MATIOSI 5 - BIVHILI KHETHWA Mafhungo Madifha

Pfunzo ya thavhani (Matiosi 5 – 7) Vha re na mashudu

¹ Yesu a tshi vhona magogo ayo a gonya thavha a dzula fhasi. Vhafunziwa vhawe vha sendela,

² a thoma u amba a vha funza a ri,

³ “Mashudu vhane vha ḓivha uri a vha na tshavho, vha ḓitikaho nga Mudzimu fhedzi: muvhuso wa Mudzimu ndi wa vhenevho.

⁴ Mashudu vha lilaho: vhane vha ḓo fhumudzwa ndi vhenevho.

⁵ Mashudu vho vuḓaho: vhane shango ḽa ḓo vha ifa ḽavho ndi vhenevho.

⁶ Mashudu vhane vha tama vhuvhuya ho no ḓi vha hone zwa nga nḓala na ḓora: vhane vha ḓo fushwa ndi vhenevho.

⁷ Mashudu vha na mbilutshilidzi: vhane vha ḓo itelwa tshilidzi ndi vhenevho.

⁸ Mashudu vha mbilu dzo ṱambaho: vhane vha ḓo vhona Mudzimu ndi vhenevho.

⁹ Mashudu vhaladzashango: vhane vha ḓo pfi vhana vha Mudzimu ndi vhenevho.

¹⁰ Mashudu vhane vha tovholelwa vhuvhuya: muvhuso wa Mudzimu ndi wa vhenevho.

¹¹ Ni na mashudu arali vhathu vha tshi ni sema, vha tshi ni tovhola, vha tshi ni pomoka vhuvhi hoṱhe nge na vha vhanga.

¹² “Takalani ni pembele, ngauri ngei ṱaḓulu ni ḓo wana pfufho khulu. Hufha na vhaporofita vha misi iḽa ya kale vho ḓi vha tovhola nga u ralo.

Muṋo wa shango na tshedza tshaḽo

¹³ “Inwi ni muṋo wa shango. Hone arali muṋo wa rothola u kha ḓi ḓo lungwa nga mini? A u tshee na mushumo, tshawo ndi u laṱwa nnḓa wa kandekanywa nga vhathu.

¹⁴ “Inwi ni tshedza tsha shango. Muḓi wo fhaṱwaho nṱha ha thavha a u koni u dzumbama.

¹⁵ Ndi nnyi-vho ane a ri u funga luvhone a lu tiba nga mvuvhelo? Ha lu vhei vhudzuloni halwo kani, uri lu vhonetshele vhoṱhe vha re henefho nḓuni?

¹⁶ Na tshaṋu tshedza kha tshi dzule tshi tshi vhonetshela vhathu nga u ralo, uri vha vhone mishumo yaṋu mivhuya vha rende Khotsi aṋu wa ṱaḓulu.”

Yesu na Mulayo wa Mudzimu

¹⁷ “Ni songo ri ndo ḓa u thutha Mulayo na Maṅwalo a vhaporofita; a tho ngo ḓela u thutha ndo ḓela u khunyeledza.

¹⁸ Zwino ipfani-ha: ḽiṱaḓulu na ḽifhasi zwi nga kha ḓi lovha, hone kha Mulayo hu nga si lovhe na ‘i’ nthihi kana kuswayo zwakwo; zwi ḓo khunyeledzwa zwoṱhe.

¹⁹ “Ngauralo ane a laṱa na ṱhukhu zwayo kha ndaela idzi a funza vhathu uri vha i laṱe-vho, ndi ene ane a ḓo pfi muṱuku muvhusoni wa Mudzimu. Hone ane a i tevhedza, a funza na vhaṅwe uri vha i tevhedze, ndi ene ane a ḓo pfi muhulwane muvhusoni wa Mudzimu.

²⁰ Zwino ipfani-ha: arali vhuvhuya haṋu vhu sa fhiri ha vhaḓivhi vha Mulayo na Vhafarisei, ni nga si vhuye na dzhena muvhusoni wa Mudzimu.

Vhupondi na mbiti

²¹ “No zwi pfa vha kale vha tshi laiwa ha pfi, ‘U songo vhulaha muthu; tsha muvhulahi ndi u haṱulwa.’

²² A vha Nṋe ndi a ni vhudza ndi ri: ane a vhuya a sinyutshela muṅwe, tshawe ndi u haṱulwa; ane a lidzela muṅwe tsaṅwa, tshawe ndi u sengiswa khoroni; ane a ri, ‘ḓabaḓaba iḽi’, tshawe ndi u kudzwa muliloni wa hele.

²³ Zwino-ha arali u tshi yo ṋekedza nduvho yau kha aḽiṱari, u tshi swika wa humbula uri wa hau o u fara nga mbilu,

²⁴ thoma u litsha nduvho yau henefho aḽiṱarini u ye u pfumedzane na wa hau, ndi hone u tshi ḓo kona u ṋekedza nduvho yau.

