MARKOSI 5 - BIVHILI KHETHWA Mafhungo Madifha

Yesu a tshi pandela thuṅwa nnzhi dza Saṱhane kha muthu

¹ Zwo no ralo vha wetshela seli ha Dzivha ḽa Galelia, vho livha shangoni ḽa Vhagerasini.

² Yesu a tshi tou bva tshikepeni ha ḓa munna a na thuṅwa dza Saṱhane a tshi bva zwaloni.

³ Hayani hawe ho vha ho no vha henefho zwaloni. Ho vha hu si tshee na we a vha a tshi nga kona u dzula o mu vhofha nga dzitsimbi,

⁴ ngauri lwo vha lwo no vha lunzhi vha tshi mu vhofha milenzhe na zwanḓa nga dzitsimbi, ene a fhedza nga u ṱhukhukanya idzo tsimbi, dza milenzheni a tshi dzi kandekanya. O vha e na maanḓa lwe ha vha hu si na ane a nga mu kona.

⁵ O vha a tshi tendeleka zwaloni na zwikwarani vhusiku na masiari, a tshi zhamba a tshi ḓitshetshekanya nga matombo.

⁶ Musi a tshi vhona Yesu a tshee kulenyana, a mu gidimela a ḓa a mu gwadamela

⁷ a tshi khou ṱavha mukosi muhulu a tshi ri, “Iwe Yesu, Murwa wa Mudzimu wa ṱaḓuluṱaḓulu! U ṱoḓani kha nṋe? Nga Mudzimu, u songo ntshengedza!”

⁸ A tshi ralo Yesu o vha a tshi vho ri thuṅwa dzi bve khae.

⁹ Ndi hone Yesu a tshi mu vhudzisa a ri, “Ni pfi nnyi?” Uyo munna a fhindula a ri, “Ndi pfi Mmbi, ngauri ri tou vha vhanzhi-vhanzhi!”

¹⁰ A ḓi isa phanḓa a tshi kwengweledza Yesu uri a si pandele thuṅwa idzo shangoni iḽo.

¹¹ Henefho tsini-tsini ho vha hu na sambi ḽihuluhulu ḽa nguluvhe dzi tshi khou fundudza-fundudza bamani.

¹² Thuṅwa dza humbela Yesu dza ri, “Kha ri thathelwe zwashu afho nguluvheni, ri tendelwe u dzhena khadzo.”

¹³ Yesu a dzi tendela, dza mbo ḓi bva kha uyo munna dza dzhena kha nguluvhe. Zwi tshi ralo idzo nguluvhe dzoṱhe dza mbo ḓi gidimela luwani dza wela dzivhani, ha vha u nwela khothe. Sambi iḽo ḽo vha ḽi tshi nga swika 2 000.

¹⁴ Vhalisa vhadzo vha shavha, vha yo anḓadza mafhungo ayo muḓini na mivhunduni ya henefho. Vhathu vha bva u yo vhona zwo iteaho.

¹⁵ Vha tshi swika ha Yesu vha vhona uyo munna we a vha e na thuṅwa nnzhi o dzula henefho nae o no ambara zwiambaro, nahone o no vha muthu-muthu; vhoṱhe vha farwa nga nyofho.

¹⁶ Vhe vha zwi vhona vha hanelela vhathu zwe zwa itea kha uyo munna we a vha e na thuṅwa, na zwe zwa itea kha nguluvhe.

¹⁷ Ndi hone vha tshi rabeledza Yesu uri a ṱuwe shangoni ḽavho.

¹⁸ Yesu a tshi vho dzhena tshikepeni uyo munna we a vha e na thuṅwa a mu humbela a ri, “Ndo vha ndi tshi ri ndi nga ṱuwa-vho navho!”

¹⁹ Hone Yesu a si mu tendele, a tou mu vhudza a ri, “Humelani kha vha haṋu, ni vha vhudze zwoṱhe zwe Muṋe washu a ni tonda na uri o ni itela tshilidzi tshingafhani.”

²⁰ Zwi tshi ralo uyo munna a ṱuwa, a buḓekanya shango ḽi no pfi Miḓi-ya-fumi a tshi enda a tshi ḓivhadza vhathu zwe Yesu a mu itela, vhoṱhe vhe vha zwi pfa vha kanuka.

Ṅwananyana wa Jairosi, na musadzi we a kwama nguvho ya Yesu

²¹ Yesu a dovha a wetshela seli na luḽa wa dzivha, khunzikhunzini yaḽo, ha ḓa vhathu vhanzhi-vhanzhi.

