MATIOSI 1 - BIVHILI KHETHWA Mafhungo Madifha

Lutsinga lwa Yesu

¹ Bugu ya lutsinga lwa Yesu Khristo, Murwa wa Dafita a re murwa wa Abrahamu asiyi:

² Abrahamu o beba Isaka; Isaka a beba Jakopo; Jakopo a beba Juda na vhakomana vhawe na vharathu vhawe;

³ Juda a beba Pheretse na Zera nga Thamara; Pheretse a beba Esromu; Esromu a beba Ramu;

⁴ Ramu a beba Aminadaba; Aminadaba a beba Nahashoni; Nahashoni a beba Salimoni;

⁵ Salimoni a beba Buasi nga Rahaba; Buasi a beba Obede nga Rute; Obede a beba Isai;

⁶ Isai a beba Dafita uḽa wa khosi. Dafita a beba Solomoni nga musadzi we a vha e wa Uria;

⁷ Solomoni a beba Rehabiamu; Rehabiamu a beba Abia; Abia a beba Asa;

⁸ Asa a beba Josafati; Josafati a beba Joramu; Joramu a beba Uzia;

⁹ Uzia a beba Jothamu; Jothamu a beba Ahasi; Ahasi a beba Hiskia;

¹⁰ Hiskia a beba Manase; Manase a beba Amoni; Amoni a beba Josiasi;

¹¹ Josiasi a beba Jakonia na vharathu vhawe vha konou thubelwa Babele.

¹² Musi vho no thubelwa Babele Jakonia a beba Salathiele; Salathiele a beba Zerubabele;

¹³ Zerubabele a beba Abiudi; Abiudi a beba Eliakimu; Eliakimu a beba Azori;

¹⁴ Azori a beba Tsadoko; Tsadoko a beba Akimu; Akimu a beba Eliudu;

¹⁵ Eliudu a beba Eliasere; Eliasere a beba Mathani; Mathani a beba Jakopo;

¹⁶ Jakopo a beba Josefa munna wa Maria we a vha mme a Yesu ane a pfi Khristo.

¹⁷ Ngauralo mirafho yoṱhe u bva kha Abrahamu u swika kha Dafita ndi 14; u bva kha Dafita u swika vha tshi thubelwa Babele ndi 14; u bva kha vhuthubwa u swika kha Mesia ndi 14.

U bebwa ha Yesu Khristo

¹⁸ Mafhungo a u bebwa ha Yesu Khristo ngea: Musi Maria mme awe o fulufhedziswa Josefa, hone vha sa athu dzhena nḓuni, a wanala e muthu wa thovhela nga Muya Mukhethwa.

¹⁹ Zwino Josefa munna wawe nge a vha e muvhuya o vha a sa funi u mu shonisa kha vhathu; ndi zwe a humbula u tou mu ṋenga.

²⁰ A tshi kha ḓi humbula u ita zwenezwo a lora a tshi khou vhona muruṅwa wa Muṋe washu a tshi ri, “Josefa muḓuhulu wa Dafita, u songo ofha u vhinga Maria musidzana wau; zwine a vha nazwo zwi bva kha Muya Mukhethwa.

²¹ Nazwino u ḓo beba ṅwana wa mutukana. U mu rine ḽa Yesu, a ngauri ndi Ene ane a ḓo tshidza vhathu vhawe vhutshinyini havho.”

²² Hezwi zwoṱhe zwo itea uri hu khunyelele ḽe Muṋe washu a amba nga muporofita a tshi ri,

²³ “Musidzana u ḓo vha muthu wa thovhela a beba ṅwana wa mutukana. Onoyo u ḓo pfi Imanuele,” ḽine ḽa amba uri “Mudzimu u na riṋe.”

²⁴ Josefa a tshi karuwa a ita zwenezwo zwe muruṅwa wa Muṋe washu a mu vhudza, a vhinga muselwa wawe,

²⁵ hone ho ngo mu dzhenisa nḓuni a sa athu beba ṅwana wawe. Musi mutukana o no bebwa a mu rina ḽa Yesu.