MARKOSI 13 - BIVHILI KHETHWA Mafhungo Madifha

Yesu a tshi porofita u thuthwa ha thembele

¹ Yesu a tshi tou bva thembeleni muṅwe wa vhafunziwa a amba nae a ri, “Vhafunzi, kha vha dzou vhona uri matombo aya ndi mangafhani na uri zwifhaṱo izwi zwo naka hani!”

² Yesu a tshi mu fhindula a ri, “A thi ri izwi zwifhaṱo zwihuluhulu ni khou zwi vhona? A hu na tombo na ḽithihi ḽine ḽa ḓo sala ḽo dzula nṱha ha ḽiṅwe, oṱhe a ḓo piḓimulwa.”

Zwifhinga zwa u tambudzwa na u tovholwa

³ Yesu o vha o dzula Thavhani ya Miolivi o livhana na thembele, ha ḓa Pitrosi na Jakopo na Johanisi na Andrisi vha tshi ṱoḓa u amba nae vhe vhoṱhe.

⁴ Vha mu vhudzisa vha ri, “Kha vha ri vhudze uri zwine vha amba zwi ḓo itea lini; vha ri vhudze na tshiga tshine ra ḓo vhona ngatsho uri zwo sendela.”

⁵ Yesu a thoma u vha funza a ri, “Ni vhone uri ni si fhurwe nga vhathu.

⁶ Hu ḓo ḓa vhathu vhanzhi vha tshi ri ndi vhone Nṋe, muṅwe na muṅwe wavho a tshi ri, ‘Ndi nṋe Mesia!’ Vha tshi ralo vha ḓo xedza vhathu vhanzhi.

⁷ Arali ni tshi pfa mikosi ya nndwa yo ṱangana kana ni tshi pfa mafhungo a nndwa dzi no khou ḓa, ni songo tshenuwa. Hezwo zwone zwi fanela u thoma u ḓa, hone zwi sa ambi uri vhufhelo ho no mbo ḓi swika.

⁸ Tshakha dzi ḓo bva pfumo dza lwa; mivhuso i ḓo vutshelana. Hu ḓo vha na midzinginyo minzhi shangoni, ha wa na nḓala. Vhuṱungu hovhu ndi tshiga tsha uri Mesia u nḓilani, unga u ḓa ha muthu muswa hu tshi rangwa phanḓa nga vhuṱungu ha u beba.

⁹ “A vha inwi dzulani no fhaṱuwa, ngauri vha ḓo ni fara vha ni isa khoroni; ni ḓo rwiwa sinagogoni; ni ḓo sengiswa nga magota na mahosi hu u ṱhuphelwa Nṋe, ha ḓo vha hu hone u ni vulela nḓila ya u vha ṱhanzi dzanga khavho;

¹⁰ ngauri zwo fanela uri mafhungo maḓifha a thome u ḓivhadzwa tshakha dzoṱhe.

¹¹ Musi vha tshi ni fara vha ni isa khoroni ni songo ḽa mbilu na ri ri ḓo ri mini; tshifhinga tshazwo tshi tshi swika ni ḓo amba zwine Mudzimu a ni funzedza, vhunga iṱali maipfi ane na ḓo amba a sa nga vhi aṋu, a tshi ḓo tou bva ha Muya Mukhethwa.

¹² Muthu u ḓo kumedza ṅwana wa khotsi awe uri a vhulawe, na khotsi a kumedza ṅwana wawe. Vhana vha ḓo shandukela vhabebi vhavho vha vha vhulahisa.

¹³ Vhathu vhoṱhe vha ḓo ni vhenga nge na vha vhanga. Hone ane a ḓo konḓelela a sa litshi ndi ene ane a ḓo tshidzwa.

Vhuṱudzi vhu ḓisaho mutshinyalo

¹⁴ “Musi ni tshi vhona ‘Vhuṱudzi vhu ḓisaho mutshinyalo’ ho imiswa fhethu hu songo mu fanelaho” (muvhali nga a pfesese), “vha re Judia vha shavhele zwikwarani.

¹⁵ Muthu a re kha ṱhanga ya nnḓu yawe a songo tsha fhedza tshifhinga nga u tsa a dzhena nḓuni uri a dzhie thundu dzawe.

¹⁶ A re tsimuni a songo tsha humela hayani u yo dzhia nguvho yawe.