²² Henefho ha ḓa muṅwe muhulwane wa sinagogo we a vha a tshi pfi Jairosi, a ri u vhona Yesu a mu gwadamela

²³ a mu humbela nga zwanḓa zwivhili a ri, “Ṅwananyana wanga u khou lwala lune u fa na u tshila tsha vha tshithu tshithihi. Ndi khou tou vha humbela uri vha ḓe vha mu vhee zwanḓa a fhole, a si fe!”

²⁴ Yesu a mbo ḓi takuwa a ṱuwa nae. Na vhaṅwe vhathu vhanzhi-vhanzhi vha ṱuwa nae vha tshi tou mu pwanyeledza thungo dzoṱhe.

²⁵ Zwino ho vha hu na muṅwe musadzi we a vha o no fhedza miṅwaha ya 12 e na vhulwadze ha u ṱamba a sa gumi.

²⁶ O vha o no tambula nga u ṱanganya dziṅanga ha sokou vha u tambisa tshelede yawe yoṱhe, a sa vhuyi a vha khwiṋe, vhulwadze vhu tshi ḓi hulela vhu tshi ya.

²⁷ O vha o pfa a Yesu. Ndi hone a tshi ḓa khae nga murahu a tshi tou vhanyuludza vhathu, a kwama nguvho yawe

²⁸ a tshi ri, “Naho nda nga tou kwama nguvho yawe ndi ḓo fhola.”

²⁹ U bva ha malofha ha mbo ḓi kaṱuwa na zwenezwo, a tou ḓipfa na ene muṋe uri o fhola.

³⁰ Yesu a ri u pfa uri maanḓa awe o bva a shuma zwiṅwe, a rembuluwa henefho vhukati ha gogo a vhudzisa a ri, “Ndi nnyi we a kwama nguvho yanga?”

³¹ Ndi hone vhafunziwa vhawe vha tshi mu fhindula vha ri, “Hufha vha tshi khou zwi vhona uri vho tangiwa nga vhathu vhanzhi-vhanzhi, vha kha ḓi vhuya vha vhudziselani uri vho kwamiwa nga nnyi?”

³² Hone Yesu a ḓi sedza thungo dzoṱhe uri a vhone we a mu kwama.

³³ Musadzi a tshi vhona zwo iteaho khae a ḓa phanḓa ha Yesu a tshi tou tetemela nga nyofho, a gwadama a mu vhudza ngoho yo ḓalaho.

³⁴ Yesu a amba nae a ri, “Ṅwananga, fulufhelo ḽaṋu ḽo ni fhodza, tshimbilani zwaṋu no rudza mbilu, ni dzule no takala.”

³⁵ Musi Yesu a tshi kha ḓi ralo ha mbo ḓi swika vhaḓinḓa vha bvaho muḓini wa Jairosi, vha amba nae vha ri, “Ṅwananyana wavho o no ḓi ri sia; vha kha ḓi ṱolou dinelani Vhafunzi?”

³⁶ Yesu a sa vhuye a ḓidina nga zwe vha vha vha tshi khou amba, a amba na Jairosi a ri, “Vha songo ofha tshithu, tshavho nga hu vhe u fulufhela Mudzimu.”

³⁷ A tshi fhirela phanḓa a si tende vhathu vhaṅwe vha tshi ṱuwa nae, a ṱuwa na Pitrosi na Jakopo na murathu wawe Johanisi fhedzi.

³⁸ Vha tshi swika muḓini wa Jairosi Yesu a wana ho sokou vuwa bonyongo, vhaṅwe vha tshi khou zhamba, vhaṅwe vha tshi ṱavha mikosi.

³⁹ Yesu a dzhena nḓuni a ri, “Ndi bonyongo ḽani-ha iḽi? Ni khou lilelani? Hufha ṅwana uyu a songo fa o tou eḓela.”

⁴⁰ Vha thoma u mu sea, Ene a mbo ḓi vha thathela nnḓa vhoṱhe, a vhidza khotsi a ṅwana na mme a ṅwana khathihi na vhafunziwa vhawe vhararu, vha dzhena he ṅwana a vha o lala hone.

⁴¹ A mu fara nga tshanḓa a ri, “Talitha kumi!” – zwine zwa amba uri, “Musidzana, ndi ri vuwani!”

⁴² A mbo ḓi vuwa na zwenezwo a thoma u tshimbila-tshimbila. O vha e musidzana wa miṅwaha ya 12. Vhathu vha tshi zwi vhona vha akhamala.

⁴³ Yesu a vha laya o tou khwaṱhisa uri vha si vhuye vha zwi vhudza muthu, a konou ri, “Nga a fhiwe zwiḽiwa.”