MARKOSI 4 - BIVHILI KHETHWA Mafhungo Madifha

Tshifanyiso tsha muzwali

¹ Yesu a dovha a funza e khunzikhunzini ya Dzivha ḽa Galelia. Vhathu vha kuvhanganela u mu pfa, vha ḓala lwe a vhuya a dzhena tshikepeni a dzula. Tshikepe tshone tsho vha tshi maḓini, vhathu vho ima khunzikhunzini.

² Yesu a vha funza zwithu zwinzhi nga zwifanyiso. A tshi khou funza o ri,

³ “Thetshelesani mafhungo aya: Ho vhuya ha vha na muṅwe munna we a bva a tshi yo zwala mbeu.

⁴ Musi a tshi khou zwala, iṅwe ya wela nḓilani, zwiṋoni zwa ḓa zwa i ḽa.

⁵ Iṅwe ya wela kha lutombo he ha vha hu na mavu maṱukuṱuku. Yeneyo ya mela nga u ṱavhanya, ngauri mavu a hone o vha e si manzhi.

⁶ Hone musi ḓuvha ḽi tshi bva, ḽa fhisa uyo mutomba vhunga midzi yo vha i songo dzhena fhasi, wa mbo ḓi ṋoka.

⁷ Iṅwe ya wela mipfani, iyo mipfa i tshi mela ya i pwanyeledza i si pakate.

⁸ Hone iṅwe ya wela mavuni avhuḓi, ya mela, ya aluwa, ya vhuya ya shela thoro; iṅwe ṱhotshe ya vha na thoro dza 30, iṅwe ya vha na 60, iṅwe ya vha na ḓana.”

⁹ Yesu a mbo ri, “A na nḓevhe nga a ḓipfele!”

Tshi itisaho uri Yesu a funze nga zwifanyiso

¹⁰ Musi vhe nga tshavho, vha 12 na vhaṅwe vhafunziwa vha Yesu vha mu humbela u ṱalutshedzwa aḽa a zwifanyiso.

¹¹ A vha fhindula a ri, “Inwi no dzumbululelwa tshiphiri tsha muvhuso wa Mudzimu, hone vhaḽa vha si vhaṅwe nga riṋe vha vhudzwa mafhungo aya nga zwifanyiso,

¹² hu u itela uri “ ‘naho vho sedza vha si vhone; naho vho thetshelesa vha si zwi pfe, uri vha sa ḓo rembuluwa, Mudzimu a vho ḓo vha hangwela!’ ”

Ṱhalutshedzo ya tshifanyiso tsha muzwali

¹³ Ndi hone Yesu a tshi vha vhudzisa a ri, “Arali itshi tshifanyiso ni sa tshi pfi, zwiṅwe zwine zwa kha ḓi ḓa ni ḓo zwi pfa hani?

¹⁴ Tshifanyiso itshi tshi amba hezwi: Tshine muzwali a zwala ndi ipfi ḽa Mudzimu.

¹⁵ Hune a tshi zwala ya wela nḓilani, zwi amba avho vhane vha ri vha kha ḓi bva u pfa ipfi ḽa Mudzimu, Saṱhane a mbo ḓi ḓa a tswa mbilu dzavho.

¹⁶ Hune a tshi zwala ya wela kha lutombo, zwi amba avho vhane vha ri u pfa ipfi ḽa Mudzimu vha mbo ḓi ḽi ṱanganedza nga mbilu tshena,

¹⁷ hone vhunga hu si na hune ḽa nga ṱoka midzi khavho, a vha lengi u wa; vha tshi vho tambudzelwa ipfi ḽa Mudzimu na u tovholelwa ḽone vha mbo ḓi ḽi furalela na zwenezwo.

¹⁸ Hune a tshi zwala ya wela mipfani, zwi amba avho vhane vha ri vho pfa ipfi ḽa Mudzimu

¹⁹ ḽa pwanyeledzwa nga u vhilaela nga zwa vhutshilo na u xedzwa nga u funesa lupfumo na u tama zwithu zwa tshakha-tshakha, vha si vhe na mitshelo.

²⁰ Hune i tshi zwalwa ya wela mavuni avhuḓi, zwi amba avho vhane vha ri u pfa ipfi ḽa Mudzimu vha ḽi ṱanganedza, vha vhuya vha aṋwa mitshelo. Vhaṅwe vhavho vha aṋwa 30, vhaṅwe 60, vhaṅwe ḓana.”