¹⁷ Musi zwi tshi itea vho vhifhaho muvhilini na vha mamisaho zwi ḓo vha vhifhela.

¹⁸ Ni tou rabela uri zwithu izwi zwi si itee vhuriha!

¹⁹ U tambula ha misi iyo hu ḓo fhira hoṱhe ho no vhuyaho ha vha hone, tshee Mudzimu a sika shango, na ṋamusi. Nahone zwine zwa nga zwone a zwi nga dovhi zwa vha hone.

²⁰ Hone Mudzimu ayo maḓuvha o a fhungudza. Ngavhe a si tou ralo, ndi musi hu si na ane a ḓo ponyoka a tshila; hone o a fhungudza a tshi itela vhe a vha nanga.

²¹ “Zwenezwo arali ni tshi pfa muthu a tshi ri, ‘Vhonani Mesia khoyu!’ kana a tshi ri, ‘Vhonani khouḽaa!’ ni songo tenda.

²² Hu ḓo bvelela vhomesia vha khole-khole na vhaporofita vha khole-khole; vha ḓo ita maḓembe na zwimangadzo uri arali zwo vha zwi tshi konadzea vha xedze na vho nangwaho nga Mudzimu.

²³ Dzulani no fhaṱuwa! A vha Nṋe tenda ndo dzula ndo ni vhudza zwoṱhe.”

U vhuya ha Mubebwa-nga-muthu

²⁴ “Musi ayo maḓuvha a vhuṱungu o no fhela, ḓuvha ḽi ḓo dzima na ṅwedzi wa swifhala,

²⁵ nga ngeno ṋaledzi dzi tshi khou wa, zwi re lutomboni zwa vilingana.

²⁶ “Zwenezwo vha ḓo vhona Mubebwa-nga-muthu a tshi ḓa e kha gole e na maanḓa mahulu na vhugala.

²⁷ U ḓo ruma vharuṅwa khuḓani nṋa dza shango uri vha kuvhanganye vho nangwaho nga Mudzimu, u bva vhusendekamisi u swika vhusendekamisi.

Pfunzo ya muhuyu u tshi ṱuma lurere

²⁸ “Ḓifunzeni nga muhuyu; musi ni tshi vhona thavhi dzawo dzi tshi thoma u khuba maḓi dza ṱuma lurere, ni mbo ḓi ḓivha uri tsho limuwa.

²⁹ Zwenezwo na zwone zwi ḓo ḓi tou ralo: zwithu izwi zwi tshi itea ndi hone ni tshi ḓo ḓivha uri tshifhinga tsho swika.

³⁰ Zwino ipfani-ha: zwithu izwi zwoṱhe zwi ḓo itea vhathu vha no khou tshila zwino vha sa athu fhelela vhoṱhe u fa.

³¹ Ḽiṱaḓulu na ḽifhasi zwi ḓo lovha, maipfi anga one ha nga weli fhasi.

Ḓuvha na tshifhinga tsha vhufhelo

³² “Hone a hu na a ḓivhaho uri iḽo ḓuvha kana tshifhinga tshazwo tshi ḓo swika lini. Hu vharuṅwa ngei ṱaḓulu, he Murwa, a vha zwi ḓivhi, a zwi ḓivhaho ndi Khotsi e eṱhe.

³³ Dzulani no fhaṱuwa! A ni ḓivhi uri zwi ḓo vha zwa lini.

³⁴ Zwi ḓo tou nga muthu ane a tshi fara lwendo a sia vhashumi vhawe vho fara mushumo, muṅwe na muṅwe o fara wawe, a vhudza mulindamuṋango uri a dzule o fhaṱuwa.

³⁵ Thanyani-ha ngauri a ni ḓivhi uri Muṋe wa muḓi u ḓo vhuya lini – a nga ḓi vhuya nga madekwana, a nga ḓi vhuya vhukati ha vhusiku, a nga ḓi vhuya nga maremamutsho, a nga ḓi vhuya ḓuvha ḽi tshi bvisa mulomo!

³⁶ Zwino arali a sokou tshenuwa o vhuya ha nga ḓo wana no eḓela naa?

³⁷ Zwine nda vhudza inwi ndi zwine nda vhudza vhoṱhe, ndi ri: fhaṱuwani!”