navho a ri, “Ibvani zwaṋu; ṅwana ho ngo fa o tou eḓela.” Vhathu vha mu nzhonzhowedza.

²⁵ Hone Yesu a vha thathela nnḓa vhoṱhe, a dzhena nḓuni a fara tshanḓa tsha musidzana uḽa o faho, musidzana a dovha a tshila.

²⁶ Zwe Yesu a ita zwa pfala shangoni ḽeneḽo ḽoṱhe.

Yesu a tshi fhodza mabofu mavhili

²⁷ Yesu a tshi fhirela phanḓa a tevhelwa nga vhanna vhavhili vha mabofu vha tshi khou ṱavha mukosi vha tshi ri, “Murwa Dafita, a ri khathutshelwi-vho na?”

²⁸ Musi a tshi dzhena nḓuni aḽa mabofu a sendela. Yesu a vha vhudzisa a ri, “Nṋa ni a tenda uri ndi na maanḓa a u ni fhodza?” Vha fhindula vha ri, “Ri a tenda Muṋe washu.”

²⁹ Ndi hone Yesu a tshi kwama maṱo avho a ri, “Nga hu itee zwenezwo zwine na fulufhela.”

³⁰ Maṱo avho a mbo ḓi vhona. Ndi hone Yesu a tshi vha laya o tou halifha a ri, “Ni khou vhona: hezwi zwi songo vhuya zwa ḓivhiwa nga muthu na muthihi!”

³¹ Hone vhone vho ri u bva henefho vha mbo ḓi yo anḓadza mafhungo ayo shangoni ḽeneḽo ḽoṱhe.

Tshimuma tshe tsha vha tshi na thuṅwa

³² Musi vhaḽa vha tshi khou ṱuwa ha ḓiswa ha Yesu tshimuma tshe tsha vha tshi na thuṅwa ya Saṱhane.

³³ A i pandela, tshimuma tsha mbo ḓi amba. Vhathu vha kanuka vha ri, “A hu athu vhuya ha vhonwa zwi no nga hezwi kha ḽa Israele.”

³⁴ Hone Vhafarisei vha ri, “U pandela thuṅwa nga maanḓa e a ṋewa nga khosi yadzo.”

U hula ha khaṋo

³⁵ Yesu a mbo tshimbila na miḓi yoṱhe na dziḓorobo, a tshi enda a tshi funza sinagogoni, a tshi ḓivhadza mafhungo maḓifha a muvhuso wa Mudzimu, a tshi fhodza malwadze oṱhe na maṱungu oṱhe.

³⁶ A tshi vhona magogo a vhathu a vha pfela vhuṱungu, ngauri vho vha vha tshi fana na nngu dzi si na mulisa, dzo no hanganea dzo ṱovhowa.

³⁷ Ndi hone a tshi vhudza vhafunziwa vhawe a ri, “Khaṋo ndi khulu, vhakaṋi ndi vha si gathi.

³⁸ Humbelani-ha Muṋe wa tsimu uri a rume vhakaṋi tsimuni yawe.”