²⁵ Arali hu na muthu ane a u hwelela, pfana nae ni tshee nḓilani ni sa athu swika khoroni, uri a si u ise kha muhaṱuli, uyo a u fhirisela kha mapholisa, one a u kudza dzhele.

²⁶ Thetshelesa ndi u vhudze: u nga si vhuye wa bva u sa athu lifha; u ḓo lifha na sente ya u fhedzisela.

Vhupombwe na u ṱalana

²⁷ “No zwi pfa hu tshi pfi, ‘U songo ita vhupombwe.’

²⁸ A vha Nṋe ndi ni vhudza ndi ri: ane a lavhelesa musadzi lwa u mu emula o no ḓi ita vhupombwe nae mbiluni yawe.

²⁹ Ngauralo arali iṱo ḽau ḽa tshauḽa ḽi tshi u khakhisa, nongola u laṱe; ndi khwiṋe hu tshi lovha muraḓo muthihi zwawo u fhira musi muvhili woṱhe u tshi kudzwa heleni.

³⁰ Arali tshanḓa tshau tshauḽa tshi tshi u khakhisa, tumula u laṱe; ndi khwiṋe hu tshi lovha muraḓo muthihi zwawo u fhira musi muvhili woṱhe u tshi ya heleni.

³¹ “Hu pfi, ‘Ane a ṱala musadzi wawe u fanela u mu fha vhuṱanzi ha u ṱalana.’

³² A vha Nṋe ndi a ni vhudza ndi ri: ane a ṱala musadzi wawe arali hu si nga mulandu wa vhupombwe, u mu itisa vhupombwe; na onoyo ane a vhinga musadzi o ṱalwaho u ita vhupombwe.

Muano

³³ “No dovha na zwi pfa vha kale vha tshi vhudzwa ha pfi, ‘U songo anela mazwifhi; zwe wa anela Mudzimu u zwi ite.’

³⁴ A vha Nṋe ndi ni vhudza uri ni songo ana na kathihi. Ni songo ana nga ḽiṱaḓulu, ngauri ndi khuluṋoni ya Mudzimu.

³⁵ Ni songo ana nga ḽifhasi, ngauri ndi vhukando ha milenzhe yawe. Ni songo ana nga Jerusalema, ngauri ndi musanda wa Khosi Khulu.

³⁶ Na ṱhoho yaṋu ni songo ana ngayo; hufha ni sa koni u shandukisa muvhala wa luvhudzi na luthihi zwalwo lwa vha lutshena kana lurema.

³⁷ Tshaṋu nga hu vhe u fhedza nga u ri, ‘Iina’ kana ‘Hai’. Zwi no fhira zwenezwo zwi bva kha Muvhi.

U ḓilifhedzela

³⁸ “No zwi pfa hu tshi pfi, ‘Iṱo ḽi lifhedzwa nga iṱo; iṋo ḽi lifhedzwa nga iṋo.’

³⁹ A vha Nṋe ndi a ni vhudza ndi ri: U songo pikisa muthu muvhi. Ane a u rwa nga mulaṱela kha heḽi shama, u mu ṋekedze na ḽinwe.

⁴⁰ Ane a u hwelela nga mulandu wa badzhi u mu fhe na hemmbe.

⁴¹ Ane a u kombetshedza u mu fhelekedza khilomitha nthihi, u mu fhelekedze mbili.

⁴² Ane a u humbela tshithu u mu fhe; ane a funa u adzima tshiṅwe tshithu u songo mu dzima.

U funa maswina

⁴³ “No zwi pfa hu tshi pfi, ‘U fune wa hau, swina ḽau u ḽi vhenge.’

⁴⁴ A vha Nṋe ndi a ni vhudza ndi ri: funani maswina aṋu; rabelelani vha ni tovholaho;

⁴⁵ ndi hone ni tshi ḓo vha vhana vha Khotsi aṋu wa ṱaḓulu. Hufha Ene a tshi tshisela ḓuvha ḽawe vhavhi khathihi na vhavhuya, na vha mu thetshelesaho na vha sa mu thetshelesi a tshi vha nisela mvula vhoṱhe.

⁴⁶ Arali ni tshi funa vhenevho fhedzi vhane vha ni funa ni ḓo vha na pfufho-ḓe? Hufha na vhathelisi vha tshi zwi ita.

⁴⁷ Arali ni tshi reshana na vha haṋu fhedzi ni ita zwifhio zwi no fhira zwa vhaṅwe? Hufha na vhannḓa vha tshi zwi ita.

⁴⁸ Inwi ivhani vhavhuya vha si na tshiṱahe, unga Khotsi aṋu wa ṱaḓulu e muvhuya a sa ṱahedzi.