MATIOSI 7 - BIVHILI KHETHWA Mafhungo Madifha

U haṱula vhaṅwe

¹ “Ni songo haṱula vhaṅwe, ndi hone Mudzimu a sa nga ni haṱuli.

² Khaṱhulo ine na haṱula vhaṅwe ngayo na inwi Mudzimu u ḓo ni haṱula ngayo; muelo une na elela vhaṅwe ngawo, na inwi Mudzimu u ḓo ni elela ngawo.

³ Khezwi u tshi kona u vhona lufhanza lu re iṱoni ḽa muṅwe, ngeno danda ḽi re iṱoni ḽau u sa ḽi londi?

⁴ Nṋa u nga amba hani na muṅwe wa ri, ‘Litshani ndi bvise lufhanza lu re iṱoni ḽaṋu,’ ngeno iwe u na danda iṱoni ḽau?

⁵ Muhoi ndiwe! Thoma u bvisa danda ḽi re iṱoni ḽau, ndi hone u tshi ḓo kona u vhona zwavhuḓi u tshi bvisa lufhanza lu re iṱoni ḽa muṅwe.

⁶ “Zwikhethwa ni songo zwi ṋea dzimmbwa, dzi sa ḓo ni vutshela dza ni huvhadza; na nungu dzaṋu ni songo dzi posa nguluvhe, dzi sa ḓo sokou dzi kandekanya.

Mudzimu u pfa thabelo dzashu

⁷ “Ni ḓi dzula ni tshi humbela, ni ḓo ṋewa; ṱoḓani, ni ḓo wana; khokhonyani, ni ḓo vulelwa vothi.

⁸ Ane a dzula a tshi humbela, Mudzimu u ḓo vhuya a mu fha; ane a ṱoḓa u ḓo wana; ane a khokhonya u ḓo vhuya a vulelwa vothi.

⁹ Ndi nnyi ane ṅwana wawe a tshi mu humbela vhurotho a mu fha tombo,

¹⁰ kana a tshi mu humbela khovhe a mu fha ṋowa?

¹¹ Arali inwi na vhuvhi háṋu ni tshi kona u ṋea vhana vhaṋu zwivhuya, Khotsi aṋu wa ṱaḓulu a nga kundwa ngani u ṋea zwivhuya vha mu humbelaho?

Ndaela-ndaela

¹² “Zwoṱhe zwine na funa vhaṅwe vha tshi ni ita, na inwi ni vha ite zwenezwo. Ndi hone no khunyeledza Mulayo na Maṅwalo a vhaporofita.

Nḓila mbili

¹³ “Dzhenani nga khoro tsekene; nḓila i yaho hune wa lovha yo aṱama, na khoro ya hone ndi khulwane, ndi vhanzhi vhane vha dzhena ngayo.

¹⁴ Nḓila i yaho vhutshiloni ndi tsekene-tsekene, na khoro yayo ndi ṱhukhu, vhane vha i wana a si vhanzhi.

Vhaporofita vha khole-khole na mitshelo yavho

¹⁵ “Thanyelani vhaporofita vha khole-khole vhane vha ḓa kha inwi vho fuka mikumba ya nngu, ngeno nga ngomu havho vhe maṱalerwa a ni pondaho.

¹⁶ Ni ḓo vha ḓivha nga mitshelo yavho. A ri fuli nḓirivhe kha muunga; mahuyu ri a wana kha mutshetshete na?

¹⁷ Muri wavhuḓi u aṋwa mitshelotshelo, u vhavhaho wa aṋwa mitshelo i kalakataho.

¹⁸ Muri wavhuḓi a u aṋwi mitshelo i kalakataho, zwi ḓi nga muri u vhavhaho u sa aṋwi mitshelo i ḓifhaho.

¹⁹ Muri muṅwe na muṅwe u sa aṋwi mitshelo i ḓifhaho u a remiwa wa kudzwa muliloni.

²⁰ Izwo-ha ni ḓo vha ḓivha nga mitshelo yavho.

Vhatendi vha khole-khole

²¹ “A si uri vhoṱhe vhane vha tshi nnyamba vha ri, ‘Muṋe washu! Muṋe washu!’ vha ḓo dzhena muvhusoni wa Mudzimu, hu ḓo dzhena vhane vha ita zwine Khotsi anga wa ṱaḓulu a zwi funa.

²² Ndi vhanzhi vhane vha ḓo amba na Nṋe nga heḽo ḓuvha vha ri, ‘Muṋe washu! Muṋe washu! A ro ngo porofita nga dzina ḽau naa? A ro ngo pandela thuṅwa nga dzina ḽau naa? A ro ngo ita maḓembe mahulu nga dzina ḽau naa?’

²³ Nda konou amba navho nda vha fhedzela nda ri, ‘A tho ngo vhuya nda ni ḓivha; ṱuwani afha phanḓa hanga inwi vhadziautshinya!’

Muteo kwawo na u si kwawo

²⁴ “Zwenezwo onoyo ane a pfa maipfi anga haya a ya a zwi ita, u fana na muthu wa vhuṱali ane a fhaṱa nnḓu yawe kha lutombo.

²⁵ Mvula ya na, milambo ya ḓala, maḓumbu a vhudzula, a thudza iḽa nnḓu i si we, ngauri yo vha yo tewa kha lutombo.

²⁶ Hone ane a pfa maipfi anga haya a si zwi ite, u fana na muthu wa tsilu we a fhaṱa nnḓu yawe muṱavhani;

²⁷ mvula ya na, milambo ya ḓala, maḓumbu a vhudzula a thudza iḽa nnḓu, ya mbo fhasi huru.”

U akhamala ha vhathu vho pfaho pfunzo ya Yesu

²⁸ Musi Yesu o fhedza u amba, vhathu vha kanuka pfunzo yawe,

²⁹ ngauri o vha a sa funzi sa vhaḓivhi vha Mulayo, o vha a a tshi pfala e Muṋe wa mafhungo.