MATIOSI 19 - BIVHILI KHETHWA Mafhungo Madifha

Lwendo lwa u fhedzisela lwa u ya Jerusalema

¹ Musi Yesu o fhedza u amba eneo a ṱuwa Galelia a ṱutshela thungo dza Judia seli ha Jorodani.

² A tevhelwa nga vhathu vhanzhi-vhanzhi, a vha fhodza malwadze avho henefho.

A u ṱalana

³ Vhaṅwe Vhafarisei vha ḓa ha Yesu vha tshi ri vha mu fashe vha ri, “Nṋa munna u a tendelwa u sokou ṱala musadzi wawe nga zwidandu zwi si na mushumo naa?”

⁴ A vha fhindula a ri, “Nṋa a ni athu vhala uri o vha sikaho u thomani o vha sika vhe munna na musadzi?

⁵ Ndi zwe a ri, ‘Munna u ḓo ṱutshela khotsi awe na mme awe a vhofhekana na musadzi wawe, vhuvhili havho vha vha ṋama nthihi.’

⁶ Ngauralo a vha tshee vhavhili, vho no vha ṋama nthihi. Zwino zwo vhofhekanywaho nga Mudzimu, muthu a songo zwi fhandekanya.”

⁷ Vha mu fhindula vha ri, “Khezwi Mushe o ri tendela uri munna a nga fha musadzi wawe luṅwalo lwa u ṱala a konou litshana nae a ṱuwa?”

⁸ A vha fhindula a ri, “Mushe a tshi vhuya a ni tendela u ṱala vhasadzi ndi nge a vhona ni sa pfi, hone u rangani zwithu zwi tshi sikwa zwo vha zwi songo ralo.

⁹ A vha Nṋe ndi ri: arali musadzi a songo thoma u khakhela munna nga vhupombwe, munna a mu ṱala a dzea muṅwe, onoyo munna u ita vhupombwe.”

¹⁰ Vhafunziwa vha tshi pfa a tshi ralo vha ri, “Arali zwa munna na musadzi zwo ralo ndi khwiṋe muthu a si na musadzi.”

¹¹ A vha fhindula a ri, “Hezwo a si vhoṱhe vhane vha zwi kona, zwi konwa nga vhe vha tou fhiwa nga Mudzimu.

¹² Hu na vhe vha tou bebwa vho luvhedzwa, ha vha na vho luvhedzwaho nga vhathu; ha dovha ha vha na vhaṅwe vhe vha tou ḓiilisa uri vha kone u shumela muvhuso wa Mudzimu vha sa thithisei. Ane a zwi kona kha a zwi ite.”

U shudufhadzwa ha vhana vhaṱuku

¹³ Ndi hone vhaṅwe vha tshi ḓisa vhana vhaṱuku ha Yesu uri a vha vhee zwanḓa a vha rabelele, hone vhafunziwa vha vha kaidza.

¹⁴ Hone Yesu a amba a ri, “Litshani vhana vha ḓe ha Nṋe. Ni songo vha dzivhisa; vhane vha ḓo dzhena muvhusoni wa Mudzimu ndi vha no nga vhenevha.”

¹⁵ U ralo a vha vhea zwanḓa a konou fhirela phanḓa.

Munna wa mupfumi

¹⁶ Ha ḓa muṅwe munna a amba na Yesu a ri, “Vhafunzi, ndi ite tshivhuya tshifhio uri ndi wane vhutshilo vhu sa gumi?”

¹⁷ Yesu a fhindula a ri, “Ni mmbudziselani nga zwivhuya? Muvhuya ndi muthihi fhedzi. Hone arali ni tshi tama u dzhena vhutshiloni, tevhedzani ndaela dza Mudzimu.”

¹⁸ A vhudzisa a ri, “Vha amba dzifhio?” Yesu a fhindula a ri, “Ndi amba dzine dza ri, ‘U songo vhulaha; u songo ita vhupombwe; u songo tswa; u songo zwifhelela muṅwe;

¹⁹ u hulise khotsi au na mme au; funa vhaṅwe unga iwe muṋe.’ ”

²⁰ Muṱhannga uyo a fhindula a ri, “Hezwo zwoṱhe ndo zwi tevhedza. Zwino hu tshee ho ṱahela mini?”

²¹ Yesu a fhindula a ri, “Arali ni tshi funa u vha muvhuya o khunyelelaho, tshimbilani ni yo rengisa zwoṱhe zwine na vha nazwo, ni kovhele tshelede vhashai; lupfumo lwaṋu ni ḓo lu wana ṱaḓulu. No no ita zwenezwo ni ḓe ni vhe mufunziwa wanga.”

²² Muṱhannga a tshi pfa ipfi heḽo a ṱuwa o ṱungufhala, ngauri o vha o pfuma nga maanḓa.

²³ Ndi hone Yesu a tshi vhudza vhafunziwa vhawe a ri, “Thetshelesani ndi ni vhudze; mupfumi zwi ḓo mu konḓela u dzhena muvhusoni wa Mudzimu.

²⁴ Ndi khou dovha nda khwaṱhisa nda ri: u dzhena ha mupfumi muvhusoni wa Mudzimu zwi ḓo konḓa u fhira gamela i tshi edzisa u fhira nga buli ḽa ṋeleṱe.”

²⁵ Vhafunziwa vha tshi pfa heḽo vha kanuka nga maanḓa vha ri, “Arali zwo ralo hu nga tshidzwa nnyi-ha?”

²⁶ Yesu a vha lavhelesa a fhindula a ri, “Hezwo vhathu a vha zwi koni, hone Mudzimu u kona zwoṱhe.”

²⁷ Ndi hone Pitrosi a tshi amba na Yesu a ri, “Kha vha dzou vhona riṋe: ro ṱutshela zwoṱhe ra vha vhafunziwa vhavho; ri ḓo wana mini-ha?”

²⁸ Yesu a vha vhudza a ri, “Zwino ipfani-ha: inwi vhe na ntevhela na vha vhafunziwa vhanga, musi zwoṱhe zwo no sikwa nga huswa, musi Mubebwa-nga-muthu a tshi dzula kha khuluṋoni yawe vhugalani hawe, na inwi ni ḓo dzula kha khuluṋoni dza 12 ni tshi vhusa matsinde a 12 a Israele.

²⁹ Nahone muṅwe na muṅwe ane a ṱutshela nnḓu yawe kana vharathu vhawe kana khaladzi dzawe kana khotsi awe kana mme awe kana vhana vhawe kana masimu awe hu u itela Nṋe, u ḓo wana zwi no fhira kule izwo zwe a ṱutshela, a dovha a wana na vhutshilo vhu sa gumi.

³⁰ Hone vhanzhi vhane ṋamusi vha vha vhahulwane vha vho ḓo vha vhone vhaṱuku; vhane vha vha vhaṱuku vha vho ḓo vha vhone vhahulwane.