MATIOSI 3 - BIVHILI KHETHWA Mafhungo Madifha

Johanisi Mulovhedzi

¹ Misi yeneyo ho ḓa Johanisi Mulovhedzi Phangani ya Judia, a ḓa na pfunzo

² ine ya ri, “Laṱani vhuvhi haṋu; tshifhinga tsho sendela tsha uri ni vhuswe nga Mudzimu.”

³ Johanisi ndi ene we a dzula o ambiwa nga muporofita Yesaya a tshi ri, “Hu na muthu a huwelelaho sogani! U ri, ‘Lugiselani Muṋe washu nḓila, i tou tswititi, i tshimbilee!’ ”

⁴ Johanisi o vha o ambara nguvho ya vhukuse ha gamela, khunduni o i vhofha nga bannda ya mukumba, zwiḽiwa zwawe zwi nzie na ṋotshi dza ḓaka.

⁵ Muḓi wa Jerusalema na shango ḽoṱhe ḽa Judia na vhathu vhoṱhe vha thungo dza Jorodani vha ḓa khae

⁶ a vha lovhedza mulamboni wa Jorodani vha tshi bula vhutshinyi havho.

⁷ A tshi vhona na Vhafarisei na Vhasadukei vhanzhi vho ḓa u lovhedzwa, a amba navho a ri, “Dziṋowa ndinwi! Ndi nnyi o ni sevhaho uri ni tinye khaṱhulo ya Mudzimu ine ya khou ḓa?

⁸ Aṋwani-ha mitshelo i sumbedzaho uri vhukuma no laṱa vhuvhi haṋu.

⁹ Ni songo ḓifhima na amba nga tshaṋu na ri, ‘Riṋe ri vhaḓuhulu vha Abrahamu.’ A vha nṋe ndi ri, Mudzimu u na maanḓa a u itela Abrahamu vhana nga matombo haya!

¹⁰ Iṱali mbaḓo yo no ḓi dzula yo angaladzwa tsindeni ḽa muri; muri muṅwe na muṅwe une wa si aṋwe mitshelotshelo u ḓo remiwa wa kudzwa muliloni.

¹¹ “Nṋe ndi ni lovhedza nga maḓi u sumbedza uri no laṱa vhuvhi haṋu, fhedzi hu si kale hu ḓo ḓa ane a mphira kule, lune ndi si vhuye nda fanela na u mu farela navhula dzawe; Ene u ḓo ni lovhedza nga Muya Mukhethwa na nga mulilo.

¹² U ḓa o fara luselo lwawe. U ḓo fhefhera mavhele a a shela ḓuluni. Mungu wone u ḓo u fhisa nga mulilo u sa dzimi.”

U lovhedzwa ha Yesu

¹³ Ndi hone hu tshi swika Yesu a tshi bva Galelia, a ḓa Jorodani ha Johanisi uri a lovhedzwe-vho ngae.

¹⁴ Johanisi a edzisa u hana a ri, “Ho vha ho fanela u lovhedzwa nṋe nga Vhone, zwino khezwi vha tshi ḓa kha nṋe!”

¹⁵ Yesu a mu fhindula a ri, “Ni songo hana hezwino: zwo ri fanela u ita hezwi uri ri khunyeledze zwoṱhe zwo tiwaho nga Mudzimu.” Ndi hone Johanisi a tshi tenda.

¹⁶ Yesu a ri u lovhedzwa, a tshi bva maḓini ḽiṱaḓulu ḽa mbo ḓi vulea, Johanisi a vhona Muya wa Mudzimu a tshi tsa e kha tshivhumbeo tsha ḽiivha a kavha kha Yesu.

¹⁷ Ha pfala ipfi ḽi bvaho ṱaḓulu ḽi tshi ri, “Hoyu ndi Murwa wanga muthihi fhedzi; u a ntakadza!”