U ṱalukanya mafhungo maḓifha

²¹ Yesu a dovha a vha vhudzisa a ri, “Kani-ha luvhone lu ḓela u tibwa nga mvuvhelo kana u vhewa fhasi ha mmbete? Kani a lu vhewi vhudzuloni halwo?

²² A hu na tsho dzumbwaho tshine tsha sa ḓo dzumbululwa; nahone a hu na na tshiphiri tshine tsha sa ḓo bvela khagala.

²³ “A na nḓevhe kha a ḓipfele!”

²⁴ Yesu a vha vhudza a ri, “Thetshelesani zwavhuḓi! Muelo une na elela vhaṅwe ngawo, na inwi Mudzimu u ḓo ni elela-vho ngawo, nahone u tshi vho fhira uḽa we inwi na ela ngawo.

²⁵ Muthu a na zwawe u ḓo dovha a engedzwa zwiṅwe, hone a si na tshawe u ḓo dovha a dzhielwa na zwiṱukuṱuku zwine a vha nazwo.”

Tshifanyiso tsha mbeu

²⁶ Yesu a tshi isa phanḓa a ri, “Muvhuso wa Mudzimu u fana na muthu o zwalaho mbeu tsimuni yawe.

²⁷ Vhusiku u a ḓieḓetshela, nga matsheloni a ḓivutshela zwawe, nga ngei mutomba u tshi khou runga, wa aluwa, ene a sa ḓivhi tshi u medzaho.

²⁸ Ndi mavu one aṋe ane a itisa uri goroi i aluwe i vhuye i rumbuwe: tsha u thoma hu vhonala mutomba, wa vhuya wa rumbuwa ha vhuya ha bvelela ṱhotshe yo shelaho thoro;

²⁹ musi goroi yo no vhibva vhathu vha konou bva na segere u yo tshea ngauri tshifhinga tsha khaṋo tshi vha tsho swika.”

Tshifanyiso tsha muhuyu

³⁰ Yesu a ri, “Nṋa muvhuso wa Mudzimu ri ḓo u fanyisa na mini? Ri ḓo wana tshifanyiso-ḓe tsha u u ṱalutshedza?

³¹ U fana na mbeu ya muhuyu, ine ya vha yone mbeu ṱhukhusa.

³² Muthu u a i zwala; musi i tshi mela ya vho vha muri muhuluhulu u na matavhi o hulaho lune na zwiṋoni zwa vhuya zwa ḓa zwa fhaṱa zwiṱaha khawo.”

³³ Yesu o vha a tshi ḓi funza ipfi ḽa Mudzimu nga zwifanyiso zwinzhi zwi fanaho na zwenezwi; a tshi tou vha vhudza zwine vha kona u zwi ṱalukanya fhedzi.

³⁴ Ho ngo vhuya a amba navho nga iṅwe nḓila arali hu si nga zwifanyiso; a konou ṱalutshedza vhafunziwa vhawe zwoṱhe vhe nga tshavho.

Yesu a tshi kaidza ḓumbu

³⁵ Ḓuvha ḽeneḽo nga madekwana Yesu a vhudza vhafunziwa vhawe a ri, “Nga ri wetshele seli ha dzivha.”

³⁶ Vha mbo sia gogo ḽa vhathu; vhafunziwa vha dzhena tshikepeni tshenetsho tshe Yesu a vha o no vha khatsho, tsha ṱuwa na zwiṅwe zwikepe zwe zwa vha zwi henefho.

³⁷ Ha vuwa ḓumbu ḽihulu, maḓi a thoma u dzhena tshikepeni a vhuya a nga a sa tshi ḓadza.

³⁸ Yesu o vha o eḓela nga murahu o siamela. Vhafunziwa vha mu vusa vha ri, “Vhafunzi, nṋa a vha vhuyi vha zwi londa ri tshi khou ṱoḓa u lovha?”

³⁹ Yesu a vuwa, a kaidza ḓumbu na magabelo uri zwi dzike, nangoho zwa mbo ḓi dzika, ha tou dzokoto.

⁴⁰ Ndi hone Yesu a tshi amba na vhafunziwa vhawe a ri, “No tshenuswa ngani? Kani ni tshee vhathu vha si na fulufhelo?”

⁴¹ Hone vhone vha farwa nga nyofho khulu, vha thoma u vhudzisana nga tshavho vha tshi ri, “Ndi muthu-ḓe hoyu ane a kaidza ḓumbu na lwanzhe, zwa mu thetshelesa?”